ຂປລ. ງານມະຫະກຳ ສະເຫລີມສະຫລອງ ວັນສື່ມວນຊົນ ແລະ ການພິມຈຳໜ່າຍ ຄົບຮອບ 65 ປີ (13/08/1950-13/08/2015) ຈະໄດ້ຈັດຂຶ້ນ ແຕ່ວັນທີ 8-16 ສິງຫາ 2015 ເຊິ່ງຈະມີການເຄື່ອນໄຫວ ດຳເນີນຫລາຍກິດຈະກຳ ເພື່ອສະແດງໃຫ້ສັງຄົມໄດ້ຮັບຮູ້ ເຖິງຜົນງານ ແລະ ຜົນສຳເລັດ ຂອງຂະແໜງການດັ່ງກ່າວ, ທັງເປັນການຄຳນັບຮັບຕ້ອນ ວັນສຳຄັນຕ່າງໆຂອງຊາດ ກໍຄື ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ, ວັນສະຖາປະນາ ສປປ ລາວ ຄົບຮອບ 40 ປີ ແລະ ວັນສຳຄັນອື່ນໆໃຫ້.
ທ່ານ ບຸນເຈົ້າ ພິຈິດ ຜູ້ອຳນວຍການ ໂທລະພາບແຫ່ງຊາດລາວ, ຮອງປະທານ ສະມາຄົມນັກຂ່າວ ແຫ່ງ ສປປ ລາວ, ທັງເປັນຫົວຫນ້າ ອະນຸກຳມະການ ໂຄສະນາ ປະຊາສຳພັນ, ພິທີການ ແລະ ສະຖານທີ່ ເພື່ອສະເຫລີມສະຫລອງ ວັນສື່ມວນຊົນ ແລະ ການພິມຈຳຫນ່າຍຄົບຮອບ 65 ປີ ໄດ້ຖະແຫລງຂ່າວ ຕໍ່ສື່ມວນຊົນ ໃນວັນທີ 5 ສິງຫາ 2015 ທີ່ ສະມາຄົມນັກຂ່າວແຫ່ງ ສປປ ລາວ ໂດຍໄດ້ແຈ້ງໃຫ້ຊາບເຖິງ ກິດຈະກຳຕ່າງໆ ພາຍໃນງານເຊັ່ນ: ການໂຮມຊຸມນຸມ ໃຫຍ່ສະເຫລີມສະຫລອງ ວັນສື່ມວນຊົນ ແລະ ການພິມຈຳຫນ່າຍ ຄົບຮອບ 65 ປີ ຢ່າງເປັນທາງການ ໃນວັນທີ 13 ສິງຫາ 2015 ໂດຍຈະມີ ພະນັກງານ-ລັດຖະກອນ, ພະນັກງານປະຕິວັດ ອາວຸໂສ-ບຳນານ ແລະ ຕົວແທນຈາກຫລາຍພາກສ່ວນ ທີ່ກ່ຽວຂ້ອງເຂົ້າຮ່ວມ ແລະ ຈະໄດ້ຮັບຟັງການໂອ້ລົມ ຂອງການນຳຂັ້ນເທິງ ເພື່ອຊີ້ທິດເຍືອງທາງ ໃຫ້ຂະແໜງສື່ມວນຊົນ ແລະ ການພິມ ສືບຕໍ່ພັດທະນາ ໃຫ້ດີຂຶ້ນເລື້ອຍໆ. ນອກນັ້ນ ຍັງຈະມີການສະແດງ ຜະລິດຕະພັນຂອງສື່ ແລະ ການພິມ ຈຳນວນ 100 ຮ້ານ ຈາກພາກລັດ ແລະ ເອກະຊົນ ຂອງການຈັດຕັ້ງສື່ມວນຊົນ, ລວມທັງຜະລິດຕະພັນ ຂອງອົງການສື່ຕ່າງປະເທດ ຢູ່ ສປປ ລາວ. ສ່ວນໃນຕອນຄ່ຳ ຂອງແຕ່ລະວັນ ຈະມີກິດຈະກຳການສະແດງ ຕ່າງໆ ຂອງສິລະປະ ວັນນະຄະດີ, ງານຄອນເສີດ, ສະແດງລະຄອນ ແລະ ຈະມີການສາຍຮູບເງົາລາວ ອີກຫລາຍເລື່ອງ ເຊິ່ງລ້ວນແຕ່ເປັນຜົນງານ ການສະແດງຂອງຄົນລາວ.
ທ່ານ ບຸນເຈົ້າ ພິຈິດ ຍັງໄດ້ຍົກໃຫ້ເຫັນເຖິງບົດບາດ ແລະ ຄວາມສຳຄັນຂອງສື່ມວນຊົນ ຕະຫລອດໄລຍະ 65 ປີ ໃນການເປັນກະບອກສຽງ ໃນຂະບວນການ ຕໍ່ສູ້ປົດປ່ອຍຊາດ, ຍາດເອົາເອກະລາດແຫ່ງຊາດ ແລະ ອິດສະຫລະພາບ ມາສູ່ປະຊາຊົນ ກໍຄືໄລຍະ 40 ປີ ໃນການນຳພາ ພາລະກິດປົກປັກຮັກສາ ແລະ ສ້າງລະບອບ ປະຊາທິປະໄຕ ປະຊາຊົນ, ພັກປະຊາຊົນປະຕິວັດລາວ ຍາມໃດກໍຖືວຽກງານ ໂຄສະນາສຶກສາອົບຮົມ, ຂົນຂວາຍ ແລະ ຈັດຕັ້ງປະຊາຊົນເປັນ ເວທີປະຕິວັດອັນໜຶ່ງ ໃນນັ້ນສື່ມວນຊົນ ແລະ ການພິມຈຳໜ່າຍ ເຊິ່ງເປັນອາວຸດອັນແຫລມຄົມຂອງພັກ ໃນການຕໍ່ສູ້ໃນສະຫນາມຮົບ ການເມືອງ-ແນວຄິດ ພາຍໃຕ້ການນຳພາຂອງພັກ ແລະ ການຄຸ້ມຄອງຂອງລັດ ໄດ້ປະກອບສ່ວນຢ່າງຕັ້ງໜ້າ ແລະ ສົມກຽດ ໃນໄຊຊະນະລວມ ຂອງການປະຕິວັດລາວ.
ຂອບໃຈຂ່າວຈາກ:
