ສຳນັກຂ່າວຕ່າງປະເທດ ລາຍງານໃນວັນທີ 25 ສິງຫານີ້ວ່າ ຜູ້ແທນເຈລະຈາລະດັບສູງຈາກສາທາລະນະລັດ ປະຊາຊົນ ປະຊາທິປະໄຕ ເກົາຫລີ (ເກົາຫລີເໜືອ) ແລະ ຈາກສາທາລະນະລັດເກົາຫລີ (ເກົາຫລີໃຕ້) ໄດ້ບັນລຸຂໍ້ຕົກລົງເພື່ອຫລຸດຜ່ອນຄວາມເຄັ່ງຕຶງຂອງສະພາບການທີ່ເກີດຂຶ້ນແລ້ວ ຫລັງຈາກທີ່ມີການປະທະກັນຂອງທະຫານທັງສອງຝ່າຍ ໃນວັນທີ 20 ສິງຫາຜ່ານມາ ເຮັດໃຫ້ທັງສອງເກົາຫລີຕ້ອງຕັດສິນໃຈເຂົ້າຮ່ວມໂຕະເຈລະຈາ ໃນມື້ວັນທີ 22 ສິງຫາ ທີ່ບ້ານປັນມຸນຈອມ ຊຶ່ງເປັນເຂດປອດທະຫານ ຢູ່ເສັ້ນຂະໜານເລກທີ 38 ຈົນສາມາດບັນລຸຂໍ້ຕົກລົງຮ່ວມກັນໄດ້ໃນມື້ວານນີ້ (24 ສິງຫາ).