ຂ່າວລ່າສຸດ, ຂະນະສະເພາະກິດ ແລະ ກໍາລັງກອບກູ້ພາກພື້ນດິນ ກະຊວງປ້ອງກັນປະເທດລາວຢືນຢັນເວລາ 18: 30 ໂມງຕອນຄໍ່າຂອງວັນທີ 30 ກໍລະກົດ 2015 ນີ້ວ່າ: ເຈົ້າໜ້າທີ່ສະເພາະກິດສາມາດເຂົ້າເຖິງຈຸດຍົນ Mi-17 ແລະ ສາມາດກອບກູ້ເອົາສົບຜູ້ເສຍຊີວິດໄດ້ທັງໝົດ 23 ສົບ ປັດຈຸບັນນີ້ໄດ້ນໍາມາໄວ້ຢູ່ບ້ານຫລວງພັນໄຊ ເມືອງລ່ອງແຈ້ງ ແລະ ຄາດວ່າຈໍານວນ 23 ສົບຈະໄດ້ເຄື່ອນຍ້າຍມານະຄອນຫລວງວຽງຈັນໃນຕອນເຊົ້າຂອງວັນທີ 31 ກໍລະກົດ 2015ເພື່ອພິສູດເອກະລັກບຸກຄົນ ແລະ ສືບຕໍ່ທໍາພິທີທາງສາສະໜາ.
ຍົນລໍານີ້ໄດ້ບິນຂຶ້ນຈາກນະຄອນຫລວງວຽງຈັນໃນເວລາ 13:10 ໂມງ ຂອງວັນທີ 27 ກໍລະກົດ 2015 ເພື່ອໄປປະຕິບັດໜ້າທີ່ຢູ່ ແຂວງຊຽງຂວາງ-ຫົວພັນ ເມື່ອບິນໄປໄດ້ໄລຍະໜຶ່ງ ສູນຄວບຄຸມການບິນ ບໍ່ສາມາດຕິດຕໍ່ສື່ສານກັບຍົນລຳດັ່ງກ່າວ ເຊິ່ງມີຈຸບິນ 4 ຄົນ ແລະ ຜູ້ໂດຍສານ 19 ຄົນ.
ດ້ວຍຄວາມເຄົາລົບ ທີມຂ່າວເຮົາບໍ່ສາມາດເຜີຍແຜ່ຮູບບາງຮູບໄດ້ ແລະຮູບຍົນທີ່ຕົກໃນປ່າດົງເລິກນັ້ນ ນັກຂ່າວບໍ່ສາມາດເຂົ້າໄປຖ່າຍໄດ້ ເພາະເປັນເຂດທຸລະກັນດານ
ຂໍ້ມູນຈາກ: ຂ່າວສານປະເທດລາວ