ສະຫາຍ ຈູມມະລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໄດ້ຮັບໃບກຽດຕິຄຸນ ປະລິນຍາເອກກິຕິມະສັກ ຈາກມະຫາວິທະຍາໄລເສດຖະກິດແຫ່ງຊາດ ສສ.ຫວຽດນາມ ໃນຖານະທີ່ໄດ້ປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ ຕະຫຼອດໄລຍະຜ່ານມາ.
ສະຫາຍ ຈູມມາລີ ໄຊຍະສອນ ເກີດໃນວັນທີ 6 ມີນາ 1936 ທີ່ແຂວງອັດຕະປື ໄດ້ເຂົ້າຮ່ວມການປະຕິວັດໃນປີ 1954 ປີ 1982 ໄດ້ຖືກຄັດເລືອກເປັນກຳມະການສູນກາງພັກ ຈົນມາຮອດປີ 1986 ໄດ້ຖືກເລືອກເປັນເລຂາທິການສູນກາງພັກ ແລະ ປີ 1991 ໄດ້ຖືກເລືອກເປັນກຳມະການກົມການເມືອງສູນກາງພັກ ແລະ ເປັນລັດຖະມົນຕີວ່າການກະຊວງປ້ອງກັນປະເທດ ໃນປີ 2001 ເປັນຮອງປະທານປະເທດ ແລະ ປີ 2006 ມາເຖິງປັດຈຸບັນແມ່ນເປັນເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ຕະຫຼອດໄລຍະຜ່ານມາ ທ່ານໄດ້ປະກອບສ່ວນໃນການເສີມສ້າງສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຫວຽດນາມ ໂດຍສະເພາະ ປະກອບສ່ວນເຂົ້າໃນການພັດທະນາດ້ານການສຶກສາຂອງທັງສອງປະເທດ ເພື່ອຍາດມາໄດ້ການພັດທະນາຊັບພະຍາກອນມະນຸດ.
ໂອກາດດັ່ງກ່າວ ສະຫາຍ ຈູມມາລີ ໄຊຍະສອນ ໄດ້ຕີລາຄາສູງ ແລະ ເປັນການຍ້ອງຍໍສັນລະເສີນ ຕໍ່ຜົນງານການຊີ້ນຳໆພາຂອງພັກປະຊາຊົນປະຕິວັດລາວ ກໍຄືການປະກອບສ່ວນຂອງສະຫາຍເອງຕະຫຼອດໄລຍະເວລາ 10 ປີຜ່ານມາທີ່ໄດ້ພະຍາຍາມຄົ້ນຄວ້າ ສະສົມ ແລະ ນຳໃຊ້ບົດຮຽນທາງດ້ານວິຊາການແຫ່ງການຄຸ້ມຄອງລັດ ຄຸ້ມຄອງເສດຖະກິດ-ສັງຄົມ ແລະ ການເຊື່ອມໂຍງເສດຖະກິດກັບສາກົນ ຊຶ່ງຕະຫຼອດໄລຍະປະຕິບັດໜ້າທີ່ດ້ວຍຄວາມຮັບຜິດຊອບ ຕາມແນວທາງປະຕິບັດແນວທາງການປ່ຽນແປງໃໝ່ຂອງພັກ ນອກນັ້ນ ການທີ່ໄດ້ຮັບໃບປະກາດກຽດຕິຄຸນອັນສູງສົ່ງຄັ້ງນີ້ ເປັນການສະແດງເຖິງນ້ຳໃຈມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ຄວາມເອື້ອເຟື້ອເພື່ອແຜ່ທີ່ມີມູນເຊື້ອລະຫວ່າງສອງພັກ-ສອງລັດ ປະຊາຊົນທັງສອງຊາດລາວ-ຫວຽດນາມ ທີ່ໄດ້ເພີ່ມພູນຄູນສ້າງຕະຫຼອດມາ ຊຶ່ງການຕົກລົງຂອງສະພາວິທະຍາສາດ ມະຫາວິທະຍາໄລເສດຖະກິດແຫ່ງຊາດຫວຽດນາມຄັ້ງດັ່ງກ່າວ ຍັງເປັນການໃຫ້ກຽດ ແລະ ເປັນກຳລັງໃຈໃຫ້ແກ່ພັກ-ລັດຖະບານລາວ ເພື່ອບຸກບືນກ້າວຂຶ້ນຍາດເອົາຜົນສຳເລັດອັນໃໝ່ຕື່ມອີກ.
ການພັດທະນາຊັບພະຍາກອນມະນຸດ ໂດຍການສົ່ງເສີມຄວາມຮູ້ຄວາມສາມາດໃຫ້ຄົນລາວລຸ້ນນີ້ ແລະ ຄົນລຸ້ນຕໍ່ໆໄປ ອັນເປັນແມ່ແຮງໃຫ້ການພັດທະນາປະເທດຊາດ ຄວາມເຕີບໃຫຍ່ຢ່າງແຂງແຮງ ແລະ ວັດທະນາຖາວອນນັ້ນ ຊຶ່ງມະຫາວິທະຍາໄລເສດຖະກິດແຫ່ງຊາດຫວຽດນາມ ນອກຈາກໄດ້ປະກອບສ່ວນສ້າງບຸກຄະລາກອນໃຫ້ປະເທດຫວຽດນາມແລ້ວ ຍັງມີບົດບາດສຳຄັນໃນການພັດທະນາຊັບພະຍາກອນມະນຸດ ທີ່ມີຄວາມຮູ້ຄວາມສາມາດທາງດ້ານເສດຖະກິດ ວິທະຍາສາດ-ເຕັກນິກ ໃຫ້ແກ່ ສປປ ລາວ ດ້ວຍຈຳນວນທີ່ເພີ່ມຂຶ້ນ ແລະ ຄຸນນະພາບທີ່ໜ້າເພິ່ງພໍໃຈ.
ພິທີມອບໃບກຽດຕິຄຸນປະລິນຍາເອກກິຕິມະສັກ ໄດ້ຈັດຂຶ້ນໃນວັນທີ 28 ສິງຫາ 2013 ທີ່ສຳນັກງານປະທານປະເທດ (ຫໍຄຳ) ໂດຍການມອບຂອງທ່ານ ຮຈ.ດຣ. ຟາມ ແມ່ງ ຮຸ່ງ ລັດຖະມົນຕີຊ່ວຍວ່າການ ກະຊວງສຶກສາ-ກໍ່ສ້າງ ຜູ້ອຳນວຍການມະຫາວິທະຍາໄລເສດຖະກິດແຫ່ງຊາດ ສສ.ຫວຽດນາມ ຊຶ່ງມີບັນດາການນຳ ພະນັກງານກ່ຽວຂ້ອງຂອງທັງສອງຝ່າຍເຂົ້າຮ່ວມ.