ຂປລ. ພິທີມອບ–ຮັບໜ້າທີ່ ລະຫວ່າງ ທ່ານ ໄຊສີ ສັນຕິວົງ ກຳມະການສູນກາງພັກ, ເລຂາຄະນະພັກ, ລັດຖະມົນຕີວ່າການ ກະຊວງພາຍໃນ (ຜູ້ເກົ່າ) ເຊິ່ງຈະໄດ້ໄປ ຮັບໜ້າທີ່ໃໝ່ ຢູ່ຄະນະຈັດຕັ້ງສູນກາງພັກ ແລະ ທ່ານ ຄຳໝັ້ນ ສູນວິເລີດ ກຳມະການສູນກາງພັກ, ເລຂາຄະນະພັກ, ລັດຖະມົນຕີວ່າການ ກະຊວງພາຍໃນ (ຜູ້ໃໝ່) ໄດ້ຈັດຂຶ້ນ ໃນວັນທີ 17 ສິງຫາ 2015 ທີ່ກະຊວງດັ່ງກ່າວ ໂດຍມີ ທ່ານ ອາຊາງ ລາວລີ ກຳມະການ ກົມການເມືອງ ສູນກາງພັກ, ຮອງນາ ຍົກລັດຖະມົນຕີ, ຜູ້ຊີ້ນຳຂົງເຂດວຽກງານ ການປົກຄອງ, ມີບັນດາລັດຖະມົນຕີ ຊ່ວຍວ່າການ, ຄະນະພັກ, ຫົວໜ້າກົມ–ຮອງກົມ, ຫົວໜ້າພະແນກ–ຮອງພະແນກ ຕະຫລອດຮອດ ພະນັກງານ–ລັດຖະກອນ ພາຍໃນກະຊວງ ເຂົ້າຮ່ວມ.
ເພື່ອສືບຕໍ່ຊີ້ນຳນຳພາ ແລະ ຄຸ້ມຄອງບໍລິຫານ ວຽກງານຂອງ ກະຊວງພາຍໃນ ກໍຄື ຂະແໜງພາຍໃນ ໃນທົ່ວປະເທດ ທີ່ການຈັດຕັ້ງພັກ–ລັດຖະບານ ມອບໝາຍໃຫ້ ທັງປະຕິບັດພາລະບົດບາດ, ໜ້າທີ່ ແລະ ຂອບເຂດສິດ ຂອງກະຊວງພາຍໃນ ໃຫ້ປະສົບຜົນສຳເລັດນັ້ນ, ທ່ານ ອາຊາງ ລາວລີ ໄດ້ໃຫ້ກຽດໂອ້ລົມຕໍ່ພິທີວ່າ: ການມອບ–ຮັບໜ້າທີ່ ລະຫວ່າງ ລັດຖະມົນຕີວ່າການກະຊວງພາຍໃນ ຜູ້ເກົ່າ ແລະ ຜູ້ໃໝ່ໃນຄັ້ງນີ້ ແມ່ນມີຄວາມສຳຄັນເປັນຢ່າງຍິ່ງ ເພາະເປັນໄລຍະທ້າຍສະໄໝ ຂອງການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄື ແຜນພັດທະນາເສດຖະກິດ–ສັງຄົມ 5 ປີ ຄັ້ງທີ VII ທີ່ລັດຖະມົນຕີວ່າການຜູ້ໃໝ່ ຈະໄດ້ສືບຕໍ່ນຳພາ, ຜັນຂະຫຍາຍເນື້ອໃນຈິດໃຈດັ່ງກ່າວ ໃຫ້ປາກົດຜົນເປັນຈິງ.
ໄປພ້ອມໆກັນນີ້, ທ່ານລັດຖະມົນຕີວ່າການຜູ້ໃໝ່ ຕ້ອງໄດ້ເອົາໃຈໃສ່ນຳພາ ເຕົ້າໂຮມຄວາມສາມັກຄີ ໃນໝູ່ຄະນະ, ຄວາມສາມັກຄີພາຍໃນ ພະນັກງານ–ລັດຖະກອນ ໃຫ້ແໜ້ນແຟ້ນ; ເອົາໃຈໃສ່ສຶກສາອົບຮົມ ການເມືອງແນວຄິດ ພະນັກງານການນຳທຸກຂັ້ນ ລວມທັງພະນັກງານ–ລັດຖະກອນ ທົ່ວກະຊວງ ໃຫ້ມີທັດສະນະຫລັກໝັ້ນ ການເມືອງໜັກແໜ້ນ, ບໍລິການຮັບໃຊ້ປະຊາຊົນ ດ້ວຍຄວາມໂປ່ງໃສ, ວ່ອງໄວ; ສ້າງໃຫ້ພະນັກງານ ມີສະຕິເຄົາລົບລະບຽບ-ກົດໝາຍ, ມີສະຕິຕໍ່ການຈັດຕັ້ງ; ເພີ່ມທະວີຄວາມຮັບຜິດຊອບ ຕໍ່ການນຳພາວຽກງານພະນັກງານ ນັບແຕ່ຂອດການສ້າງແຜນກຳນົດ ພະນັກງານ, ການບັນຈຸຊັບຊ້ອນ, ນຳ ໃຊ້, ປະຕິບັດນະໂຍບາຍ, ປະຕິບັດວິໄນ ແລະ ແກ້ໄຂປາກົດການຫຍໍ້ທໍ້ຕ່າງໆ ທີ່ເກີດຂຶ້ນກັບ ສະມາຊິກພັກ-ພະນັກງານ ໃນຂົງເຂດທີ່ຕົນຮັບຜິດຊອບ ແລະ ອື່ນໆ ລວມທັງການພົວພັນຮ່ວມມື ກັບຕ່າງປະເທດ ກໍຄື ບັນດາປະເທດໃນກຸ່ມອາຊຽນ ແລະ ປະເທດອື່ນໆ ເພື່ອຍາດແຍ່ງເອົາບົດຮຽນ ແລະ ການຊ່ວຍເຫລືອເຂົ້າໃນ ການຍົກລະດັບວຽກງານ ວິຊາສະເພາະຂອງຕົນ.
ຂອບໃຈຂ່າວຈາກ:
