ຄຣີສ ສະມໍລີງ ບໍ່ສາມາດຢຸດ ບາເຟຕິມບີ້ ໂກມິສ ໄວ້ໄດ້ເຮັດໃຫ້ກາຍເປັນຮີໂຣ່ຂອງ “ຫົງຂາວ” ສະວອນຊີ ຊິຕີ ພິກເອົາຊະນະແມນເຊສເຕີ ຢູໄນເຕັດ ໄປໄດ້ 2-1 ປະຕູ ຄວ້າ 3 ຄະແນນພ້ອມກັບແຊງໜ້າ “ຜີແດງ” ຂຶ້ນໄປຢູ່ອັນດັບທີ 4 ຂອງຕາຕະລາງຄະແນນ

ເລີ່ມເກມມາບໍ່ພໍເທົ່າໃດ ແມນຢູ ມີລຸ້ນຈາກການຍິງຂອງ ເມມຟິສ ເດປາຍ ປັ່ນຟຣີຄິກດ້ວຍຂວາແຕ່ກໍ່ບໍ່ຜ່ານ ລູຄັສ ຟາບຽນສະກີ້ ປ້ອງກັນໄວ້ໄດ້ ແຕ່ຫຼັງຈາກນັ້ນກໍ່ບໍ່ສາມາດຍິງປະຕູກັນໄດ້ຈົນໝົດເຄີ່ງເວລາທຳອິດ

ມາເຖິງເຄີ່ງເວລາທີ 2 ໄດ້ພຽງ 3 ນາທີ ລຸກ ຊໍ ເປີດບານຈາກເບື້ອງຊ້າຍໄປໜ້າປະຕູກ່ອນທີ່ບານຈະໄປເຖິງ ກວນ ມາຕາ ຍິງແບບເນັ້ນໆບໍ່ມີພາດແມນຢູຂື້ນນຳກ່ອນ 1-0 ປະຕູ

ຕໍ່ມາ ແອຊອີ່ ວິນລຽມ ເກືອບຍິງປະຕູເຂົ້າໂກນຕົວເອງເພາະສະກັດບານຜິດຫຼ່ຽມກ່ອນທີ່ ລູຄັສ ຟາບຽນສະກີ້ ປັດເອົາບານອອກໄປໄດ້
ໃນນາທີທີ່ 61 ເຈົ້າບານນຳຕີສະເໝີໄດ້ ກິລຟີ່ ຊິເກິດສັນ ເປີດບານຈາກດ້ານຂວາໄປໜ້າປະຕູ ອ໊ອງເດຣ ອາຢິວ ຂື້ນໂໝ່ງບານຜ່ານມື ເຊຄິໂອ ໂຣເມໂຣ່ ເຂົ້າໄປເປັນ 1-1 ປະຕູ

ແລະຫຼັງຈາກນັ້ນພຽງ 5 ນາທີ ສະວອນຊີ ຊິຕີ ກໍ່ໄດ້ປະຕູຂື້ນນຳ ຈາກຈັງຫວະທີ່ ອ໊ອງເດຣ ອາຢິວ ສົ່ງບານໃຊ້ກ້ອຍເຂົ້າເຂດໂທດເບື້ອງຂວາແລ້ວ ບາເຟຕິມບີ້ ໂກມີສ ແລ່ນຜ່ານ ຄຣີສ ສະມໍລີ້ງ ຍິງເຂົ້າໃນນາທີທີ່ 66 ເປັນ 2-1 ປະຕູ

ບໍ່ມີປະຕູເພີ່ມຈົນຈົບເກມ 90 ນາທີ ສະວອນຊີ ຊິຕີ ເອົາຊະນະ ແມນເຊສເຕີ ຢູໄນເຕັດ ໄປໄດ້ 2-1ປະຕູ