ສຳນັກຂ່າວຕ່າງປະເທດ ລາຍງານໃນວັນທີ 26 ສິງຫານີ້ວ່າ ເຈົ້າໜ້າທີ່ພາສີຫວຽດນາມສາມາດກວດພົບ ແລະ ຍຶດງາຊ້າງລັກລອບນຳເຂົ້າປະເທດໄດ້ ໃນມື້ວັນອັງຄານທີ 25 ສິງຫາຜ່ານມານີ້ ຢູ່ທ່າເຮືອຕຽນຊາ ນະຄອນດານັງ ຊຶ່ງພົບງາຊ້າງ ແລະ ໂຕລິ່ນຈຳນວນຫລວງຫລາຍ ເຊື່ອງໄວ້ໃນເປົາແກ່ນຖົ່ວແດງຈຳນວນ 19.5 ໂຕນ ທີ່ຂົນມາກັບເຮືອກຳປັ່ນເດີນທາງມາຈາກປະເທດມາເລເຊຍ.

ທັງນີ້ ງາຊ້າງແມ່ນມີລາຄາເຖິງກິໂລລະ 2,100 ໂດລາໃນຕະຫລາດຄ້າຂອງເຖື່ອນຢູ່ຫວຽດນາມ ສ່ວນໂຕລິ່ນກໍເປັນສັດປ່າທີ່ມີລາຄາສູງ ຊຶ່ງຊາວຈີນ ແລະ ຊາວຫວຽດນາມເຊື່ອວ່າ ສາມາດປິ່ນປົວພະຍາດໄດ້ຫລາຍຊະນິດ ແລະ ບຳລຸງຮ່າງກາຍ.