ພາຍຫຼັງຝົນຕົກຕິດຕໍ່ກັນມາຫຼາຍວັນ ເຮັດໃຫ້ຫຼາຍພື້ນທີ່ໂດຍສະເພາະແມ່ນເຂດ ດິນຕ່ຳເກີດນ້ຳຖ້ວມຂັງ ດັ່ງມື້ນີ້ ວັນທີ 30 ກໍລະກົດ 2015 ນັກຂ່າວທ້ອງຖິ່ນໄດ້ລາຍງານ ເຂົ້າສູ່ກອງບັນນາທິການຂ່າວຂອງ ເວັບໄຊລາວໂພສຕ໌ ລະບຸວ່າ ການເດິນທາງແຕ່ເຂດຜັກເບືອກ-ເມືອງເກົ່າ ເມືອງບໍລິຄັນ ແຂວງບໍລິຄຳໄຊ ແມ່ນມີນ້ຳຖ້ວມຂັງເປັນຍ່ານໆ ແລະຍ່ານທີ່ບໍ່ຖ້ວມກໍເປັນຕົມ ເຊິ່ງການເດິນທາງຕ້ອງມີທັງຂີ່ເຮືອ, ຂີ່ແພ ແລະຍ່າງດ້ວຍຕີນເປົ່າ.
ເຂດທີ່ນ້ຳຖ້ວມກວ້າງຂວາງແມ່ນ ບ້ານທົ່ງພັນຄຳ ເມືອງບໍລິຄັນ ແຂວງບໍລິຄຳໄຊ ກາງບ້ານມີນ້ຳຖ້ວມຂັງເລິກພໍສົມຄວນ ກະທົບຕໍ່ການດຳລົງຊີວິດ ແລະຖ້ວມພື້ນທີ່ການຜະລິດຂອງປະຊາຊົນ ເປັນຈຳນວນຫຼວງຫຼາຍ.
