ສຳນັກຂ່າວຕ່າງປະເທດ ລາຍງານໃນວັນທີ 14 ສິງຫານີ້ວ່າ ທາງການຈີນໄດ້ສົ່ງທີມຊ່ຽວຊານທາງເຄມີ ແລະ ນິວເຄລຍຂອງກອງທັບ ຈຳນວນ 217 ຄົນ ເຂົ້າສູ່ພື້ນທີ່ສາງເກັບວັດຖຸເຄມີ ແລະ ສານອັນຕະລາຍ ທີ່ເກີດເຫດລະເບີດຂຶ້ນຢູ່ບໍລິເວນທ່່າເຮືອຂອງນະຄອນທຽນຈິນ ຊຶ່ງໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍ 50 ຄົນ ແລະ ບາດເຈັບອີກປະມານ 700 ຄົນ ພ້ອມທັງສິ່ງປຸກສ້າງ, ຕູ້ສິນຄ້າ ແລະ ພາຫະນະຖືກເສຍຫາຍເປັນຈຳນວນຫລວງຫລາຍ.
ທັງນີ້ ເຫດລະເບີດດັ່ງກ່າວ ແມ່ນເກີດຂຶ້ນໃນເວລາ 23:30 ຂອງວັນທີ 12 ສິງຫາ ຢູ່ສາງແຫ່ງໜຶ່ງທີ່ເກັບວັດຖຸເຄມີ ແລະ ສານອັນຕະລາຍໄວ້ ໃນເຂດນິຄົມອຸດສາຫະກຳບໍລິເວນທ່າເຮືອຂອງເມືອງທຽນຈິນ ໂດຍພາຍໃນບໍລິເວນດັ່ງກ່າວ ແມ່ນປະກອບມີໂຮງງານຜະລິດລົດໃຫຍ່, ໂຮງງານປະກອບເຮືອບິນ, ໂຮງກັ່ນນ້ຳມັນເຊື້ອໄຟ ແລະ ອື່ນໆ.
ພາຍຫລັງເກີດເຫດ ເຈົ້າໜ້າທີ່ດັບເພີງກ່ວາ 1,000 ຄົນ ແລະ ລົດດັບເພີງອີກ 143 ຄັນ ໄດ້ຖືກສົ່ງໄປສະຖານທີ່ເກີດເຫດ ໂດຍເຈົ້າໜ້າທີ່ສາມາດຄວບຄຸມໄຟໄວ້ໄດ້ ໃນຕອນບ່າຍຂອງມື້ຕໍ່ມາ ໃນຂະນະທີ່ຈຳນວນຜູ້ເສຍຊີວິດ 50 ຄົນນັ້ນ ແມ່ນລວມມີພະນັກງານດັບເພີງຢູ່ນຳເຖິງ 12 ຄົນ.
