ຂປລ. ໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 65 ປີ (13 ສິງຫາ 2015) ນີ້, ທ່ານ ສຈ.ດຣ ບໍ່ແສງຄໍາ ວົງດາລາ ລັດຖະມົນຕີວ່າການ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ມີຄໍາເຫັນດັ່ງນີ້: ເພື່ອແນໃສ່ສະໜອງຂໍ້ມູນຂ່າວສານ ທີ່ມີຄຸນຄ່າສ່ອງແສງ ໄດ້ທຸກເຫດການທີ່ເກີດຂຶ້ນຢູ່ ສປປ ລາວ ແລະ ສາກົນ ລວມທັງການເຜີຍແຜ່ ວັດທະນະທໍາອັນດີງາມຂອງຊາດ, ຊົນເຜົ່າໃຫ້ແກ່ ພັກ-ລັດ ແລະ ປວງຊົນລາວທັງຊາດ ໃນຕໍ່ໜ້ານີ້ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ເວົ້າສະເພາະ ກໍຄືການນໍາກະຊວງ ຖວທ ຈະສືບຕໍ່ພັດທະນາ ວຽກງານສື່ມວນຊົນລາວ ຫລາຍຢ່າງດ້ວຍກັນ ທັງນີ້ກໍເພື່ອເຮັດໃຫ້ ວຽກງານດັ່ງກ່າວ ມີຄຸນນະພາບ, ເປັນລະບົບທັນສະໄໝ, ວ່ອງໄວ, ຊັດເຈນ, ທັນເຫດການ ແລະ ສາມາດເຂົ້າເຖິງໄດ້ທຸກພື້ນທີ່ ໃນທົ່ວປະເທດ.
ພ້ອມດຽວກັນນີ້ ຈະສືບຕໍ່ພັດທະນາສື່ມວນຊົນລາວ ມີທາງເລືອກຫລາຍສີຫລາຍສັນ ຄົບ ຖວ້ນດ້ານເນື້ອໃນ, ເປັນກະບອກສຽງ ເຜີຍແຜ່ແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ, ທັງເປັນແຫລ່ງສະໜອງ ຂໍ້ມູນຂ່າວສານ, ການບັນເທິງ ແລະ ສາລະ ຄວາມຮູ້ຢ່າງຮອບດ້ານ ໃຫ້ແກ່ປະຊາຊົນ ບັນດາເຜົ່າທຸກຊັ້ນຄົນ, ສ້າງຄວາມເຂັ້ມແຂງ ແລະ ເງື່ອນໄຂ ໃນການພັດທະນາກິດຈະກໍາ ຈາກສື່ມວນຊົນໃຫ້ມີ ຄວາມຫລາກຫລາຍ, ຕອບສະໜອງໄດ້ ຕາມຄວາມຕ້ອງການຂອງສັງຄົມ, ພ້ອມທັງ ສ້າງລາຍຮັບວິຊາການ ແລະ ສາມາດກຸ້ມຕົນເອງ ທາງດ້ານການເງິນເທື່ອລະກ້າວ.
ນອກນັ້ນ, ຍັງ ຈະຊຸກຍູ້ການຮ່ວມມື ລະຫວ່າງພາກລັດ ແລະ ເອກະຊົນ, ການຮ່ວມມືກັບຕ່າງປະເທດ ໃນການສົ່ງເສີມການລົງທຶນ ໃນວຽກງານຖະແຫລງຂ່າວ ໃຫ້ກວ້າງຂວາງ, ຂະຫຍາຍຂອບເຂດ ການພົວພັນເຊື່ອມໂຍງກັບ ເວທີສື່ມວນຊົນສາກົນ ໃຫ້ນັບມື້ກວ້າງຂວາງ ຮັບປະກັນຄວາມຖືກຕ້ອງຊັດເຈນ ແລະ ຄວາມອຸດົມສົມບູນ ທາງດ້ານຂໍ້ມູນຂ່າວສານ, ພັດທະນາບຸກຄະລາກອນ ໃນຂະແໜງຖະແຫລງຂ່າວ ໃຫ້ໄດ້ທັງປະລິມານ ແລະ ຄຸນນະພາບ ໂດຍສະເພາະແມ່ນ ການສົ່ງເສີມບຸກຄະລາກອນໜຸ່ມ ໃຫ້ມີຄຸນທາດທາງດ້ານການເມືອງ ໜັກແໜ້ນ ແລະ ຄວາມຮູ້ຄວາມສາມາດ ດ້ານສື່ມວນຊົນທີ່ກ້າວໜ້າ ສົມຄູ່ກັບຍຸກສະໄໝ. ປັບປຸງ ແລະ ສ້າງບັນດານິຕິກໍາ ທາງດ້ານວຽກງານຖະແຫລງຂ່າວ ໃຫ້ຄົບຖ້ວນ ເຮັດໃຫ້ການຄຸ້ມຄອງຂະແໜງການ ມີຄວາມເຂັ້ມແຂງ ແລະ ຮັດກຸມ, ພ້ອມທັງຫັນການຄຸ້ມຄອງ ສື່ມວນຊົນໃຫ້ເປັນທັນສະໄໝ, ສໍາລັບວຽກງານການພິມ ກໍຈະສືບຕໍ່ພັດທະນາໃຫ້ດີຂຶ້ນເປັນກ້າວໆ ພ້ອມທາງດ້ານຄຸນນະພາບ.
ຂອບໃຈຂ່າວຈາກ:
