ສຳນັກຂ່າວຕ່າງປະເທດລາຍງານວ່າ ໃນວັນອາທິດທີ 9 ສິງຫາຜ່ານມານີ້ ພາຍຸໄຕ້ຝຸ່ນເຊົາເດໂລ ໄດ້ຫລຸດຄວາມແຮງລົງກາຍເປັນພາຍຸເຂດຮ້ອນ ຫລັງຈາກທີ່ເຄື່ອນຈາກເກາະໄຕ້ຫວັນຂຶ້ນສູ່ຝັ່ງແຂວງຝູຈ້ຽນ ທາງພາກຕາເວັນອອກຂອງຈີນ ດ້ວຍຄວາມໄວລົມຈາກສູນກາງພາຍຸປະມານ 230 ກິໂລແມັດຕໍ່ຊົ່ວໂມງ ໄດ້ສົ່ງຜົນເຮັດໃຫ້ເກີດມີຝົນຕົກໜັກໃນພື້ນທີ່ແຂວງເຈີ້ຈຽງ ວັດແທກປະລິມານນ້ຳຝົນໄດ້ເຖິງ 645 ມິນລີແມັດ ຕະຫລອດ 24 ຊົ່ວໂມງ ຊຶ່ງຖືເປັນພາວະຝົນຕົກໜັກຫລາຍທີ່ສຸດໃນຮອບ 100ປີ.
ພາຍຸຫົວດັ່ງກ່າວນີ້ ໄດ້ສ້າງຄວາມເສຍຫາຍໃຫ້ແກ່ເສດຖະກິດຈີນແລ້ວປະມານ 40 ລ້ານໂດລາ ແລະ ມີຜູ້ເສຍຊີວິດຢ່າງໜ້ອຍ 12 ຄົນ ໂດຍທາງການຈີນໄດ້ລະດົມກຳລັງທະຫານ 7,000 ກ່ວາຄົນ ເພື່ອຊ່ວຍເຫລືອປະຊາຊົນຢ່າງຮີບດ່ວນ.