ໃນການແຂ່ງຂັນບານເຕະຊິງແຊ້ມອາຊຽນ ລຸ້ນອາຍຸບໍ່ເກີນ 16 ປີທີມຊາດລາວພົບທີມຊາດຫວຽດນາມ, ໂດຍໃນເກມການແຂ່ງຂັນ ຫວຽດນາມ ໄດ້ປະຕູຂຶ້ນນໍາກ່ອນໃນເຄິ່ງເວລາທໍາອິດເຖິງ 2 ປະຕູ ໃນນາທີ 21 ແລະ ນາທີ 45+1 (ທົດເວລາບາດເຈັບ), ມາເຖິງເຄິ່ງເວລາທີ 2 ລາວເຮົາຕີໄຂ່ແຕກໄດ້ໃນນາທີ 49 ຈາກລູກຍິງຂອງ ບຸນພະຈັນ ບຸນກອງ ນັກເຕະຈາກສະໂມສອນ ສະຫວັນ ເອັຟຊີ ຄົນນີ້ທີເຮັດໃຫ້ທີມຊາດລາວເຮົາຍັງບໍ່ແພ້ໃຫ້ທີມໃດ ເຊິ່ງກໍເປັນປະຕູທີ 4 ຂອງ ບຸນກອງ ໃນລາຍການນີ້, ຕໍ່ມາໃນນາທີ 73 ລາວ ເຮົາຕ້ອງເຫລືອຜູ້ຫລິ້ນພຽງແຕ່ 10 ຄົນເມື່ອຫົວຫນ້າທີມ ຄຳປັນຍາ ແກ້ວດວງເດດ ໄດ້ຮັບບັດແດງຖືກໄລ່ອອກຈາກສະໜາມໄປ, ແຕ່ກໍ່ບໍ່ເປັນອຸປະສັກສຳລັບທີມຊາດລາວເຮົາ ເຊີ່ງວ່າໃນນາທີ 89 ກ່ອນຈະຈົບເກມລົງ ນາລິນ ຫລວງສີສົມບັດ ຈາກສະໂມສອນ ກອງທັບ ເປັນອີກ 1 ຄົນທີ່ເປັນຄວາມພາກພູມໃຈຫນື່ງຂອງລາວເຮົາ ຍິງປະຕູຕີສະເຫມີໃຫ້ກັບທີມຊາດລາວເປັນ 2-2 ປະຕູ ແລະ ກໍ່ເປັນປະຕູທີ 2 ຂອງ ນາລິນໃນລາຍການນີ້, ຈົບເກມ 90 ນາທີເຮັດໃຫ້ ທີມຊາດລາວ ສະເຫມີ ທີມຊາດ ຫວຽດນາມ 2-2 ປະຕູ
ທີມຊາດລາວລົງສະຫນາມໄປແລ້ວ 3 ນັດ ມີ 7 ຄະແນນ ເປັນອັນດັບ 1 ຂອງກຸ່ມ A ໃນລາຍການບານເຕະເຍົາວະຊົນລຸ້ນອາຍຸ 16 ປີ ຊີງແຊ້ມອາຊຽນໃນປີນີ້່ ຈັດຂຶ້ນຢູ່ທີ່ປະເທດກຳປູເຈຍໃນລະຫວ່າງວັນທີ 27/07 – 09/08/2015 ເຊິ່ງທີມຊາດລາວ ເຮົາຖືກຈັດຢູ່ໃນກຸ່ມ A ປະກອບມີ:
ມາເລເຊຍ , ຫວຽດນາມ, ລາວ , ຕີມໍເລສເຕ , ບຣູໄນ , ໄທ .
