ສຳນັກຂ່າວຕ່າງປະເທດ ລາຍງານໃນວັນທີ 10 ສິງຫານີ້ວ່າ ທ່ານ ເຊີເກ ລາບຣອບ ລັດຖະມົນຕີວ່າການກະຊວງການຕ່າງປະເທດຣັດເຊຍ ໄດ້ອອກມາລະບຸວ່າ ສະຫະລັດອາເມຣິກາບໍ່ມີທາງເລືອກອື່ນໃດ ນອກເໜືອຈາກຕ້ອງຮ່ວມມືກັບລັດຖະບານຊີຣີ ພາຍໃຕ້ການນຳຂອງປະທານາທິບໍດີ ບາຊາ ອັນ-ອັດຊາດ ຫາກຫວັງຢາກປະສົບຜົນສຳເລັດໃນການກວາດລ້າງກຸ່ມລັດອິດສະລາມ ຫລື ໄອເອັສ ເນື່ອງຈາກຈຳເປັນຕ້ອງມີຈຸດຢືນຮ່ວມກັນ ແລະ ຕ້ອງເຂົ້າໃຈວ່າ ພວກເຂົາມີກຸ່ມໄອເອັສ ເປັນສັດຕູຮ່ວມກັນ.
ທ່ານ ເຊີເກ ໄດ້ເວົ້າວ່າ ທີ່ຜ່ານມາລັດຖະບານອາເມຣິກາ ແລະ ອີກຫລາຍປະເທດໃນພາກພື້ນແຫ່ງນີ້ ຍັງຄົງເລືອກທີ່ຈະປະຕິເສດລັດຖະບານຂອງທ່ານອັດຊາດ ພວກເຂົາບໍ່ຍອມຮັບອັດຊາດເປັນຮຸ້ນສ່ວນ ຊຶ່ງຖືເປັນເລື່ອງທີ່ແປກ ເພາະໃນຄວາມເປັນຈິງແລ້ວ ພວກເຂົາຕ່າງກໍມີສັດຕູຮ່ວມກັນ ຄື ກຸ່ມໄອເອັສ.