ທ່ານ ສີສະຫວາດ ທີຣະວົງ ປະທານສະພາການຄ້າ ແລະ ອຸດສະຫະກຳແຫ່ງຊາດລາວ, ໄດ້ກ່າວໃນກອງປະຊຸມແລກປ່ຽນ ຄວາມຄິດເຫັນລະຫວ່າງພາກລັດ ແລະ ເອກະຊົນກ່ຽວກັບບັນຫາການຄຸ້ມຄອງເສດຖະກິດມະຫາພາກ ແລະ ການດຳເນີນ ທຸລະກິດຢູ່ລາວ ເມື່ອບໍ່ດົນນີ້ວ່າ: ເຖິງວ່າ ສປປ ລາວ ຈະມີທ່າແຮງຊຸກຍູ້ການເຕີບໂຕຂອງເສດຖະກິດພົ້ນເດັ່ນຫລາຍດ້ານ, ແຕ່ພວກເຮົາຍັງພົບບັນຫາຫຍຸ້ງຍາກໃນການລົງທຶນ ແລະ ດຳເນີນທຸລະກິດບໍ່ໜ້ອຍ, ຊຶ່ງມາຈາກຫລາຍປັດ​ໄຈຄື: ການກໍ່ສ້າງພື້ນຖານໂຄງລ່າງທີ່ພາກເອກະຊົນລົງທຶນກ່ອນໂດຍນຳໃຊ້ເງິນກູ້ຈາກທະນາຄານ, ແຕ່ພາຍຫລັງໂຄງການ ສຳເລັດລັດບໍ່ສາມາດຊຳລະໄດ້ຕາມກຳນົດ, ເຮັດໃຫ້ພາກເອກະຊົນຂາດເງິນໝູນວຽນ ແລະ ສົ່ງຜົນສະທ້ອນໃນການຈ່າຍ ພັນທະງົບປະມານແຫ່ງຊາດ, ການກຳນົດດອກເບ້ຍເງິນຝາກໃນລະດັບສູງເຖິງ 13%-14%ສົ່ງຜົນໃຫ້ຄົນຕ່າງປະເ ທດນຳເອົາເງິນເຂົ້າມາຝາກ, ເຮັດໃຫ້ທະນາຄານແບກຫາບພາລະດອກເບ້ຍສູງ, ຊຶ່ງຈະກາຍເປັນຜົນກະທົບໃນໄລຍະຍາວ, ການໃຫ້ບໍລິການຂອງພາກລັດໃນການອະນຸມັດເອກະສານ ແລະ ອຳນວຍຄວາມສະດວກດ້ານການຄ້າຊັກຊ້າ, ສົ່ງຜົນໃຫ້ນັກລົງທຶນຕ່າງປະເທດບໍ່ໃຫ້ຄວາມສົນໃຈເຂົ້າມາລົງທຶນຢູ່ລາວ ແລະ ທັງເປັນການເພີ່ມລາຍຈ່າຍ, ພ້ອມທັງສົ່ງຜົນກະທົບໂດຍກົງຕໍ່ການສົ່ງອອກສີນຄ້າຂອງລາວທີ່ພົບຂໍ້ຈຳກັດຫລາຍດ້ານ, ການຍົກເວັ້ນ

ພາສີອາກອນນຳເຂົ້າວັດສະດຸແຕ່ຂາດການຄວບຄຸມ ແລະ ຕິດຕາມ, ເຮັດໃຫ້ມີການລັກລອບນຳເອົາວັດສະດຸມາຈຳໜ່າຍໃນລາຄາຖືກກວ່າສິນຄ້າທີ່ຜູ້ຜະລິດພາຍໃນຈຳໜ່າຍ, ເຊິ່ງຜູ້ຜະລິດພາຍໃນຕ້ອງແບກຫາບການເກັບພາສີອາກອນ ເຊັ່ນ: ການນຳເຂົ້າວັດຖຸດິບ, ກົນຈັກການຜະລິດ,ແຮງງານ ແລະ ອື່ນໆ, ບັນດາຫົວໜ່ວຍທຸລະກິດຂະໜາດນ້ອຍ ແລະ ກາງ ຍັງບໍ່ໄດ້ຮັບການສົ່ງເສີມຢ່າງຈິງຈັງໃນການເຂົ້າເຖິງແຫລ່ງທຶນເງິນກູ້, ອັດຕາດອກເບ້ຍສູງ, ໄລຍະການຊຳລະໄວ, ຖ້າຜະລິດ ແລະ ຈຳໜ່າຍພາຍໃນກໍມີການເກັບພາສີອາກອນ ແລະ ຄ່າອື່ນໆນັບແຕ່ຂັ້ນຜະລິດໄປຈົນຮອດຂອດຈຳໜ່າຍ, ເຮັດໃຫ້ສິນຄ້າມີມູນຄ່າສູງເກີນກວ່າປະເທດອ້ອມຂ້າງ. ສ່ວນບັນຫາຜົນກະທົບພາຍນອກຕໍ່ຜູ້ລົງທຶນພາຍໃນເຫັນວ່າໂຄງການຂຸດຄົ້ນແຮ່ຄຳເປັນການລົງທຶນຂະໜາດໃຫຍ່ເມື່ອລາຄາຄຳຢູ່ຕະຫລາດໂລກຫລຸດລົງເຮັດໃຫ້ບາງບໍລິສັດຢຸດການຜະລິດ, ບໍລິສັດທີ່ຮັບເໝົາການຂຸດຄົ້ນກໍບໍ່ມີວຽກເຮັດ, ສົ່ງຜົນໃຫ້ເກີດເປັນບັນຫາຕ່ອງໂສ້ໃນການມອບພັນທະເຂົ້າງົບປະມານລັດ,ເສດຖະກິດພາຍໃນມີການສະລໍຕົວເປັນເຫດໃຫ້ຍານພາຫະນະນຳເຂົ້າຄົງ ຄ້າງເປັນຈຳນວນຫລາຍ, ຂະນະດຽວກັນພາຫະນະໃໝ່ກໍອອກມາເຮັດໃຫ້ຜູ້ປະກອບການມີບັນຫາໃນການຊຳລະເງິນໃຫ້ຕ່າງປະເທດ ແລະ ບາງປະເທດທີ່ມີຊາຍແດນຕິດກັບລາວມີນະໂຍບາຍໂຈະປ່ອຍເງິນກູ້, ຂຶ້ນຄ່າແຮງງານເພື່ອຍາດເອົາແຮງງານຢູ່ບາງແຂວງ ຂອງລາວທີ່ມີການສົ່ງເສີມການລົງທຶນພາຍໃນ ແລະ ຕ່າງປະເທດຂາດແຮງງານຮັບໃຊ້ການຜະລິດ, ສະນັ້ນ ເພື່ອເຮັດໃຫ້ ສປປ ລາວ, ສາມາດຜ່ານຜ່າອຸປະສັກ ແລະ ເຮັດໃຫ້ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມຄັ້ງທີ VIII ( 2016-2020) ມີຄວາມໜັກແໜ້ນເຂັ້ມແຂງ ແລະ ສາມາດເຊື່ອມໂຍງກັບພາກພື້ນ ແລະ ສາກົນໄດ້ເປັນຢ່າງດີ, ຈຶ່ງຕ້ອງໄດ້ປັບປຸງໂຄງສ້າງເສດຖະກິດເພື່ອເພີ່ມຂີດຄວາມສາມາດໃນການແຂ່ງຂັນ,

ພັດທະນາທັກສະ ແລະ ຄວາມຮູ້ໃໝ່ໃຫ້ແກ່ນັກທຸລະກິດ, ນຳໃຊ້ທ່າແຮງຈຸດພິເສດຂອງປະເທດໃຫ້ກາຍເປັນພື້ນຖານເສດຖະກິດທີ່ເຂັ້ມແຂງຮັ່ງມີ, ພ້ອມທັງປັບປຸງການຄຸ້ມຄອງບໍລິຫານລັດນັບແຕ່ສູນກາງ ແລະ ທ້ອງຖິ່ນໃຫ້ເໝາະສົມຕາມຍຸກສະໄໝ, ຊອກຫາຄູ່ຮ່ວມພັດທະນາທຸລະກິດກຸ່ມປະເທດສະມາຊິກອາຊຽນ ແລະ ສາກົນ ເພື່ອສ້າງຄວາມເຂັ້ມແຂງໃຫ້ເສດຖະກິດຂອງລາວສາມາດນຳພາປະເທດຫລຸດພົ້ນອອກຈາກຄວາມດ້ອຍພັດທະນາໃນປີ 2020 ໄດ້.

ຂ່າວຈາກ: ລາວພັດທະນາ