ສຳນັກຂ່າວຕ່າງປະເທດ ລາຍງານໃນວັນທີ 12 ສິງຫານີ້ວ່າ ກຸ່ມຍາດພີ່ນ້ອງຜູ້ໂດຍສາຍ MH370 ໄດ້ປະກາດບໍ່ຍອມຮັບຄຳຢືນຢັນຂອງລັດຖະບານມາເລເຊຍ ທີ່ເວົ້າວ່າເສດຊາກປີກເຮືອບິນທີ່ພົບເທິງຫາດຊາຍເກາະເຣອູນິຢົງ ແມ່ນເປັນຊິ້ນສ່ວນມາຈາກເຮືອບິນ MH370 ທີ່ສູນຫາຍໄປເມື່ອປີກາຍນີ້ ໂດຍກຸ່ມດັ່ງກ່າວຮຽກຮ້ອງໃຫ້ຜູ້ຊ່ຽວຊານທີ່ເປັນກາງ ດຳເນີນການພິສູດໃຫ້ຊັດເຈນເສຍກ່ອນ.
ການເຄື່ອນໄຫວດັ່ງກ່າວເກີດຂຶ້ນ ພາຍຫລັງນາຍົກລັດຖະມົນຕີ ນາຈິບ ຣາຊັກ ແຫ່ງມາເລເຊຍ ໄດ້ອອກມາຖະແຫລງຂ່າວໃນວັນພະຫັດທີ 6 ສິງຫາວ່າ ຊິ້ນສ່ວນທີ່ພົບຢູ່ເກາະເຣອູນິຢົງ ແມ່ນໄດ້ຮັບການຢືນຢັນຈາກຜູ້ຊ່ຽວຊານຝຣັ່ງ ວ່າແມ່ນຂອງ MH370 ຢ່າງແນ່ນອນ ແລະ ຖືເປັນຫລັກຖານທຳອິດທີ່ຢັ້ງຢືນວ່າ ເຮືອບິນລຳດັ່ງກ່າວພົບກັບຈຸດຈົບຢູ່ກາງທະເລ.
ແນວໃດກໍຕາມ ກຸ່ມຍາດພີ່ນ້ອງຂອງຜູ້ເຄາະຮ້າຍ ໄດ້ກ່າວວ່າ ເປັນເວລາຜ່ານມາເຖິງ 1 ອາທິດແລ້ວ ຫລັງຈາກນາຍົກມາເລເຊຍຢືນຢັນ ແຕ່ກໍຍັງບໍ່ທັນມີຜູ້ຊ່ຽວຊານຄົນໃດ ອອກມາສະຫລຸບໃຫ້ຈະແຈ້ງຄືນາຍົກມາເລເຊຍເວົ້າຈັກຄົນ ແລະ ຍາດພີ່ນ້ອງໂດຍສ່ວນໃຫຍ່ ແມ່ນບໍ່ເຊື່ອຄຳຢືນຢັນຂອງລັດຖະບານມາເລເຊຍ ໂດຍພວກເຂົາຕ້ອງການຜົນການວິເຄາະທີ່ຊັດເຈນ ແລະ ແນ່ນອນເທົ່ານັ້ນ.
ທັງນີ້ ລັດຖະບານມາເລເຊຍ ແລະ ສາຍການບິນມາເລເຊຍແອຣ໌ລາຍ ໄດ້ຖືກວິພາກວິຈານມາໂດຍຕະຫລອດ ພາຍຫລັງເກີດໂສກນາຕະກຳດັ່ງກ່າວ ວ່າໄຮ້ປະສິດທິພາບ ແລະ ແຈ້ງຄວາມຄືບໜ້າຕ່າງໆຊັກຊ້າ ໂດຍບາງຄັ້ງກໍນຳສະເໜີຂໍ້ມູນທີ່ສັບສົນ ແລະ ຂັດແຍ່ງກັນເອງຫລາຍເທື່ອ.