ໂຮງແຮມເລກ 1 ຢູ່ເມືອງວຽງໄຊ ແຂວງຫົວພັນ ເປັນໂຮງແຮມທີ່ເກົ່າແກ່ຊຸດໂຊມມາຫລາຍສິບປີ. ສະນັ້ນ ມາຮອດປີ 2011 ພາກລັດຈຶ່ງໄດ້ຈັດຫາຜູ້ມາສຳປະທານ ເພື່ອປັບປຸງສ້ອມແປງ ແລະ ດຳເນີນທຸລະກິດຕາມລະບຽບກົດໝາຍ ເຊິ່ງບໍລິສັດຮວ້າງຟຸກ ລ້າງເຊີນ ສສ ຫວຽດນາມ ໄດ້ຮັບການສຳປະທານເປັນໄລຍະເວລາ 50 ປີ. ຜ່ານການດຳເນີນທຸລະກິດໂຮງແຮມເປັນໄລຍະເວລາ 2 ປີກວ່າຜ່ານມາ ນັບແຕ່ປີ 2012 ມາເຖິງປັດຈຸບັນ ຜູ້ສຳປະທານໄດ້ສືບຕໍ່ຂະຫຍາຍກິດຈະການຕື່ມ ເປັນຕົ້ນແມ່ນໄດ້ປັບປຸງເຂດພັກຜ່ອນຢູ່ດ້ານຫລັງຂອງໂຮງແຮມເຊັ່ນ: ເຂດໜອງນ້ຳບ່ອນພັກຜ່ອນ, ເຂດເວທີກາງແຈ້ງ ເພື່ອຮອງຮັບງານລ້ຽງ, ການແຕ່ງດອງ ແລະ ເຂດຖ້ຳຢູ່ດ້ານຫລັງທີ່ຢູ່ໃນຂອບເຂດຂອງໂຮງແຮມເປັນຮ້ານກາເຟ ແລະ ບ່ອນຟັງເພງ-ຮ້ອງເພງ ເປັນມູນຄ່າການລົງທຶນທັງໝົດ 1 ລ້ານ 6 ແສນກວ່າໂດລາ ເພື່ອກະກຽມຮອງຮັບແຂກພາຍໃນ ແລະ ຕ່າງປະເທດໃນອະນາຄົດ, ພ້ອມທັງໄດ້ເປີດນຳໃຊ້ບັນດາກິດຈະການຂ້າງເທິງໃນມື້ວັນທີ 21/8/2015 ຢ່າງເປັນທາງການ ແລະ ກໍໄດ້ມີແຂກພາກສ່ວນລັດ, ເອກະຊົນ, ແຂກພາຍໃນ ແລະ ຕ່າງປະເທດເຂົ້າຮ່ວມ ໂດຍສະເພາະແມ່ນແຂກທີ່ມາຈາກຫວຽດນາມ ແລະ ກໍໄດ້ມີການສະແດງສິລະປະ, ຟ້ອນລຳວົງ, ຮ້ອງເພງ-ຟັງເພງ ແລະ ໃນຂະນະດຽວກັນນີ້ ຢູ່ພາຍໃນຖ້ຳກໍໄດ້ມີແຂກຂອງບໍລິສັດຜູ້ລົງທຶນຈຳນວນໜຶ່ງຂຶ້ນໄປເຕັ້ນລຳຢູ່ໃນສະຖານທີ່ຖ້ຳດັ່ງກ່າວ ເຊິ່ງເຫັນວ່າບໍ່ຖືກຕ້ອງຕາມການອະນຸຍາດຂອງພາກສ່ວນກ່ຽວຂ້ອງ. ຕໍ່ບັນຫານີ້ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ແລະ ເມືອງວຽງໄຊ ກໍໄດ້ແນະນຳໃຫ້ປັບປຸງແກ້ໄຂສິ່ງທີ່ບໍ່ຖືກຕ້ອງ ແລະ ສັ່ງໃຫ້ຢຸດເຊົາພຶດຕິກຳດັ່ງກ່າວໄປແລ້ວ.
ສຳລັບແຜນການຂະຫຍາຍກິດຈະການ ຢູ່ຂອບເຂດໂຮງແຮມດັ່ງກ່າວໃນອະນາຄົດ, ບໍລິສັດຈະມີແຜນສ້າງຕື່ມເຊັ່ນ: ເດີ່ນກິລາຟຸດຊໍ, ເດີ່ນເຕັນນິດ, ບ່ອນນັ່ງຫລິ້ນສຳລັບຄອບຄົວ ແລະ ເດັກນ້ອຍ (ສວນສະໜຸກ), ສະລອຍນ້ຳ. ສະນັ້ນ ຈຶ່ງແຈ້ງຂ່າວມາຍັງທຸກພາກສ່ວນຮັບຊາບ ເພື່ອບໍ່ໃຫ້ສັງຄົມເຂົ້າໃຈຜິດຕໍ່ການສຳປະທານເຂດໂຮງແຮມດັ່ງກ່າວ.
ຖ້າຫາກທ່ານໃດຍັງມີຄວາມສົນໃຈກໍເຊີນຊວນມາສຳຜັດເບິ່ງຕົວຈິງດ້ວຍຕົນເອງ.
ຂ່າວຈາກ Pathedlao Lao
