ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ), ໄດ້ຈັດກອງປະຊຸມສະຫລຸບວຽກງານ 3 ສ້າງຂະແໜງການຕົນໃນທົ່ວປະເທດໃນລະຫວ່າງວັນທີ 3-4 ສິງຫານີ້, ໂດຍການເປັນປະທານຂອງທ່ານ ສຈ.ດຣ ບໍ່ແສງຄຳ ວົງດາລາ ລັດຖະມົນຕີວ່າການກະຊວງດັ່ງກ່າວ, ພ້ອມດ້ວຍພາກສ່ວນກ່ຽວຂ້ອງເຂົ້າ ຮ່ວມເປັນຈໍານວນ ຫລາຍເພື່ອສະຫລຸບຕີລາຄາຮອບດ້ານຕໍ່ວຽກງານດັ່ງກ່າວໃນໄລຍະປີ 2012-2015, ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຫຍຸ້ງຍາກຄົງ ຄ້າງ, ບາງບົດຮຽນທີ່ຖອດຖອນໄດ້ ແລະ ສິ່ງທ້າທາຍຕ່າງໆລວມເຖິງ ມາດຕະການຈັດຕັ້ງປະຕິບັດ ແລະ ອື່ນໆ.
ທ່ານລັດຖະມົນຕີວ່າການກະຊວງ ຖວທ ກ່າວວ່າ: ໃນໄລຍະຜ່ານມາຄະນະພັກກະຊວງ (ຖວທ) ໄດ້ເອົາໃຈໃສ່ຢ່າງຕັ້ງໜ້າເພື່ອຊິ້ນຳ-ນຳພາການສ້າງຂະບວນການເຮັດທົດລອງວຽກງານ 3 ສ້າງຮ່ວມກັບອຳນາດການປົກຄອງແຕ່ລະຂັ້ນນັບທັງສູນກາງ ແລະ ທ້ອງຖິ່ນດ້ວຍຄວາມຮັບຜິດຊອບສູງ, ໄດ້ມີການເຄື່ອນໄຫວຢ່າງເປັນຮູບປະທຳຢູ່ຂັ້ນທ້ອງຖິ່ນໃນ
ຂອບເຂດທົ່ວປະເທດ, ສິ່ງທີ່ພົ້ນເດັ່ນແມ່ນໄດ້ສ້າງຄູ່ມືກ່ຽວກັບການແບ່ງຂັ້ນຄຸ້ມຄອງ, ມີການມອບໝາຍໜ້າທີ່ຮັບຜິດຊອບຢ່າງລະອຽດໃນແຕ່ລະຂັ້ນ, ໄດ້ປະກອບ ແລະຕິດຕັ້ງໂທລະໂຄ່ງໃຫ້ແກ່ບັນດາບ້ານ 3 ສ້າງ, ອັນໄດ້ສ້າງພື້ນຖານໂຄງລ່າງຮັບໃຊ້ວຽກງານ ຖວທ ໃຫ້ປາກົດຜົນເປັນຈິງຂຶ້ນ, ການເຮັດທົດລອງ 3 ສ້າງສາມາດຕີລາຄາໄດ້ວ່າ:ວຽກງານ ຖວທ ໄດ້ຮັບການຜັນຂະຫຍາຍ ແລະ ຈັດຕັ້ງປະຕິບັດຢ່າງເປັນຂະບວນຟົດຟື້ນ, ຄະນະພັກ, ອຳນາດການປົກຄອງແຕ່ລະຂັ້ນນັບທັງສູນກາງ ແລະ ທ້ອງຖິ່ນ, ໄດ້ຮັບຮູ້ພາລະບົດບາດ ແລະ ຄວາມສຳຄັນອັນໄດ້ປະ ກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍຕິດພັນກັບວຽກງານ 3 ສ້າງ.
ວຽກງານ 3 ສ້າງ ແມ່ນການປະຕິບັດທິດນຳຍຸດທະສາດກ່ຽວກັບການສ້າງຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນ ແລະ ທິດນຳກ່ຽວກັບ 4 ບຸກທະລຸໃນພາກຕົວຈິງ, ເຊິ່ງເປັນວຽກທີ່ມີລັກສະນະຍຸດທະສາດທັງໃນສະເພາະໜ້າ ແລະ ຍາວນານ, ພ້ອມທັງເປັນການເສີມຂະຫຍາຍສິດເປັນເຈົ້າໃຫ້ແກ່ທ້ອງຖິ່ນຮາກຖານ, ເພີ່ມທະວີບົດບາດນຳພາ ແລະ ຍົກສູງຄວາມສາມາດກຳອຳນາດຂອງພັກ, ພ້ອມກັນນັ້ນກໍເພື່ອເພີ່ມທະວີຄວາມສັກສິດໃນການຄຸ້ມຄອງ-ບໍລິຫານລັດ, ສ້າງຄວາມເຂັ້ມແຂງຮອບດ້ານໃຫ້ແກ່ທ້ອງຖິ່ນຮາກຖານ, ໂດຍສະເພາະໃນ 51 ເມືອງ 109 ບ້ານເປົ້າໝາຍທົດລອງ 3 ສ້າງໃນຂອບເຂດທົ່ວປະເທດໃຫ້ມີຄວາມເຂັ້ມແຂງໂດຍພື້ນຖານ.
ຂອບໃຈຂ່າວຈາກ:
