ສຳນັກຂ່າວຕ່າງປະເທດລາຍງານວ່າ ມື້ວານນີ້ (22 ສິງຫາ 2015) ເກີດເຫດເຮືອບິນອາຍພົ່ນ “ຮອກເກີ ຮັນເຕີ ທີ7” ລຳໜຶ່ງ ຕົກໃສ່ລົດຫຼາຍຄັນຢູ່ເທິງຖະໜົນ ໃນຂະນະສະແດງສິລະປະການບິນ ໃນງານຊໍແອມ ແອໂຊ ໃນເມືອງຊໍແຮມ ມົນທົນເວສຊັັສເຊກ ທາງພາກໃຕ້ຂອງອັງກິດ ມີຜູ້ເສຍຊີວິດ 7 ສົບ ແລະບາດເຈັບອີກນັບສິບຄົນ.
ທ້າວ ສະຕີເຟນ ໂຈນ ໜຶ້່ງໃນຜູ້ເຫັນເຫດການໄດ້ກ່າວວ່າ ເຮືອບິນລຳນີ້ຫາກໍເລິ່ມການສະແດງ ໂດຍກຳລັງບິນຕີລັງກາ ແຕ່ເຮືອບິນບິນຕ່ຳໂພດ ຈຶ່ງຕົກລົງໃສ່ເສັ້ນທາງສາຍ A27 ແລະເກີດລະເບີດເປັນໄຟລຸກໄຫມ້ ແປວໄຟຖ້ວມໄປຢ່າງໃຫຍ່ ເຮັດໃຫ້ລົດເສຍຫາຍນຳຫຼາຍຄັນ ດ້ານເຈົ້າໜ້າທີ່ໂຮງໝໍເປີດເຜີຍວ່າ ຜູ້ເສຍຊີວິດທຸກຄົນແມ່ນເສຍຊີວິດຄາທີ່ ມີຜູ້ໄດ້ຮັບບາດເຈັບອາການສາຫັດທີ່ຖືກນຳສົ່ງໂຮງໝໍ ຂະນະທີ່ມີຜູ້ບາດເຈັບເລັກນ້ອຍ ໄດ້ຮັບການປິ່ນປົວໃນບ່ອນເກີດເຫດ 14 ຄົນ.
ເຊິ່ງເຫດການຮຸນແຮງຈົນໜ່ວຍ ສຸກເສີນປະກາດໃຫ້ເປັນອຸບັດເຫດຄັ້ງໃຫຍ່ ມີເຮລິຄອບເຕີຫຼາຍລຳ ຖືກສົ່ງໄປທີ່ເກີດເຫດ ດ້ານໂຄສົກຕຳຫຼວດເມືອງ ລະບຸວ່າ ຜູ້ເສຍຊີວິດແລະບາດເຈັບຢູ່ເທິງຖະໜົນ ແລະບໍ່ມີຜູ້ຄົນໃນງານແອໂຊໄດ້ຮັບບາດເຈັບ ໂດຍເຈົ້າໜ້າທີ່ຂອງສຳນັກງານ ສືບສວນອຸບັດເຫດທາງອາກາດໄດ້ລົງພື້ນທີ່ ເພື່ອເກັບກຳພາບຫຼືວິດີໂອໃນເວລາ ທີ່ເກີດເຫດແທ້ໆ ທີ່ຜູ້ຢູ່ໃນເຫດການອາດຈະບັນທຶກໄດ້.