ເນື່ອງຈາກວ່າສະພາບການສັນຈອນຕົວຈິງໃນນະຄອນຫຼວງວຽງຈັນ ປັດຈຸບັນເຫັນວ່າມີຫຼາຍເສັ້ນທາງການສັນຈອນ ຍັງມີຄວາມສັບສົນ-ແອອັດ ໂດຍສະເພາະ ໂມງເຂົ້າການ-ເລີກການ ເພື່ອເປັນການຫຼຸດຜ່ອນ ແລະ ແກ້ໄຂບັນຫາການສັນຈອນແອອັດ ແນໃສ່ໃຫ້ການສັນຈອນໄປ-ມາຂອງພາຫະນະໃຫ້ມີຄວາມສະດວກວ່ອງໄວ ແລະ ມີຄວາມປອດໄພ ດັ່ງນັ້ນ ຕຳຫຼວດຈະລາຈອນນະຄອນຫຼວງວຽງຈັນ ຈຶ່ງໄດ້ວາງແຜນຮ່ວມມືກັບຕຳຫຼວດຈະລາຈອນ 7 ຕົວເມືອງ ປະມານ 300 ສະຫາຍ ເພື່ອຄວບຄຸມອຳນວຍຄວາມສະດວກໃຫ້ແກ່ຜູ້ໃຊ້ລົດໃຊ້ຖະໜົນ ໄລຍະເປີດສົກຮຽນໃໝ່ປີ 2013.
ທ່ານ ພັນໂທ ພົມມະຈັນ ສວນບຸນມາ ຫົວໜ້າພະແນກຕຳຫຼວດຈະລາຈອນນະຄອນຫຼວງວຽງຈັນ ໃຫ້ສຳພາດກັບສື່ມວນຊົນ ໃນວັນທີ 29 ສິງຫາ 2013 ຜ່ານມາທີ່ຫ້ອງຕຳຫຼວດວ່າ: ຈາກການຖອດຖອນບົດຮຽນໃນການເປີດສົກຮຽນໃໝ່ປີ 2012 ຜ່ານມາ ເຫັນວ່າສະພາບການສັນຈອນຂ້ອນຂ້າງສັບສົນ ມີສະພາບລົດຫຼາຍອັ່ງອໍຢູ່ຕາມສາມແຍກ ສີ່ແຍກ ໂດຍສະເພາະຕາມສີ່ແຍກໄຟແດງ ທາງວົງວຽນ ແລະ ເຂດໂຮງຮຽນທີ່ຕັ້ງຢູ່ຕາມແຄມທາງ ສະນັ້ນ ເພື່ອຮັບປະກັນການສັນຈອນໄປ-ມາ ຕາມເສັ້ນທາງໃນມື້ເປີດສົກຮຽນໃໝ່ປີ 2013 ນີ້ ພະແນກຕຳຫຼວດຈະລາຈອນ ຈຶ່ງໄດ້ວາງແຜນຮ່ວມມືກັບບັນດາຕຳຫຼວດຈະລາຈອນ 7 ຕົວເມືອງ ມີກຳລັງທັງໝົດ 306 ສະຫາຍ ມີ 44 ປ້ອມ (ປ້ອມຖາວອນ 17 ປ້ອມ) ຈຸດລະບາຍມີ 74 ຈຸດ ທັງນີ້ ເພື່ອຄວບຄຸມອຳນວຍຄວາມສະດວກໃຫ້ແກ່ຜູ້ໃຊ້ລົດໃຊ້ຖະໜົນ.
ຂ້າພະເຈົ້າຂໍຮຽກຮ້ອງມາຍັງນັກຂັບຂີ່ ຜູ້ປະກອບການ ນັກຮຽນ-ນັກສຶກສາ ຕ້ອງເປັນເຈົ້າການເຄົາລົບປະຕິບັດກົດລະບຽບການສັນຈອນຢ່າງເຂັ້ມງວດ ຮຽກຮ້ອງມາຍັງຄູ-ອາຈານ ຜູ້ປົກຄອງ ຕ້ອງໄດ້ເອົາໃຈໃສ່ສຶກສາອົບຮົມລູກຫຼານ ໃນເວລາຂັບຂີ່ລົດທຸກຄັ້ງ ແລະ ກ່ອນອອກເດີນທາງຕ້ອງໄດ້ມີການວາງແຜນໃຫ້ລະອຽດ ເສັ້ນທາງສັນຈອນ ເວລາສັນຈອນ ຕ້ອງປະຕິບັດໂມງເວລາ ເພື່ອຫຼີກເວັ້ນຄວາມແອອັດ