ຂປລ. ພາລະກິດກອບກູ້ ແລະ ຄົ້ນຫາຜູ້ເສຍຊີວິດ ຈາກເຫດຍົນ Mi-17 ຂອງກອງທັບຕົກໄດ້ ສິ້ນສຸດໃນວັນທີ 31 ກໍລະກົດ 2015 ພາຍຫລັງເຈົ້າໜ້າທີ່ ສະເພາະກິດໄດ້ເຂົ້າເຖິງຈຸດເກີດເຫດ ແລະ ສາມາດກອບກູ້ຜູ້ເສຍຊີວິດ ໄດ້ທັງໝົດ 23 ຄົນ ໃນນັ້ນມີຈຸບິນ 4 ຄົນ ແລະ ຜູ້ໂດຍສານ 19 ຄົນ.
ປັດຈຸບັນ ນີ້ ຜູ້ເສຍຊີວິດທັງໝົດ ໄດ້ເຄື່ອນຍ້າຍມາຮອດ ນະຄອນຫລວງວຽງຈັນ ເປັນທີ່ຮຽບຮ້ອຍແລ້ວ ແລະ ຍາດຕິພີ່ນ້ອງ, ພໍ່ແມ່ ແລະ ມິດສະຫາຍຂອງຜູ້ເສຍຊີວິດ ໄດ້ທໍາພິທີທາງສາສະໜາ ຕາມຮີດຄອງປະເພນີ, ສ່ວນສາເຫດຍົນຕົກຄັ້ງນີ້ ເຈົ້າໜ້າທີ່ກ່ຽວຂ້ອງ ພວມເລັ່ງສືບສວນສອບສວນ ແລະ ຊອກຫາສາເຫດຕໍ່ໄປ.
ຍົນລໍານີ້ໄດ້ບິນຂຶ້ນ ຈາກນະຄອນຫລວງວຽງຈັນ ໃນເວລາ 13:10 ໂມງ ຂອງວັນທີ 27 ກໍລະ ກົດ 2015 ເພື່ອໄປປະຕິບັດໜ້າທີ່ຢູ່ ແຂວງຊຽງຂວາງ-ຫົວພັນ ເມື່ອບິນໄປໄດ້ໄລຍະໜຶ່ງ ສູນຄວບຄຸມການບິນ ບໍ່ສາມາດຕິດຕໍ່ສື່ສານ ກັບຍົນລຳດັ່ງກ່າວ ເຊິ່ງມີຈຸບິນ 4 ຄົນ ແລະ ຜູ້ໂດຍສານ 19 ຄົນ, ມາຮອດ ວັນທີ 29 ກໍລະກົດ 2015 ຄະນະສະເພາະກິດ ແລະ ກໍາລັງກອບກູ້ພາກພື້ນດິນ ກະຊວງປ້ອງກັນປະເທດລາວຢືນຢັນວ່າ ສາມາດພົບເຫັນສັນຍານ ແລະ ຈຸດເກີດອຸບັດເຫດຍົນ Mi-17 ຂອງກອງທັບຕົກ ຢູ່ທາງທິດເໜືອ ຂອງບ້ານຫລວງພັນໄຊ ເມືອງລ່ອງແຈ້ງ ແຂວງໄຊສົມບູນ ແລະ ເຈົ້າໜ້າທີ່ສະເພາະກິດ ແລະ ກໍາລັງກອບກູ້ພາກພື້ນດິນ ໄດ້ສົມທົບກໍາລັງຄົບຊຸດມຸ່ງໜ້າເຂົ້າຫາ ຈຸດເກີດເຫດ ທາມກາງສະພາບອາກາດບໍ່ເອື້ອອໍານວຍ ແລະ ເສັ້ນທາງເຂົ້າເຖິງຈຸດເກີດເຫດ ປະກອບມີພູຜາປ່າດົງຕືບໜາ ແຕ່ໃນທີ່ສຸດເຈົ້າໜ້າທີ່ສະເພາະກິດ ກໍສາມາດກອບກູ້ ແລະ ເຄື່ອນຍ້າຍຜູ້ເສຍຊີວິດໄດ້ທັງໝົດ.
ຂອບໃຈຂ່າວຈາກ:
