ວັນທີ 5 ສິງຫາ 2013 ນີ້ ຢູ່ທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ອິວ ກາກໂມນາ ເອກອັກຄະລັດຖະທູດຝຣັ່ງຄົນໃໝ່ ປະຈຳ ສປປ ລາວ.
ໂອກາດນີ້ ທ່ານ ບໍ່ແສງຄຳ ວົງດາລາ ກໍໄດ້ໃຫ້ການຕ້ອນຮັບ ແລະ ສະແດງຄວາມຊົມເຊີຍທີ່ທ່ານ ອິວ ກາກໂມນາ ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດ ຜູ້ມີອຳນາດເຕັມແຫ່ງປະເທດຝຣັ່ງ ປະຈຳ ສປປ ລາວ ເຊິ່ງຈະເປັນການເສີມຂະຫຍາຍສາຍພົວພັນຮ່ວມມືຊ່ວຍເຫຼືອລະຫວ່າງ ລາວ-ຝຣັ່ງ ທີ່ມີມາແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ.
ທັງແຂກ ແລະ ເຈົ້າພາບ ກໍໄດ້ສົນທະນາກັນຫຼາຍບັນຫາ ເປັນຕົ້ນແມ່ນການຮ່ວມມືການຊ່ວຍເຫຼືອຂອງລັດຖະບານຝຣັ່ງໃຫ້ແກ່ລັດຖະບານລາວ ໂດຍສະເພາະ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໃນຫຼາຍວຽກງານເຊັ່ນ: ວຽກງານໂຄສະນາຂ່າວສານ ມີໜັງສືພິມພາສາຝຣັ່ງ ມີລາຍການວິທະຍຸໂທລະພາບພາກພາສາຝຣັ່ງ ໂຄງການປົກປັກຮັກສາມູນມໍລະດົກແຫ່ງຊາດ ສຸມໃສ່ປົກປັກຮັກສາສະຖານທີ່ທ່ອງທ່ຽວເມືອງມໍລະດົກໂລກ ຫຼວງພະບາງ ແລະ ວັດພູຈຳປາສັກ ແລະ ຍັງຈະສະໜັບສະໜູນໃຫ້ສະຖານທີ່ທ່ອງທ່ຽວຫີນໝາມໜໍ່ ແຂວງຄຳມ່ວນ ເຂົ້າເປັນມໍລະດົກໂລກ ນອກຈາກນີ້ ໂຄງການຕໍ່ໜ້າ ທາງສະຖານທູດຍັງຈະໃຫ້ການສະໜັບສະໜູນ ໃນການເຝິກອົບຮົມວຽກງານໂຄສະນາຂ່າວສານ ແລະ ໂຄງການສອນພາສາຝຣັ່ງທາງໂທລະພາບຕື່ມອີກ.
ທ່ານ ອິວ ກາກໂມນາ ເອກອັກຄະລັດຖະທູດຝຣັ່ງ ປະຈຳ ສປປ ລາວ ກໍໄດ້ສະແດງຄວາມຂອບອົກຂອບໃຈຕໍ່ທ່ານລັດຖະມົນຕີຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທີ່ໄດ້ໃຫ້ການຕ້ອນຮັບ ແລະ ຈະສືບຕໍ່ໃຫ້ການຊ່ວຍເຫຼືອໃນຕໍ່ໜ້າ.
ຈາກນັ້ນ ທ່ານລັດຖະມົນຕີ ກໍໄດ້ອວຍພອນໃຫ້ທ່ານທູດ ປະສົບຜົນສຳເລັດໃນການປະຕິບັດໜ້າທີ່ວຽກງານຂອງທ່ານ