ສຳລັບຄົນທີ່ມັກຮັກໃນການກິນອາຫານເຜັດຄືຊິໄດ້ຍິນເລື້ອຍໆວ່າ ກິນໝາກເຜັດຫລືເຄື່ອງເຜັດຫລາຍໆ ອາດເຮັດໃຫ້ກະເພາະອາຫານຊ້ຳ ຫລືຮ້ອນໃນ ຄືວ່າການກິນເຜັດເປັນເລື່ອງທີ່ເປັນໂທດ ແຕ່ຈາກຜົນວິໄຈຫລ້າສຸດຂອງນັກວິໄຈຈາກຈີນ ທີ່ຕີພິມໃນວາລະສານການແພດແຫ່ງບຣິເທນ (BMJ) ໄດ້ເປີດເຜີຍວ່າ ກິນເຜັດຫລາຍເທົ່າໃດ ສ່ຽງທີ່ຈະເສຍຊີວິດກ່ອນໄວອັນຄວນໜ້ອຍລົງເທົ່ານັ້ນ
ຂໍ້ສະຫລຸບນີ້ເປັນຜົນມາຈາກການສຶກສາຜູ້ເຂົ້າຮ່ວມໂຄງການຈຳນວນ 487,375 ຄົນ ເປັນເວລາ 7 ປີ ລະຫວ່າງນັ້ນມີຜູ້ເສຍຊີວິດໄປແລ້ວ 20,224 ຄົນ ພົບວ່າຜູ້ທີ່ກິນອາຫານທີ່ມີສ່ວນປະສົມຂອງໝາກເຜັດ ທັງສົດ ແລະ ແຫ້ງ ຢ່າງນ້ອຍ 7 ເທື່ອຕໍ່ອາທິດ ມີອັດຕາການເສຍຊີວິດຕ່ຳກວ່າຜູ້ທີ່ບໍ່ຄ່ອຍກິນເຜັດເຖິງ 14% ລວມເຖິງການເສຍຊີວິດຈາກພະຍາດມະເຮັງ ພະຍາດຫົວໃຈ ແລະທາງເດີນຫາຍໃຈ
ຢ່າງໃດກໍຕາມ ຜົນວິໄຈນີ້ບໍ່ໄດ້ລະບຸເຈາະຈົງວ່າ ອາຫານເຜັດມີສ່ວນຫລຸດຄວາມສ່ຽງຂອງການມີອາຍຸສັ້ນ ນັກວິທະຍາສາດບາງຄົນຕັ້ງຂໍ້ສັງເກດວ່າ ປັດໄຈຫລັກອາດບໍ່ແມ່ນໝາກເຜັດ ແຕ່ເປັນອາຫານອື່ນທີ່ກິນຮ່ວມກັບໝາກເຜັດ ຫລືແມ່ນແຕ່ຮູບແບບການດຳລົງຊີວິດ