ເຈົ້າໜ້າທີ່ຕຳຫຼວດໄທ ບຸກຈັບຊາວຕວກກີຜູ້ຕ້ອງສົງໄສ ມືວາງລະເບີດລາຊະປະສົງ ເມື່ອສອງອາທິດກ່ອນ ໃນອາພາດເມັ້ນເຂດໜອງຈອກ
ມື້ນີ້ ວັນທີ 29 ສິງຫາ 2015 ເວລາປະມານ 14:00 ເຈົ້າໜ້າທີ່ຕຳຫຼວດ ພ້ອມດ້ວຍກຳລັງທະຫານເຂົ້າກວດກາ ພາຍໃນຫ້ອງເລກທີ 412 ແລະ 414 ພູນອະນັນອະພາດເມັ້ນ ເລກທີ 134/5 ປາກຮ່ອມເຊື່ອມສຳພັນ 11 ເຂດໜອງຈອກ ນະຄອນຫຼວງບາງກອກ (ນະຄອນຫຼວງຂອງໄທ) ເພື່ອກວດກາຜູ້ຊາຍຕ້ອງສົງໄສ ກ່ຽວຂ້ອງກັບເຫດລະເບີດບໍລິເວນ ແຍກລາຊະປະສົງ.
ຈາກການກວດຄົ້ນຂອງເຈົ້າໜ້າທີ່ ໄດ້ພົບອຸປະກອນແລະວັດຖຸທີ່ໃຊ້ສຳລັບ ປະກອບລະເບີດຈຳນວນຫຼາຍ ໂດຍສະເພາະແມ່ນລູກບີ່ (ລູກຫວ່ານ) ທີ່ມີເສັ້ນຜ່າສູນກາງ 0.5 ຊັງຕີແມັດ ຊະນິດດຽວກັບທີ່ພົບໃນເຫດລະເບີດ ແຍກລາຊະປະສົງແລະທ່າເຮືອສາທອນ ເບື້ອງຕົ້ນໄດ້ຄວບຄຸມໂຕຊາຍສັນຊາດຕວກກີ ທີ່ເປັນເຈົ້າຂອງຫ້ອງເຊົ່າດັ່ງກ່າວໄວ້ສອບສວນ.
ແນວໃດກໍຕາມໃນເບື້ອງຕົ້ນ ຜູ້ຕ້ອງສົງໄສຍັງໃຫ້ການປະຕິເສດ ຕໍ່ຂໍ້ຫາວາງລະເບີດລາຊະປະສົງ ແລະໜ້າຕາຂອງເຂົາກໍບໍ່ຄືກັບ ຮູບທີ່ເຈົ້າໜ້າທີ່ໄດ້ສະເກັດອອກມາ ໃນເມື່ອກ່ອນນັ້ນ.
ແລະຜູ້ບັນຊາການຕຳຫຼວດຂອງໄທ ບອກວ່າອາດຈະບໍ່ແມ່ນການກໍ່ການຮ້າຍຂ້າມຊາດ ແຕ່ອາດຈະເປັນການແກ້ແຄ້ນຫຼາຍກວ່າ ແຕ່ແນວໃດກໍຕາມ ຊາຍຄົນນີ້ ເປັນຜູ້ຕ້ອງຫາທີ່ຄອບຄອງລະເບີດ ຢ່າງແນ່ນອນ.
