ສຳນັກຂ່າວຕ່າງປະເທດ ລາຍງານໃນວັນທີ 5 ສິງຫາຜ່ານມານີ້ວ່າ ງານແຕ່ງດອງລະຫວ່າງ ທ້າວ ເຟທຸເລາະ ອູຊຸມຄຸກລູ ແລະ ນາງ ເອສະຣາ ໂປລາດ ຄູ່ຮັກຊາວຕວກກີ ທີ່ຈັດຂຶ້ນໃນເມືອງຄິລິດ ທາງພາກໃຕ້ຂອງຕວກກີ ໄດ້ແຫກກົດຂອງງານລ້ຽງແຕ່ງດອງ ຕາມປະເພນີລ້ຽງແຂກ ແລະ ເພື່ອນມິດສະຫາຍ ທີ່ມີໃນທຸກວັດທະນະທຳທົ່ວໂລກ ດ້ວຍການເຊ່ີນເອົາຜູ້ອົບພະຍົບຊາວຊີຣີ ທີ່ພັກຢູ່ໃນຄ້າຍອົບພະຍົບກ່ວາ 4,000 ຄົນ ມາລ້ຽງເຂົ້າໃນງານແຕ່ງດອງຂອງພວກເຂົາ ແທນການເຊີນແຂກເຂົ້າຮ່ວມ ທັງໆທີ່ຄູ່ບ່າວສາວບໍ່ຮູ້ຈັກຊາວອົບພະຍົບດັ່ງກ່າວນີ້ເລີຍ ຊຶ່ງເປັນການໃຫ້ຢ່າງຍິ່ງໃຫຍ່ ໃນວັນພິເສດຂອງຊີວິດພວກເຂົາ.
ແຫລ່ງຂ່າວໄດ້ລະບຸວ່າ ທັງຄູ່ໄດ້ໃຊ້ເງິນທ້ອນຂອງຕົນເອງບໍ່ໜ້ອຍ ໃນການຈັດງານແຕ່ງດອງແບບຊ່ວຍເຫລືອຜູ້ທຸກຍາກ ແລະ ບໍ່ມີທີ່ຢູ່ອາໄສເຊັ່ນນີ້, ແນວໃດກໍຕາມ ແນວຄິດດັ່ງກ່າວ ບໍ່ແມ່ນແນວຄິດລິເລີ່ມຂອງຄູ່ບ່າວສາວ ແຕ່ຫາກແມ່ນແນວຄິດຂອງຜູ້ເປັນພໍ່ຂອງເຈົ້າບ່າວເອງ.
ດ້ານພໍ່ຂອງເຈົ້າບ່າວໄດ້ເປີດເຜີຍວ່າ ການລ້ຽງອາຫານທີ່ແຊບໆໃຫ້ຄອບຄົວ ແລະ ຄົນຮູ້ຈັກໃນງານແຕ່ງດອງ ແມ່ນເປັນສິ່ງທີ່ບໍ່ຈຳເປັນເລີຍ ໂດຍສະເພາະໃນຍາມທີ່ເຮົາຮູ້ວ່າ ມີຄົນອີກຈຳນວນຫລວງຫລາຍທີ່ຕ້ອງການອາຫານເພື່ອດຳລົງຊີວິດຢູ່ອ້ອມຂ້າງພວກເຮົາ ຈິ່ງໄດ້ສະເໜີແນວຄິດນີ້ໃຫ້ກັບລູກຊາຍ ແລະ ເປັນທີ່ໜ້າຍິນດີທີ່ລູກຊາຍກໍເຫັນດີນຳ.
