ຂປລ. ສົກຮຽນ 2015-2016 ນີ້ ກະຊວງສຶກສາທິການ ແລະ ກິລາ ໄດ້ເອົາໃຈໃສ່ເລັ່ງປັບປຸງ ການຈັດຕັ້ງປະຕິບັດ ການຮຽນ-ການສອນ ໄປຕາມ 3 ລັກສະນະ ແລະ 5 ຫລັກມູນ ຂອງການສຶກສາ ໃຫ້ມີປະສິດທິພາບ ແລະ ເປັນຮູບປະທໍາ.
ທ່ານ ດຣ.ນາງ ສີສຸກ ວົງວິຈິດ ຫົວໜ້າກົມມັດທະຍົມ ກະຊວງສຶກສາທິການ ແລະ ກິລາ ໃຫ້ສໍາພາດຕໍ່ສື່ມວນຊົນ ໃນວັນທີ 27 ສິງຫາ 2015 ນີ້ ວ່າ: ໃນສົກຮຽນນີ້ ທາງກະຊວງສຶກສາທິການ ແລະ ກິລາ ໄດ້ປັບປຸງກ່ຽວກັບ ການຮຽນ-ການສອນ ຢູ່ໃນແຕ່ລະໂຮງຮຽນ ເປັນຕົ້ນ ກ່ຽວກັບການຊັບຊ້ອນຄູສອນ ໃນລາຍວິຊາໃຫ້ເປັນຮູບປະທໍາ ເພາະທີ່ຜ່ານມາ ໃນບາງວິຊາຄູສອນບໍ່ພຽງພໍຍັງຂາດຄູ, ໂດຍສະເພາະວິຊາວິທະຍາສາດທໍາມະຊາດ ແລະ ວິຊາອື່ນໆ ທີ່ຍັງເຫັນວ່າບໍ່ທັນ ມີຄູສອນຄົບຕາມ 5 ຫລັກມູນ ຂອງການສຶກສາ ດັ່ງນັ້ນ ໃນສົກຮຽນ 2015-2016 ນີ້ ທາງກະຊວງສຶກສາທິການ ແລະ ກິລາ ໄດ້ມີແຈ້ງການແນະນໍາ ໃຫ້ພະແນກສຶກສາທິການ ແລະ ກິລາແຂວງ, ນະຄອນຫລວງວຽງຈັນ ກ່ຽວກັບການຈັດຕັ້ງປະຕິບັດ ການຮຽນ-ການສອນ ໄປຕາມການສຶກສາທີ່ໄດ້ກໍານົດ, ໂດຍເນັ້ນໃຫ້ແຕ່ລະໂຮງຮຽນ ຊັບຊ້ອນຈັດສັນຄູສອນໃຫ້ຄົບຖ້ວນ ຕາມວິຊາທີ່ໄດ້ບັນຈຸ ຢູ່ໃນຫລັກສູດ ຄຽງຄູ່ກັບການຫັນປ່ຽນຫລັກສູດໃໝ່ ຈາກການເນັ້ນໃສ່ເນື້ອໃນວິຊາ ມາເປັນໃສ່ສະມັດຕະພາບ ໄປຕາມທິດຂອງການພັດທະນາ ເສດຖະກິດ-ສັງຄົມ ຂອງປະເທດເຮົາ ແລະ ຮັບປະກັນ 3 ລັກສະນະ ຂອງການສຶກສາ ຄື: ລັກສະນະຊາດ, ວິທະຍາສາດ-ທັນສະໄໝ ແລະ ມະຫາຊົນ; ຕາມ 5 ຫລັກມູນ ຂອງການສຶກສາຄື : ປັນຍາສຶກສາ, ຄຸນສົມບັດສຶກສາ, ສິລະປະສຶກສາ, ພາລະສຶກສາ, ອອກແຮງງານສຶກສາ.
ທ່ານ ກ່າວຕື່ມວ່າ: ສະເພາະໃນສົກຮຽນໃໝ່ນີ້ ສະຖາບັນຄົ້ນຄວ້າ ວິທະຍາສາດການສຶກສາ ກໍໄດ້ສໍາເລັດການພັດທະນາຫລັກສູດ ຊັ້ນມັດທະຍົມສຶກສາ ສະບັບປະຕິຮູບຊັ້ນ ມ.6 ດັ່ງນັ້ນ ເພື່ອໃຫ້ຄູທີ່ສອນໃນຊັ້ນ ມັດທະຍົມສຶກສາໃນຂອບເຂດທົ່ວປະເທດ ມີຄວາມຮູ້ຄວາມເຂົ້າໃຈ ຕໍ່ຫລັກສູດໃໝ່ຢ່າງເລິກເຊິ່ງ ແລະ ມີຄວາມເປັນເອກະພາບ ໃນການຈັດຕັ້ງປະຕິບັດ ສະນັ້ນ ກົມມັດທະຍົມ ໄດ້ສົມທົບກັບກົມສ້າງຄູ ແລະ ສະຖາບັນຄົ້ນຄວ້າ ວິທະຍາສາດການສຶກສາ ໄດ້ຈັດຕັ້ງຝຶກອົບຮົມ ກ່ຽວກັບຫລັກສູດ, ປື້ມແບບຮຽນ ແລະ ຄູ່ມືຄູຊັ້ນ ມ.6, ພ້ອມທັງແນະນໍາ ວິທີສິດສອນແບບໃໝ່ ໃຫ້ແກ່ຄູຝຶກຂັ້ນແຂວງແຕ່ລະແຂວງ ໄດ້ສໍາເລັດກ່ອນເປີດສົກຮຽນໃໝ່ນີ້.
ຂອບໃຈຂ່າວຈາກ:
