ຕອນເຊົ້າມື້ນີ້ ວັນທີ 5 ສິງຫາ 2015 ໄດ້ເກີດເຫດນ້ຳຖ້ວມເຂດບ້ານຫົວຂົວ ເມືອງນາຊາຍທອງ ນະຄອນຫຼວງວຽງຈັນ ສະພາບການສັນຈອນ ຕິດຂັດຍາວຢຽດເຖິງ 5 ກິໂລແມັດ ທ່ານເຈົ້າເມືອງລົງພື້ນທີ່ ບັນຊາການໂດຍກົງກັບການ ໃຫ້ການຊ່ວຍເຫຼືອປະຊາຊົນ ແລະແກ້ໄຂບັນຫາສະເພາະໜ້າ.
ທີມຂ່າວລາວໂພສຕ໌ ປະຈຳເມືອງນາຊາຍທອງ ລາຍງານເຂົ້າສູ່ສຳນັກຂ່າວລາວໂພສຕ໌ ວ່າ ເນື່ອງຈາກຝົນຕົກໜັກຕະຫຼອດຄືນທີ່ຜ່ານມາ ເຮັດໃຫ້ນ້ຳປ່າທີ່ໄຫຼມາຈາກສາຍຫ້ວຍຕ່າງໆ ໃນສາຍພູພະນັງໄດ້ໄຫຼບ່າເຂົ້າຖ້ວມເສັ້ນທາງ ເລກທີ 13 ເໜືອ ແລະບ້ານເຮືອນປະຊາຊົນເປັນບໍລິເວນກວ້າງ ການສັນຈອນຕິດຄັດຍາວຢຽດກວ່າ 5 ກິໂລແມັດ.
ທ່ານ ວິລະສັກ ນາມມຸນຕີ ເຈົ້າເມືອງເມືອງນາຊາຍທອງ ໄດ້ລົງພື້ນທີ່ບັນຊາການແກ້ໄຂບັນຫາ ດ້ວຍໂຕເອງ ພ້ອມທັງລະດົມພາກສ່ວນ ປກສ ແລະປກຊ ລົງໃຫ້ການຊ່ວຍເຫຼືອປະຊາຊົນ ແລະແກ້ໄຂບັນຫາ ຢ່າງຂຸ້ນຂ້ຽວ.
