ສຳນັກຂ່າວຕ່າງປະເທດ ລາຍງານໃນວັນທີ 7 ສິງຫານີ້ວ່າ ທາງການຊາອຸດິອາຣະເບຍ ໄດ້ປະຫານຊີວິດນັກໂທດ 4 ຄົນ ໃນມື້ວັນພຸດທີ 5 ສິງຫາຜ່ານມາ ໂດຍໃນນັ້ນແມ່ນເປັນຊາວເອທິໂອປີ 2 ຄົນ ຖືກປະຫານຈາກຄະດີຄາດຕະກຳ ແລະ ປຸ້ນຊັບ, ປະຫານຊີວິດຊາວຊາອຸດິອາຣະເບຍເອງ 1 ຄົນ ໃນຄວາມຜິດຖານຄາດຕະກຳເຊັ່ນດຽວກັນ ແລະ ອີກຜູ້ໜຶ່ງແມ່ນເປັນຊາວປາກິດສະຖານ ໃນຄວາມຜິດຖານລັກລອບຂົນເຮໂຣອີນເຂົ້າມາໃນປະເທດ.

ແຫລ່ງຂ່າວໄດ້ລະບຸວ່າ ທັງ 4 ຄົນ ແມ່ນຖືກປະຫານດ້ວຍວິທີການຕັດຄໍຕໍ່ໜ້າສາທາລະນະ ຊຶ່ງນັບຕັ້ງແຕ່ປີ 2015 ທາງການຊາອຸດິອາຣະເບຍ ໄດ້ປະຫານຊີວິດນັກໂທດໄປແລ້ວເຖິງ 144 ຄົນ ໂດຍຖືເປັນຕົວເລກທີ່ສູງກ່ວາສະຖິຕິຂອງໝົດປີ 2014 ທີ່ຜ່ານມາ ຊຶ່ງມີທັງໝົດຢູ່ 87 ຄົນ.