ທຸກມື້ນີ້ລົດຫລາຍເປັນສິ່ງທີ່ຈຳເປັນໃນຊີວິດຂອງໃຜຫລາຍໆຄອບຄົວແລະເກືອບຈະທຸກຄົນ ແລະເມື່ອເກີດເຫດການສຸກເສີນນັ້ນອາດຈະມີໜ້ອຍກວ່າຈຳນວນຄົົນທີ່ໃຊ້ລົດ ແລະຖ້າເວລາລົດເຈົ້າມີບັນຫາເດ ເຈົ້າອາດຈະຕ້ອງການສິ່ງທີ່ຈຳເປັນໃນເບື້ອງຕົ້ນ ໂດຍສະເພາະເມື່ອຕ້ອງເດິນທາງຄົນດຽວ ລອງມາເບິ່ງສິວ່າມີຫຍັງແດ່
ຢາງແລະລໍ້ສຳຮອງ –ເຈົ້າອາດຈະບໍ່ຄິດວ່າຢາງແລະລໍ້ສຳຮອງເປັນສິ່ງທີ່ຈຳເປັນສຳລັບລົດ ແຕ່ເມື່ອໃດກໍຕາມທີ່ເດິນທາງໄກ ຢາງແລະລໍ້ສຳຮອງຈະມີປະໂຫຍດຫລາຍ ໂດຍສະເພາະເມື່ອອາດຈະຄາດບໍ່ເຖິງວ່າຢາງລົດຈະແບນຫລືແຕກ ຢາງສຳຮອງຈະຊ່ວຍເຈົ້າໄດ້ຫລາຍໃນການຝ່າຟັນບັນຫາ ແຕ່ກໍອີກນັ້ນແຫລະ ເຈົ້າກໍຄົງຕ້ອງໝັ່ນເບິ່ງແຍງຢາງສຳຮອງນີ້ແດ່ ໂດຍປົກກະຕິ ລົດທຸກຄັນຈະມີຄ່າລົມຢາງອະໄຫລ່ບອກສະເໝີແລະໃຫ້ເຈົ້າກວດສອບເປັນປະຈຳທຸກ 3 ເດືອນ ເພື່ອໃຫ້ມີສະພາບພ້ອມໃຊ້ງານຍາມຕ້ອງການ
ແມ່ແຮງແລະເຄື່ອງມືປະຈຳລົດ – ເມື່ອມີຢາງອະໄຫລ່ແລ້ວສິ່ງທີ່ຂາດບໍ່ໄດ້ກໍຄົງບໍ່ພົ້ນເຄື່ອງມືໃນການເຮັດວຽກ ເຊີ່ງຕາມຫລັກໃນລົດທຸກຄັນຈະມີມາໃຫ້ຢູ່ແລ້ວ ໂດຍເຄື່ອງມືທີ່ສຳຄັນສຸດກໍຄົງບໍ່ພົ້ນບຣັອກຫັນລໍ້ ແລະ ໃນລົດບາງລຸ້ນລວມເຖິງອຸປະກອນຖອດຢາງອະໄຫລ່ ເຊີ່ງຈຳເປ້ນຕ້ອງໃຊ້ຄູ່ກັບຊຸດຢາງອະໄຫລ່ ໃນການປ່ຽນລໍ້ ແລະທີ່ສຳຄັນຄືຊຸດແມ່ແຮງ
ປ້າຍສັນຍານເຕືອນ – ບ້ານເຮົາອາດຈະບໍ່ມີໃຜຄິດເຖິງປ້າຍສັນຍານເຕືອນຫລືທີ່ຄົນໃຊ້ລົດບາງຄົນເອີ້ນວ່າປ້າຍສາມຫລ່ຽມ ເຊີ່ງປ້າຍນີ້ມີປະໂຫຍດຫລາຍ ຍິ່ງໃນຍາມກາງຄືນ ເພາະປ້າຍຈະປະກອບດ້ວຍຊຸດທັບທິມສະທ້ອນແສງ ຊ່ວຍໃຫ້ລົດທີ່ແລ່ນຕາມມາເຫັນປ້າຍເພື່ອຫລົບຫລີກເຮົາ ໂດຍສະເພາະໃຜທີ່ອອກຕ່າງແຂວງເລື້ອຍໆ ຫາຊື້ເອົາໄວ້ກໍມີປະໂຫຍດຄືກັນ ເຊີ່ງການໃຊ້ງານນັ້ນ ໃຫ້ຕັ້ງຫ່າງຈາກຈຸດທີ່ລົດເຮົາຢູ່ປະມານ 50-100 ແມັດ
