ຂປລ. ຕາມຂ່າວສານຫວຽດນາມ, ວັນທີ 10 ເດືອນສິງຫາ, ເຈົ້າໜ້າທ່ີ ອົງການສະຖິຕິຣັດເຊຍ ໃຫ້ຮູ້ວ່າ ໃນໄຕມາດ 2 ເສດຖະກິດ ຣັດເຊຍ ຊຸດໂຊມລົງ ຂະນະດຽວກັນນັ້ນ ລວມຜະລິດ ຕະພັນພາຍໃນ(GDP) ຫລຸດລົງ 4,6% ເມື່ອທຽບໃສ່ ໄລຍະດຽວກັນ ໃນປີກາຍ ຍ້ອນໄດ້ ຮັບຜົນກະທົບຈາກ ສະພາບ ລາຄານ້ຳມັນ ຫລຸດລົງ ແລະ ມາດຕະການ ລົງໂທດ ເສດຖະກິດ ຂອງຝ່າຍຕາເວັນຕົກ. ນີ້ຖືວ່າເປັນ ການຫລຸດລົງ ຢ່າງຫລວງຫລາຍ ນັບແຕ່ປີ 2009.
ບັນດາ ເຈົ້າໜ້າທ່ີ ຣັດເຊຍ ກ່າວວ່າ ວິກິດການ ເສດຖະກິດ ປະເທດນີ້ ໄດ້ຫລຸດລົງ ຕ່ຳສຸດ. ເຖິງແມ່ນວ່າ ລາຄາ ນ້ຳມັນ ໃນໂລກ ສືບຕໍ່ຫລຸດລົງ ເປັນເວລາ ດົນນານ ສົ່ງຜົນກະທົບຕໍ່ ມູນຄ່າສະກຸນເງິນຣຸບ ຂອງຣັດເຊຍ ໃນຊຸມເດືອນ ຜ່ານມາ. ກອງທຶນ ເງິນຕາ ສາກົນ(IMF) ລາຍງານວ່າ, ບັນດາ ມາດຕະການ ລົງໂທດ ຂອງຝ່າຍ ຕາເວັນຕົກຕໍ່ ຣັເຊຍ ມີສ່ວນ ກ່ຽວຂ້ອງເຖິງ ວິກິດການ ຢູ່ອູແກຣນ ອາດຈະສ້າງ ຜົນເສຍຫາຍ ເຖິງ 9% GDP ຂອງຣັດເຊຍ.
ນອກຈາກນັ້ນ, IMF ຄາດຄະເນວ່າ GDP ຂອງຣັດເຊຍ ຈະເພີ່ມຂຶ້ນ 0,2% ໃນປິ 2016 ພາຍຫລັງ ຫລຸດລົງ 3,4% ໃນປີນີ້. ຄາດວ່າ ອັດຕາເງິນເຟີ້ ຂອງຣັດເຊຍ ໃນທ້າຍປີນີ້ ຈະຢູ່ໃນ ລະດັບ 12% ແລະ ຈະຫລຸດລົງເຫລືອ 8% ໃນທ້າຍປີໜ້າ.
ຂອບໃຈຂ່າວຈາກ:
