ລັດຖະບານແຫ່ງ (UK) ກຽມທົດສອບເທກໂນໂລຍີຖະໜົນທີ່ສາມາດຊາລ໌ໄຟລົດໄຟຟ້າໄດ້ຂະນະທີ່ກຳລັງແລ່ນຢູ່ ເພື່ອບໍ່ໃຫ້ຜູ້ຂັບຂີ່ລົດໄຟຟ້າຕ້ອງມາຄອຍຖ້າຊາລ໌ໄຟເລື້ອຍໆ
ໂດຍສ່ວນໃຫຍ່ແລ້ວ ຜູ້ຂັບຂີ່ລົດໄຟຟ້າມັກຈະຕ້ອງຊາລ໌ໄຟທີ່ເຮືອນ ຫລືຕາມສະຖານີທີ່ສາມາດຊາລ໌ໄຟໄດ້ ຊຶ່ງບໍ່ສະດວກສະບາຍປານໃດສຳລັບການເດິນທາງໄກໆ ດ້ວຍເຫດນີ້ລັດຖະບານ UK ຈຶ່ງໄດ້ຄິດສ້າງຖະໜົນສຳລັບຊາລ໌ໄຟໄດ້ອັດຕະໂນມັດຂຶ້ນມາ ໂດຍໃຊ້ເທກໂນໂລຍີການນຳແມ່ເຫລັກ (Magnetic Induction) ຊຶ່ງຄ້າຍກັບການຊາລ໌ໂທລະສັບແບບໄຮ້ສາຍນັ້ນເອງ
ໂຄງການທົດສອບຖະໜົນຊາລ໌ໄຟໄດ້ນີ້ຈະເລີ່ມໃນຊ່ວງປາຍປີນີ້ ໂດຍວິສະວະກອນຈະທຳການຕິດຕັ້ງອຸປະກອນໄວ້ໃຕ້ຖະໜົນ ສຳລັບສົ່ງຄື້ນແມ່ເຫລັກໄຟຟ້າໄປຍັງຕົວຮັບໃນລົດ ແລະແປງມາເປັນກະແສໄຟ ຊຶ່ງການທົດສອບນີ້ຈະທົດສອບໃນສະຖານທີ່ສະເພາະ ບໍ່ເປີດໃຫ້ຜູ້ຂັບຂີ່ທົ່ວໄປເຂົ້າຮ່ວມການທົດສອບ
ນອກເໜືອຈາກຖະໜົນໄຮເທກນີ້ແລ້ວ ລັດຖະບານ UK ກໍກຽມຈະເພີ່ມຈຳນວນສະຖານີຊາລ໌ໄຟສຳລັບລົດໄຟຟ້າໃຫ້ຫລາຍຂຶ້ນ ໂດຍໃຫ້ມີຄອບຄຸມທຸກໆ 32 ກິໂລແມັດ
ຖ້າຫາກໂຄງການນີ້ປະສົບຜົນສຳເລັດໄປໄດ້ດ້ວຍດີ ອະນາຄົດເຮົາກໍຄືຊິໄດ້ເຫັນການໃຊ້ລົດໄຟຟ້າຫລາຍຂຶ້ນ ແລະບໍ່ແນ່ວ່າອາດຈະມາແທນທີ່ລົດທີ່ຕ້ອງໃຊ້ນ້ຳມັນໄດ້ຢ່າງສົມບູນ