ຂປລ. ໃນຕອນເຊົ້າຂອງວັນທີ 21 ສິງຫາ 2015 ທີ່ຫ້ອງວ່າການປົກຄອງແຂວງໆອຸດົມໄຊ ໄດ້ຈັດພິທີ ມອບ-ຮັບ ເລຂາຄະນະພັກແຂວງ, ເຈົ້າແຂວງໆອຸດົມໄຊ ລະຫວ່າງ ສະຫາຍ ຄຳຫຼ້າ ລິ້ງນະສອນ, ກຳມະການສູນກາງພັກ, ເລຂາຄະນະບໍລິຫານພັກແຂວງ, ເຈົ້າແຂວງແຂວງອຸດົມໄຊ ຜູ້ເກົ່າ ແລະ ສະຫາຍ ເພັດສາຄອນ ຫຼວງອາໄພ ວ່າການເລຂາຄະນະບໍລິຫານພັກແຂວງ, ເຈົ້າແຂວງແຂວງອຸດົມໄຊ ຜູ້ໃໝ່ ໂດຍເປັນກຽດໃນພິທີ ອາຊາງ ລາວລີ ກຳມະການກົມການເມືອງສູນກາງພັກ, ຮອງນາຍົກລັັດຖະມົນຕີ, ຜູ້ຊີ້ນຳວຽກງານການປົກຄອງ ເຊິ່ງມີຜູ້ຕາງໜ້າຄະນະຈັດຕັ້ງສູນກາງພັກ, ບັນດາສະຫາຍຄະນະພັກ, ຄະນະນຳ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.
ໃນການມອບ-ຮັບໜ້າທີ່ ຄັ້ງນີ້ ແມ່ນອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ສູນກາງພັກ ແລະ ລັດຖະບານ ຈຶ່ງໄດ້ມີຄຳສັ່ງຂອງກົມການເມືອງສູນກາງພັກ ແລະ ລັດຖະດຳລັດຂອງປະທານປະເທດ ວ່າດ້ວຍການຍົກຍ້າຍການນຳຂັ້ນສູງ ໄປຮັບໜ້າທີ່ໃໝ່ ໂດຍໄດ້ຍົກຍ້າຍ ສະຫາຍ ຄຳຫຼ້າ ລິ້ງນະສອນ ໄປຮັບໜ້າທີ່ໃໝ່ ຢູ່ສູນກາງແນວລາວສ້າງຊາດ, ມະຕິຂອງກົມການເມືອງສູນກາງພັກ ແລະ ລັດຖະດຳລັດຂອງປະທານປະເທດ ໃນການແຕ່ງຕັ້ງ ສະຫາຍ ເພັດສາຄອນ ຫຼວງອາໄພ ເປັນຜູ້ວ່າການເລຂາຄະນະບໍລິຫານພັກແຂວງ, ເຈົ້າແຂວງແຂວງອຸດົມໄຊ.
ໃນໂອກາດນີ້, ສະຫາຍ ອາຊາງ ລາວລີ ກໍ່ໄດ້ກ່າວວ່າ: ການຍົກຍ້າຍຊັບປ່ຽນບ່ອນປະຈໍາການຂອງພະນັກງານ ສະມາຊິກພັກ ມັນແມ່ນກົດເກນແຫ່ງການຄົງຕົວ ແລະ ຂະຫຍາຍຕົວຂອງພັກເຮົາ. ເພື່ອເຮັດໃຫ້ພາຍໃນພັກ ມີຄວາມປອດໃສ, ໜັກແໜ້ນເຂັ້ມແຂງ, ເປັນທີ່ເພິ່ງຂອງປະຊາຊົນ, ເປັນຕົວແທນແຫ່ງສິດຜົນປະໂຫຍດຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ ຢ່າງແທ້ຈິງ. ຊຶ່ງຕະຫຼອດໄລຍະທີ່ ສະຫາຍ ຄຳຫຼ້າ ລິ້ງນະສອນ ເປັນເລຂາພັກແຂວງ, ເຈົ້າແຂວງອຸດົມໄຊ ສະຫາຍກໍ່ໄດ້ມີຄວາມພະຍາຍາມ ທຸ່ມເທທຸກກໍາລັງວັງຊາ, ເຮັດສໍາເລັດໜ້າທີ່ການເມືອງຂອງຕົນ ຢ່າງມີກຽດສະຫງ່າ, ສະຫາຍ ເປັນຜູ້ໜຶ່ງທີ່ມີຜົນງານປະກອບສ່ວນໃນການປົກປັກຮັກສາ ແລະ ພັດທະນາປະເທດຊາດ ກໍ່ຄືແຂວງອຸດົມໄຊ ຊຶ່ງມັນສະແດງອອກໃນທົ່ວແຂວງອຸດົມໄຊ ໄດ້ມີຄວາມສະຫງົບໂດຍພື້ນຖານ, ເສດຖະກິດມີການຂະຫຍາຍຕົວຕໍ່ເນື່ອງ, ຊີວິດການເປັນຢູ່ ດ້ານວັດຖຸ ແລະ ຈິດໃຈຂອງປະຊາຊົນ ໄດ້ຮັບການປັບປຸງດີຂຶ້ນ, ລະບົບການເມືອງ ນັບແຕ່ແຂວງລົງຮອດຮາກຖານ ໄດ້ຮັບການປັບປຸງດີຂຶ້ນ, ພະນັກງານສະມາຊິກພັກ ໄດ້ຮັບການບໍາລຸງຍົກລະດັບ ແລະ ເຕີບໂຕທັງປະລິມານ ແລະ ຄຸນນະພາບ ອັນເປັນພື້ນຖານໃຫ້ແກ່ຄົນລຸ້ນຫຼັງ ໄດ້ສານຕໍ່ພາລະກິດທີ່ສໍາຄັນຂອງພັກ ໃນໄລຍະຕໍ່ໄປ.
