ຂປລ. ງານວາງສະແດງຮູບພາບ ໃນງານສັບປະດາ ວັດທະນະທຳຫວຽດນາມ ໄດ້ຈັດຂຶ້ນ ໃນວັນທີ 28 ສິງຫາ ແລະ ຈະດຳເນີນໄປຈົນເຖິງ ວັນທີ 2 ກັນຍາ 2015 ຢູ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ເຊິ່ງມີຮູບພາບຈຳນວນ 80 ຮູບ ຈາກນັກສີລະປິນ ຫວຽດນາມ ໂດຍໄດ້ເລົ່າເລື່ອງຜ່ານເລັນກ້ອງ ມາເປັນຮູບພາບທີ່ສະແດງໃຫ້ເຫັນ ກ່ຽວກັບພື້ນຖານວັດທະນະທຳ ທີ່ເປັນເອກະລັກສະເພາະ ຂອງຫວຽດນາມ, ບັນດາຮິດຄອງປະເພນີ ໃນງານບຸນຕ່າງໆ, ທິວທັດທຳມະຊາດ, ທະເລ, ຊີວະທັດ, ການດຳລົງຊີວິດ ຂອງຊາວຫວຽດນາມ ໃຫ້ເປັນທີປະຈັກຕາແກ່ຊາວໂລກ .
ເປັນກຽດເຂົ້າຮ່ວມ ງານວາງສະແດງດັ່ງກ່າວ ມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ເວືອງ ຢຸ່ຍບຽນ ລັດຖະມົນຕີຊ່ວຍວ່າການ ກະຊວງວັດທະນະທຳ, ກິລາ ແລະ ທ່ອງທ່ຽວ ສສ ຫວຽດນາມ, ບັນດາລັດຖະມົນຕີວ່າການ, ຊ່ວຍວ່າການ ເຂົ້າຮ່ວມ.
ທ່ານ ເວືອງ ຢຸ່ຍບຽນ ລັດຖະມົນຕີຊ່ວຍວ່າການ ກະຊວງວັດທະນະທຳ, ກິລາ ແລະ ທ່ອງທ່ຽວ ສສ ຫວຽດນາມ ໄດ້ກ່າວວ່າ: ງານສັບປະດາ ວັດທະນະທຳ ຫວຽດນາມ ຢູ່ ສປປ ລາວ ປີ 2015 ແມ່ນການເຄື່ອນໄຫວ ພົບປະແລກປ່ຽນ ທີ່ມີຄວາມສຳຄັນ ທາງດ້ານວັດທະນະທຳ, ໂດຍປະຕິບັດຕາມ ແຜນການການຮ່ວມມື ແລກປ່ຽນ ກ່ຽວກັບວັດທະນະທຳ, ສິລະປະກຳ ລະຫວ່າງ ລາວ-ຫວຽດນາມ ໃນໄລຍະ 2012-2015 ແລະ ແມ່ນກິດຈະກຳໜຶ່ງ ເພື່ອກຽມໃສ່ສະເຫລີມສະຫລອງວັນຊາດ ສປປ ລາວ ຄົບຮອບ 40 ປີ ແລະ ວັນຊາດຫວຽດນາມ ຄົບຮອບ 70 ປີ.
ໃນຕອນຄ່ຳວັນດຽວກັນ ຢູ່ຫໍວັດທະນະທຳແຫ່ງຊາດ ນະຄອນຫວງວຽງຈັນ ໄດ້ມີງານສະແດງສິລະປະ ຈາກນັກສະແດງຂອງໂຮງຮຽນລະຄອນໄວໜຸ່ມ (Tuoi Tre) ຫວຽດນາມ, ເຊິ່ງມີຫລາຍລາຍການສະແດງ ທີ່ໜ້າປະທັບໃຈ ເປັນຕົ້ນຮ້ອງເພງປະກອບບົດຟ້ອນ, ຮ້ອງເພງດ່ຽວຊາຍ, ດ່ຽວຍິງ, ບັນເລງພິນສາຍດຽວ, ການສະແດງດົນຕີພື້ນເມືອງ ປະສານສຽງ, ການສະແດງອັນອ່ອນຊ້ອຍ ແລະ ສວຍສົດງົດງາມ ປະສານກັບການຫລີ້ນດົນຕີສົດ ແລະ ລາຍການອື່ນໆ ທີ່ສ້າງຄວາມມ່ວນຊື່ນ ໃຫ້ກັບຜູ້ເບິ່ງຜູ້ຊົມ.
ຂອບໃຈຂ່າວຈາກ:
