ຫົວໜ້າທີ່ລູກນ້ອງບໍ່ມັກ
ມີໝູ່ຜູ້ໜຶ່ງເປັນຄົນຮັກສິລະປະ ເປັນນັກອອກແບບສື່ສິ່ງພິມລະດັບແຖວໜ້າ ຂອງລາວກໍວ່າໄດ້ ລາວເລົ່າວ່າເຄີຍເຮັດວຽກກັບບໍລິສັດແຫ່ງໜຶ່ງ ເປັນເວລາຫຼາຍປີ ແຕ່ສຸດທ້າຍລາວກໍລາອອກ ຍ້ອນບໍ່ມັກນິໄສຂອງຫົວໜ້າ. ລາວເວົ້າວ່າເລື່ອງເງິນເດືອນມີຄວາມສຳຄັນ ແຕ່ທີ່ສຳຄັນກວ່ານັ້ນຄື ບັນຍາກາດຂອງການເຮັດວຽກ ລາວມັກເປັນລະບົບລະບຽບ ຮູ້ຈັກກາລະເທສະ ມີໜັກມີເບົາ ມີກົດດັນແລ້ວກໍມີຜ່ອນຄາຍ. ລາວເວົ້າຕື່ມວ່າ ນິດໄສຫົວໜ້າທີ່ຄິດວ່າ ມີເງິນແຕ່ຈະບໍ່ມີພະນັກງານເກັ່ງໆ ໄວ້ເຮັດວຽກ ມີດັ່ງນີ້:
1. ບໍ່ຮັກລູກນ້ອງ
ແນ່ນອນວ່າເຖິງຈະເປັນລູກຈ້າງ ເຮັດວຽກເພື່ອເອົາເງິນເດືອນແຕ່ຄວາມຮັກ ຄວາມອົບອຸ່ນ ຈາກຫົວໜ້າຍັງເປັນສິ່ງທີ່ສຳຄັນຫຼາຍ. ລູກນ້ອງຈະຮູ້ສຶກເສຍໃຈຫຼາຍ ເມື່ອເກີດຄວາມຜິດພາດໃນການປະຕິບັດວຽກ ແລ້ວຫົວໜ້າບໍ່ໄດ້ຍື່ນມືເຂົ້າມາຊ່ວຍ ແມ່ນແຕ່ຄຳແນະນຳຫຼືກຳລັງໃຈກໍບໍ່ມີ ນອກຈາກຈະໂຍນຄວາມຜິດໃຫ້ລູກນ້ອງ ຮ້າຍດ່າລູກນ້ອງແບບບໍ່ໃຫ້ກຽດກັນ. ຖ້າພົບໜ້າແບບນີ້ພຽງຂໍ້ດຽວ ພະນັກງານກໍບໍ່ຢາກຈະຢູ່ນຳແລ້ວ.
2. ບໍ່ເປັນມິດ
ການເຮັດວຽກທີ່ຈະໄປໄດ້ດີຕ້ອງມີຄວາມ ກົມກຽວກັນເປັນທີມ ອັນປະກອບດ້ວຍຫົວໜ້າ ແລະລູກນ້ອງຕາມລຳດັບ ແຕ່ມັນຈະເປັນໄປບໍ່ໄດ້ເລີຍ ຖ້າລູກນ້ອງ ມີຄວາມເກັງກົວ ເກັງໃຈ ຫຼືຢ້ານຫົວໜ້າຈົນເກີນໄປ. ການຖືເນື້ອຖືໂຕວ່າເປັນນາຍຈ້າງແລ້ວ ບໍ່ມາໃກ້ຊິດຕິດແທດກັບລູກນ້ອງ ແຕ່ລະມື້ມີແຕ່ອອກຄຳສັ່ງ ແລ້ວລໍຖ້າຮ້າຍ ເມື່ອເກີດຄວາມຜິດພາດຂຶ້ນກັບວຽກ ຖືມາດວາດຊົງສາຍຕາບໍ່ເຄີຍສົບກັບລູກນ້ອງ ຍ່າງກາຍບໍ່ທັກທາຍ ເຮັດຄືຄົນບໍ່ຮູ້ຈັກ ການເັຮດແບບນີ້ເຮັດໃຫ້ລູກນ້ອງ ບໍ່ກ້າທີ່ຈະໂອ້ລົມເປີດໃຈທຸກຢ່າງໄດ້ ສຸດທ້າຍກໍແຕກໄປຄົນລະທາງ.
3. ບໍ່ຟັງຄວາມເຫັນຂອງລູກນ້ອງເລີຍ
ການທີ່ຫົວໜ້າມີແຕ່ອອກຄຳສັ່ງໃຫ້ລູກນ້ອງ ພຽງແຕ່ຝ່າຍດຽວໂດຍຂາດການປຶກສາຫາລື ເຖິງແມ່ນວ່າມີສິດແລະກໍຖືກຕ້ອງແລ້ວກໍຕາມ ການບໍ່ປຶກສາຖາມຄຳເຫັນກັບລູກນ້ອງ ຈະເປັນການບໍ່ໃຫ້ກຽດ ຄືເບິ່ງລູກນ້ອງບໍ່ມີຫົວຄິດ ຫຼືບໍ່ຮັບຟັງຄຳເຫັນແລະເຫດຜົນຂອງລູກນ້ອງ ກໍເປັນເຫດໜຶ່ງທີ່ເຮັດໃຫ້ລູກນ້ອງບໍ່ກ້າ ທີ່ຈະເວົ້າຄວາມຈິງທີ່ຕ້ອງແກ້ໄຂສູ່ຟັງ ເພາະບາງເທື່ອຫົວໜ້າກໍພາດໄດ້ເຊັ່ນກັນ.
4. ໃຫ້ຄວາມຫວັງແລ້ວບໍ່ປະຕິບັດ
ການທີ່ເວົ້າກັບລູກນ້ອງຄົນໃດຄົນໜຶ່ງວ່າ ຈະໃຫ້ນັ້ນໃຫ້ນີ້ໃຫ້ທີ່ຢູ່ອາໄສຖ້າລູກນ້ອງ ເຮັດວຽກໃຫ້ໄດ້ຕາມທີ່ວາງຄາດໝາຍໄວ້ ເມື່ອລູກນ້ອງເຮັດສຳເລັດແລ້ວກໍບໍ່ໃຫ້ ໂດຍໃຫ້ເຫດຜົນຕ່າງໆນານາ. ການເຮັດແບບນີ້ລູກນ້ອງຈະຮູ້ສຶກຜິດຫວັງ ແລະເບື່ອໜ່າຍຫົວໜ້າໄດ້.
5. ເຮັດວຽກບໍ່ມີກາລະເທສະ
ການເຮັດວຽກໃນແຕ່ລະມື້ຄວນຈະມີເວລາ ເປັນຂອງສ່ວນຕົວຫຼືມຸມສ່ວນຕົວຂອງພະນັກງານ ເຊັ່ນ ເວລາກິນເຂົ້າ, ເວລາເຂົ້າຫ້ອງນ້ຳ, ມີເວລາໄດ້ຍ່າງພັກຜ່ອນ. ການເຮັດວຽກແບບບໍ່ຮູ້ກາລະເທສະຄື ເຖິງເວລາກິນເຂົ້າແລ້ວຫົວໜ້າຍັງໃຊ້ວຽກ, ເຖິງເວລາເລີກວຽກແລ້ວຫົວໜ້າຍັງເອີ້ນປະຊຸມ ຫຼືແມ່ນແຕ່ຕອນນັ່ງຖ່າຍຢູ່ໃນຫ້ອງນ້ຳ ກໍໄປຂໍປະຕູເອີ້ນ ອັນນີ້ລູກນ້ອງຈະເຫັນວ່າໂຄດບໍ່ຮູ້ກາລະເທສະ.
6. ບໍ່ລົງທຶນພັດທະນາບຸກຄະລາກອນ
ຕາມຫຼັກການຂອງການດຳເນີນທຸລະກິດແລ້ວ ແຕ່ລະອົງກອນຄວນຈະຫາເວລາພັດທະນາ ບຸກຄະລາກອນຂອງຕົນໃຫ້ມີຄວາມກ້າວໜ້າ ໂດຍສະເພາະແມ່ນຄວາມຮູ້ຄວາມສາມາດ ແລະທັກສະການເຮັດວຽກຕ່າງໆ. ການບໍ່ລົງທຶນໃຫ້ພະນັກງານຂອງຕົນ ໄດ້ເຂົ້າຮ່ວມການເຝິກອົບຮົມວຽກງານ, ບໍ່ຈັດຕັ້ງການເຝິກອົບຮົມພາຍໃນອົງກອນ… ລ້ວນແຕ່ສົ່ງຜົນຕໍ່ການເຮັດວຽກຂອງພະນັກງານ ພະນັກງານຮູ້ສຶກວ່າບໍ່ມີຫຍັງກ້າວໜ້າເລີຍ ນອກຈາກກິນເງິນເດືອນໄປວັນໆ.
