ທ່ານ ສຳລານ ຫລວງອາໄພ ຮອງຫົວໜ້າກົມມໍລະດົກ ໄດ້ສະເໜີຄວາມເປັນມາ ແລະ ຈຸດປະສົງ ຂອງກອງປະຊຸມ ປັບປຸງຮ່າງເອກະສານແຜນແມ່ບົດ ຄຸ້ມຄອງທົ່ງໄຫຫີນ, ຄຸນຄ່າຂອງຈັກກະວານ ຂອງທົ່ງໄຫຫີນ ແລະ ຂອບເຂດສະຖານທີ່ໄຫຫີນ (ແຜນທີ່) ພ້ອມນີ້ ທ່ານ ວຽງແກ້ວ ສຸກສະຫວັດດີ ຮອງຫົວໜ້າກົມມໍລະດົກ ໄດ້ເປີດເຜີຍວ່າ: ຂະບວນການ ແລະ ການຂຽນຄຳຮ້ອງສະເໜີ ເປັນມໍລະດົກໂລກ ຕໍ່ກັບການກຳນົດຂອບເຂດ, ແຜນການຄຸ້ມຄອງ ແລະ ມາດຖານເງື່ອນໄຂ ແລະ ຍັງໄດ້ປະກອບຄຳຄິດຄຳເຫັນໃສ່ ແຜນແມ່ບົດຄຸ້ມຄອງ ແຫລ່ງມໍລະດົກທົ່ງໄຫຫີນ ເປັນຕົ້ນແມ່ນການກຳນົດ ຂອບເຂດພື້ນທີ່ອະນຸລັກ, ແຜນທີ່, ແຜນການຄຸ້ມຄອງ, ການກະກຽມເອກະສານ ຄຳຮ້ອງເຂົ້າເປັນມໍລະດົກໂລກ ໃນອະນາຄົດ.
ແນວໃດກໍດີ ອະດີດຜ່ານມາ, ສປປ ລາວມີ 2 ແຫ່ງໄດ້ຮັບຮອງເປັນແຫລ່ງ ມໍລະດົກໂລກຈາກອົງການ ອຸຍເນັສໂກ (UNESCO) ຄື: ແຫລ່ງມໍລະດົກໂລກ ແຂວງຫລວງພະບາງ ແລະ ວັດພູຈໍາປາສັກ, ເຊິ່ງທັງສອງແຫລ່ງມໍລະດົກນີ້ ໄດ້ກາຍເປັນສ່ວນສໍາຄັນ ໃນການດຶງດູດນັກທ່ອງທ່ຽວ ເຂົ້າມາຢ້ຽມຢາມ ແລະ ທ່ອງທ່ຽວ ສປປ ລາວ ເພີ່ມຂຶ້ນຢ່າງຕໍ່ເນື່ອງ ແລະ ຄາດວ່າພາຍໃນປີ 2016 ນີ້ນັກທ່ອງທ່ຽວຕ່າງປະເທດ ຈະ ເຂົ້າມາຢ້ຽມລາວເພີ່ມຂຶ້ນເຖິງ 4 ລ້ານກວ່າຄົນ ເຊິ່ງຈະເປັນການປະກອບສ່ວນສໍາຄັນ ເຂົ້າໃນການພັດທະນາ ເສດຖະກິດ-ສັງຄົມ, ສ້າງວຽກເຮັດງານທໍາ ໃຫ້ຄົນລາວເພີ່ມຂຶ້ນເຊັ່ນກັນ ແລະ ເມື່ອບໍ່ດົນມານີ້, ສປປ ລາວ ໄດ້ເຊັນສັນຍາຮ່ວມມື ເປີດສາຍການບິນ ລະຫວ່າງປະເທດກັບ ສ ເກົາ ຫລີ ແລະ ຍີ່ປຸ່ນ ອັນໄດ້ເຮັດໃຫ້ນັກທ່ອງທ່ຽວ ເຂົ້າມາທ່ອງທ່ຽວ ສປປ ລາວ ຫລາຍເພີ່ມຂຶ້ນກວ່າ 1 ແສນຄົນ.
