ວັນທີ 5 ສິງຫາ 2013 ນີ້ ສຳນັກງານປົກຄອງນະຄອນຫຼວງວຽງຈັນ ທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະ ໄດ້ໃຫ້ການຕ້ອນຮັບທ່ານ ວິລັດ ລິ້ມສຸວັດ ເຈົ້າແຂວງໜອງຄາຍ ປະເທດໄທ ພ້ອມດ້ວຍຄະນະ ເນື່ອງໃນໂອກາດເດີນທາງມາພົບປະ ເພື່ອສະເໜີແຜນກະກຽມການຈັດງານສະເຫຼີມສະຫຼອງ ຄົບຮອບ 20 ປີ ການສ້າງຕັ້ງດ່ານສາກົນຂົວມິດຕະພາບ ລາວ-ໄທ 1.
ໃນໂອກາດນີ້ ທ່ານເຈົ້າຄອງນະຄອນຫຼວງວຽງຈັນ ກໍໄດ້ກ່າວຕ້ອນຮັບຢ່າງອົບອຸ່ນຕໍ່ການເຂົ້າພົບປະຂອງທ່ານເຈົ້າແຂວງໜອງຄາຍ ເຊິ່ງສະແດງອອກເຖິງການຮັດແໜ້ນສາຍພົວພັນມິດຕະພາບ ລະຫວ່າງສອງປະເທດ ເວົ້າສະເພາະກໍແມ່ນແຂວງໜອງຄາຍ ແລະ ນະຄອນຫຼວງວຽງຈັນ ໂດຍທັງສອງຝ່າຍກໍໄດ້ຮ່ວມປຶກສາຫາລືກ່ຽວກັບການກະກຽມຈັດກິດຈະກຳຕ່າງໆ ເພື່ອສະເຫຼີມສະຫຼອງ ຄົບຮອບ 20 ປີ ການສ້າງຕັ້ງດ້ານສາກົນຂົວມິດຕະພາບ ລາວ-ໄທ 1 ໃຫ້ມີບັນຍາກາດຟົດຟື້ນ ແລະ ເຕັມໄປດ້ວຍຄວາມໝາຍຄວາມສຳຄັນ.