ໄຟສາຍ – ເຄື່ອງມືສ່ອງສະຫວ່າງສະເພາະກິດຄວນມີຕິດລົດເອົາໄວ້ໃນກໍລະນີທີ່ເຈົ້າຕ້ອງໃຊ້ງານມັນໃນຍາມຄ່ຳຄືນ ໂດຍສະເພາະໃຜທີ່ມັກເຮັດນັ້ນນີ້ຕົກປະຈຳ ໄຟສາຍຈະຊ່ວຍໃຫ້ເຈົ້າຫາຂອງພົບໄດ້ງ່າຍຂຶ້ນ ຫລືຍາມລົດເພ ເຈົ້າຍັງສາມາດໃຊ້ມັນສົ່ງສັນຍານ ໃຫ້ຜູ້ທີ່ຂັບຂີ່ຕາມມາຈອດຮັບຫລືຂໍຄວາມຊ່ວຍເຫລືອ ຫລືສົ່ງສັນຍານໃຫ້ຫລີກທາງຈາກຈຸດທີ່ລົດເພຢູ່ກໍໄດ້
ສາຍພ່ວງແບດເຕີລ໌ລີ່ – ແບດເຕີລ໌ລີ່ເປັນຕົວຈ່າຍໄຟທີ່ສຳຄັນ ແຕ່ບາງເທື່ອເມື່ອລົດທີ່ຂັບມີອາຍຸຫລາຍຂຶ້ນກໍຈະປະຕິເສດບໍ່ໄດ້ວ່າ ມັນຍ່ອມມີອາການຂອງແບດເຕີລ໌ລີ່ເສື່ອມ ໂດຍສະເພາະລົດທີ່ມີອາຍຸຕັ້ງແຕ່ 2 ປີຂຶ້ນໄປ ການພົກ ສາຍພ່ວງແບດເຕີລ໌ລີ່ເອົາໄວ້ ຕໍ່ພ່ວງຫາກເຈົ້າສະຕາດເຄື່ອງບໍ່ຕິດນັ້ນກໍໜ້າຈະເປັນຄວາມຄິດທີ່ດີເຊັ່ນກັນ ເຊີ່ງວິທີການໃຊ້ກໍພຽງຄີບສີແດງເຂົ້າຂົ້ວບວກຂອງລົດ ແລ້ວຄີບສີດຳເຂົ້າແຕ່ລະຂົ້ວລົບຂອງລົດແລ້ວລໍຖ້າກ່ອນຈະສະຕາດລົດ…
ທີ່ທຸບກະຈົກແລະຕັດເຂັມຂັດນິລະໄພ – ປະຈຸບັນນອກຈາກອຸປະກອນທີ່ຊ່ວຍເຮົາໄດ້ໃນຍາມລົດເພແລ້ວ ອຸປະກອນໃນການຊ່ວຍຊີວິດກໍເປັນເລື່ອງທີ່ສຳຄັນເຊັ່ນກັນ ແລະໜຶ່ງໃນຫລາຍສິ່ງທີ່ແນະນຳໃຫ້ພົກຕິດລົດ ເພາະໜ້າຈະມີໂອກາດໄດ້ໃຊ້ນັ້ນຄື ທີ່ທຸບກະຈົກ ເຊີ່ງມັກຈະມາພ້ອມທີ່ຕັດເຂັມຂັດນິລະໄພໃນຕົວ
ເຄື່ອງມືອັນນີ້ສາມາດຫາຊື້ໄດ້ທົ່ວໄປແລະຈະມີປະໂຫຍດຫລາຍໃນຍາມທີ່ເຮົາຢູ່ໃນສະຖານະການສຸກເສີນ ເຊັ່ນ ລົດຕົກນ້ຳ ຫລື ລົດເກີດອຸບັດເຫດຈົນບໍ່ສາມາດປົດເຂັມຂັດອອກຈາກເບົ້າລັອກໄດ້ ເຊີ່ງເຄື່ອງມືທີ່ວ່ານີ້ຈະຊ່ວຍໃຫ້ຫລຸດຈາກສະຖານະການໄດ້ຢ່າງງ່າຍດາຍ
ທັງ 6 ເຄື່ອງມືທີ່ເໝາະແກ່ການຕິດລົດນີ້ ອາດຈະບໍ່ແມ່ນສິ່ງທີ່ສຳຄັນເທົ່າໃດຕໍ່ການຂັບຂີ່ ແຕ່ໃນຍາມສຸກເສີນຫລືຈຳເປັນ ເຄື່ອງມືພວກນີ້ອາດຈະຊ່ວຍເຈົ້າໄດ້ ໂດຍສະເພາະໃນຍາມທີ່ຕ້ອງການໃຊ້ ເຈົ້າຄວນຈະມີຕິດລົດໄວ້ດີກວ່າທີ່ເມື່ອຈະໃຊ້ແລ້ວບໍ່ມີໃຫ້ໃຊ້