ທ່ານ ພູຂຽວ ຈັນທະສົມບູນ ຫົວໜ້າຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ໄດ້ໃຫ້ຖະແຫຼງຂ່າວຕໍ່ສື່ມວນຊົນ ໃນວັນທີ 31 ກໍລະກົດ 2013 ກ່ຽວກັບວັນມີຜົນບັງຄັບໃຊ້ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານວ່າ: ວັນທີ 1 ສິງຫາ ແມ່ນວັນທີ່ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານມີຜົນບັງຄັບໃຊ້ ຄົບຮອບ 3 ປີເຕັມ.
ໃນວັນທີ່ມີຄວາມໝາຍປະຫວັດສາດ ສປປ ລາວ ແລະ ບັນດາປະເທດໃນໂລກ ຈະໄດ້ພ້ອມສະເຫຼີມສະຫຼອງເພື່ອລະນຶກເຖິງຄວາມສຳຄັນຂອງສົນທິສັນຍາດັ່ງກ່າວ ເພື່ອສະແດງເຖິງຄວາມສາມັກຄີເປັນຈິດໜຶ່ງໃຈດຽວກັນ ໃນການປະຕິບັດພັນທະສາກົນຕໍ່ມວນມະນຸດໃນໂລກ ແນໃສ່ເຮັດໃຫ້ໂລກຂອງພວກເຮົາເປັນໂລກແຫ່ງສັນຕິພາບ ສົນທິສັນຍາດັ່ງກ່າວ ໄດ້ຖືກເຊັນຮັບຮອງໃນປີ 2008 ຢູ່ທີ່ກຸງດັບບຼິນ ປະເທດໄອແລນ ໄດ້ຖືກປະກາດໃຫ້ມີຜົນບັງຄັບໃຊ້ຢ່າງເປັນທາງການ ໃນວັນທີ 1 ສິງຫາ 2010 ເປັນຕົ້ນມາ.
ສຳລັບ ສປປ ລາວ ຄາດວ່າ ລະເບີດລູກຫວ່ານທີ່ບໍ່ທັນແຕກຕົກຄ້າງມີເຖິງ 80 ລ້ານໜ່ວຍ ຊຶ່ງຕົກຄ້າງຢູ່ 14 ແຂວງ 98 ເມືອງ ກວມ 25 ສ່ວນຮ້ອຍ ຂອງບັນດາບ້ານໃນທົ່ວປະເທດ ສະເພາະ 46 ເມືອງທີ່ທຸກຍາກທີ່ສຸດນັ້ນ ກໍມີລະເບີດບໍ່ທັນແຕກຕົກຄ້າງຢູ່ 41 ເມືອງ ດ້ວຍປະໂຫຍດຂອງສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານໃນ 6 ເດືອນຕົ້ນປີ 2013 ພວກເຮົາກວດກູ້ເນື້ອທີ່ໄດ້ 1.880 ເຮັກຕາ ທຳລາຍລະເບີດບໍ່ທັນແຕກໄດ້ 37.127 ໜ່ວຍ ໃນນັ້ນ ລະເບີດລູກຫວ່ານມີ 20.809 ໜ່ວຍ ບົມໃຫຍ່ 136 ໜ່ວຍ ມິນ 22 ໜ່ວຍ (ຕົວເລກນີ້ແມ່ນນັບແຕ່ວັນທີ 1 ມັງກອນ ຮອດ 18 ກໍລະກົດ 2013 ຊຶ່ງຍັງບໍ່ໄດ້ລວມຕົວເລກລາຍງານຈາກບໍລິສັດເກັບກູ້ ລບຕ ເທື່ອ).
ແຕ່ນີ້ເຖິງປີ 2015 ວຽກງານແກ້ໄຂບັນຫາລະເບີດບໍ່ທັນແຕກ ຈະເປັນບາດກ້າວທີ່ມີຄວາມທ້າທາຍອັນໃໝ່ ທີ່ໜັກໜ່ວງກວ່າເກົ່າ ເຊິ່ງຮຽກຮ້ອງການປະກອບສ່ວນຊ່ວຍເຫຼືອຈາກບັນດາປະເທດຜູ້ໃຫ້ທຶນ ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງຕ່າງໆພາຍໃນປະເທດ ເພື່ອໃຫ້ການຊຸກຍູ້ວຽກງານແກ້ໄຂບັນຫາລະເບີດທີ່ບໍ່ທັນແຕກ ໃຫ້ບັນລຸຕາມຄາດໝາຍ.