ພ້ອມນີ້, ທ່ານຮອງນາຍົກລັດຖະມົນຕີ ກໍ່ໄດ້ເນັ້ນບາງບັນຫາວ່າ: ສຳລັບ ສະຫາຍ ເພັດສາຄອນ ຫຼວງອາໄພ ແມ່ນໄດ້ຮັບຄວາມໄວ້ເນື້ອເຊື່ອໃຈ ແລະ ຄວາມເຊື່ອໝັ້ນ ຈາກຂັ້ນເທິງ ຈຶ່ງໄດ້ມອບໝາຍໜ້າທີ່ອັນສຳຄັນນີ້ ເພື່ອສືບຕໍ່ຍູ້ຂະບວນການທຸກດ້ານ ແລະ ເຮັດໃຫ້ແຂວງອຸດົມໄຊ ໄດ້ຮັບການພັດທະນາດີຂຶ້ນ ເທື່ອລະກ້າວ; ສິ່ງສໍາຄັນ ດ້ວຍປະສົບການ ໃນການຊີ້ນໍາ-ນໍາພາດ້ານມະຫາພາກຂອງສະຫາຍ, ແຕ່ຍັງບໍ່ທັນກໍາໄດ້ ສະພາບຮອບດ້ານຂອງແຂວງອຸດົມໄຊ. ຕ້ອງພະຍາຍາມລົງໃກ້ຊິກຮາກຖານ, ຊອກຮູ້ຖອດຖອນບົດຮຽນສະພາວະຄວາມເປັນຈິງ. ສ່ວນບັນດາສະຫາຍຄະນະພັກ ກໍ່ມີບົດຮຽນປະສົບການ, ຕ້ອງໄດ້ນໍາພາພະນັກງານ-ສະມາຊິກພັກໃນທົ່ວແຂວງ ໃຫ້ມີຄວາມເປັນເອກະພາບກັບຂັ້ນເທິງ ຮ່ວມກັບສະຫາຍເຈົ້າແຂວງຜູ້ໃໝ່ ແລະ ຕອບຕ້ານທຸກກົນອຸບາຍແບ່ງແຍກ ຄວາມສາມັກຄີພາຍໃນພັກ ແລະ ຄວາມສາມັກຄີຂອງການນໍາ ກັບປະຊາຊົນ, ພ້ອມກັນສ້າງພັກໃຫ້ໜັກແໜ້ນເຂັ້ມແຂງ, ພັດທະນາເສດຖະກິດ-ສັງຄົມຂອງແຂວງ ໃຫ້ເຕີບໃຫຍ່ຂະຫຍາຍຕົວ, ນໍາເອົາຄວາມຜາສຸກມາສູ່ປະຊາຊົນບັນດາເຜົ່າໃນທົ່ວແຂວງອຸດົມໄຊ; ໃຫ້ບັນດາສະຫາຍກວດຄືນ ເອົາໃຈໃສ່ການກະກຽມຢ່າງຮອບດ້ານ ໃຫ້ແກ່ການກະກຽມດຳເນີນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງອຸດົມໄຊ ເປັນຕົ້ນ ການຍູ້ຂະບວນການຜະລິດ ແລະ ການເກັບລາຍຮັບ, ດ້ານເນື້ອໃນລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງຕໍ່ໄປ.