7. ມີຄວາມບໍ່ຍຸຕິທຳແລະບໍ່ເພື່ອສັງຄົມ
ຮູ້ຢູ່ວ່າການເຮັດທຸລະກິດຄືການຫາຜົນກຳໄລ ແຕ່ຜົນກຳໄລທັງໝົດກໍມາຈາກປະຊາຊົນ ດັ່ງນັ້ນ ການມອບຄວາມຍຸຕິທຳແລະຄືນກຳໄລ ແກ່ສັງຄົມຈະເປັນສິ່ງທີ່ສົມຄວນເຮັດ. ການຫາກຳໄລແບບບໍ່ຢຸດຕິທຳ ແລະການຂີ້ຖີ່ບໍ່ມັກຊ່ວຍເຫຼືອສັງຄົມ ຈະເຮັດໃຫ້ພະນັກງານຮູ້ສຶກລະອາຍໃຈ ເບື່ອໜ່າຍຕໍ່ອົງກອນໄດ້.
8. ບໍ່ເຮັດກິດຈະກຳຮ່ວມກັບລູກນ້ອງ
ການປະຕິບັດວຽກງານ ນາຍຈ້າງບາງຄົນອາດຈະຄິດວ່າ ກູໃຫ້ເງິນເດືອນແລ້ວກໍພໍ ແຕ່ສຳລັບລູກນ້ອງພັດຄິດວ່າ ມີແຕ່ເງິນເດືອນຖ້າບໍ່ສູງອິຫຼີມັນບໍ່ພຽງພໍ ແຕ່ຍັງຈຳເປັນຕ້ອງມີການເຮັດກິດຈະກຳຮ່ວມກັນ ເຊັ່ນ ມີງານລ້ຽງສັງສັນນຳກັນ, ດົນໆພາລູກນ້ອງໄປລ້ຽງເຂົ້າສວາຍຈັກຄາບ, ມີໂອກາດໄດ້ເຮຮາປາຕີ້ນຳກັນ ອັນນີ້ກໍເປັນວຽກງານໜຶ່ງທີ່ ສາມາດສ້າງຄວາມໃກ້ຊິດຕິດແທດກັບລູກນ້ອງ ແລະລະຫວ່າງລູກນ້ອງກໍໄດ້ມີຄວາມສາມັກຄີ ຮັກແພງກັນໃນອົງກອນ. ການບໍ່ເຮັດຈັ່ງຊີ້ນອກຈາກລູກນ້ອງຮູ້ສຶກວ່າ ຫົວໜ້າຂີ້ຖີ່ແລ້ວ ບັນຍາກາດໃນອົງກອນກໍບໍ່ດີ.
9. ຖ້າໃຫ້ລູກນ້ອງໄປຂໍຂຶ້ນເງິນເດືອນ
ຄວາມດຸໝັ່ນຂະຫຍັນພຽນຂອງລູກນ້ອງ ມາຈາກຫຼາຍປັດໄຈ ລວມທັງການກະຕຸ້ນ ຈາກຫົວໜ້າ ເຊັ່ນ ໃຫ້ຄຳຍ້ອງຍໍຊົມເຊີຍ, ໃຫ້ຄຳແນະນຳທີ່ດີ, ໃຫ້ໂບນັດຕາມກາລະໂອກາດທີ່ສຳຄັນ ແລະຂຶ້ນເງິນເດືອນຕາມຄວາມເໝາະສົມ. ແຕ່ການຖ້າໃຫ້ລູກນ້ອງແຕ່ລະຄົນ ໄປຂໍຂຶ້ນເງິນເດືອນເອງເປັນເລື່ອງທີ່ບໍ່ຄວນເປັນ ເພາະນິດໄສຄົນລາວບໍ່ກ້າຮຽກຮ້ອງ ສິ່ງຕອບແທນແກ່ຕອນເອງຈາກຫົວໜ້າ. ບໍ່ແມ່ນຖ້າໃຫ້ລູກນ້ອງລາອອກແລ້ວ ຄ່ອຍບອກວ່າຈະຂຶ້ນເງິນເດືອນໃຫ້.
10. ຄຳຊົມເຊີຍບໍ່ໄດ້ຍິນ ເອົາດີແຕ່ຮ້າຍກັບດ່າ
ບັນຫາສຸດທ້າຍ ຫົວໜ້າທີ່ບໍ່ມີການ ຍ້ອງຍໍຊົມເຊີຍເມື່ອລູກນ້ອງເຮັດວຽກສຳເັລດ ເອົາດີແຕ່ດ່າ ລູກນ້ອງກຳລັງພູມໃຈກັບຜົນງານຢູ່ ແຕ່ຫາແນວມາຕິຈົນເສຍອາລົມ ຫາເລື່ອງລູກນ້ອງໄດ້ທຸກເລື່ອງ ທຸກເວລາ ເຮັດຫຍັງກໍບໍ່ຖືກໃຈ ອັນນີ້ລູກນ້ອງກໍບໍ່ມັກເຊັ່ນກັນ.
ຂຽນໂດຍ: ອ້າຍບ່າວລາວໂພສຕ໌