ຂປລ. ກະຊວງການຕ່າງປະເທດ ໄດ້ເປີດບັ້ນດຳເນີນຊີວິດການເມືອງ ປັບປຸງປົວແປງພັກ ແລະ ທາບທາມບຸກຄະລາກອນ ທີ່ຈະລົງສະໝັກເລືອກຕັ້ງ ເປັນຄະນະພັກ ກະຊວງຊຸດໃໝ່ ຮອບທີ 2 ມີຂຶ້ນໃນວັນທີ 10 ສິງຫາ 2015 ນີ້, ພາຍໃຕ້ການເປັນປະທານຂອງ ທ່ານ ສະເຫລີມໄຊ ກົມມະສິດ ກຳມະການຄະນະພັກ, ລັດຖະມົນຕີຊ່ວຍວ່າການກະຊວງການຕ່າງປະເທດ, ມີບັນດາຄະນະພັກ, ຄະນະນຳກະຊວງການຕ່າງປະເທດ ພ້ອມດ້ວຍຜູ້ແທນສົມບູນ, ຜູ້ແທນສຳຮອງ ແລະ ພະນັກງານອາວຸໂສ ເຂົ້າຮ່ວມ 222 ສະຫາຍ. ໂດຍກອງປະຊຸມຄັ້ງນີ້ ຈະດຳເນີນໄປຈົນເຖິງວັນທີ 13 ສິງຫາ 2015 ຈຶ່ງຈະສຳເລັດ.
ການ ເປີດບັ້ນດຳເນີນ ຊີວິດການເມືອງ ປັບປຸງປົວແປງພັກ ແລະ ທາບທາມ ບຸກຄະລາກອນໃນຄັ້ງນີ້ ໄດ້ມີການເຜີຍແຜ່ບັນດາ ເອກະສານສຳຄັນເຊັ່ນ: ຂໍ້ກຳນົດຂອງກົມ ການເມືອງສູນກາງພັກ ສະບັບເລກທີ 03/ຄລສພ, ຄຳສັ່ງແນະນຳເພີ່ມເຕີມ ຂອງຄະນະເລຂາທິການ ສູນກາງພັກ ເລກທີ 01/ຄລສພ ແລະ ເອກະສານບົດຝຶກຝົນ ຄຸນທາດການເມືອງ ແລະ ຄຸນສົມບັດສິນທຳປະຕິວັດ, ເອກະສານປັບປຸງແບບແຜນເຮັດວຽກ ແລະ ຍົກສູງຄວາມສາມາດ ນຳພາຂອງພັກຂັ້ນຕ່າງໆ; ເຊື່ອມຊຶມກຳແໜ້ນ ມາດຕະຖານຄະນະພັກ, ສະມາຊິກພັກ, ຂໍ້ຫ້າມສະມາຊິກພັກ, ຄວາມຮັບຜິດຊອບຂອງ ພະນັກງານນຳພາ-ຄຸ້ມຄອງ. ນອກນັ້ນຍັງໄດ້ຜ່ານ ຮ່າງບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງການຕ່າງປະເທດ ແລະ ບົດສຳຫລວດການນຳພາລວມ ຂອງຄະນະພັກຊຸດເກົ່າ, ໂດຍການຈັດແບ່ງກຸ່ມຄົ້ນຄວ້າ ເພື່ອໃຫ້ເນື້ອໃນເອກະສານ ຄົບຖ້ວນສົມບູນຂຶ້ນຕື່ມ, ພ້ອມນັ້ນ ກໍໄດ້ຜ່ານບົດສຳຫລວດ ບຸກຄົນຄະນະພັກ ແລະ ສະມາຊິກພັກ.
ພາຍຫລັງ ເຊື່ອມຊຶມ ເອກະສານແລ້ວ ກໍໄດ້ດຳເນີນການທາບທາມ ບຸກຄະລາກອນຮອບທີ 2 ເພື່ອຄັດເລືອກເອົາ ບຸກຄະລາກອນທີ່ຈະລົງສະໝັກ ເຂົ້າເປັນຄະນະພັກຊຸກໃໝ່.
ຂອບໃຈຂ່າວຈາກ:
