ງານວາງສະແດງສິນຄ້າຈີນ-ອາຊຽນ (CAEXPO) ທີ່ເມືອງໜານໜິງ ແຂວງກວາງຊີ ສປ.ຈີນ ເປັນງານໜຶ່ງທີ່ມີຄວາມໝາຍສຳຄັນຕໍ່ບັນດາຫົວໜ່ວຍທຸລະກິດລາວ ທີ່ມີໂອກາດໃນການຊອກຫາຕະຫຼາດ ແລະ ຄູ່ຮ່ວມຄ້າ-ຂາຍຂອງຕົນ ໂດຍສະເພາະແມ່ນການນຳເອົາບັນດາສິນຄ້າທີ່ເປັນທ່າແຮງຂອງ ສປປ ລາວ ໄປເຈາະຕະຫຼາດຂອງ ສປ.ຈີນ ທັງເປັນການເພີ່ມມູນຄ່າການສົ່ງອອກ ແລະ ການເພີ່ມຂຶ້ນຂອງມູນຄ່າດ້ານການຄ້າ-ການລົງທຶນຂອງ ສປປ ລາວໃຫ້ສູງຂຶ້ນ.
ການເຂົ້າຮ່ວມງານ CAEXPO ໃນໄລຍະຜ່ານມາ ຖືວ່າ ສປປ ລາວ ໄດ້ຮັບຜົນສຳເລັດຫຼາຍສົມຄວນ ສະແດງອອກດ້ານການໂຄສະນາ (ເມືອງແຫ່ງສະເໜ) ຮ້ານວາງສະແດງແຫ່ງຊາດລາວ ໄດ້ຮັບລາງວັນເມືອງແຫ່ງສະເໜດີເດັ່ນ ແລະ ລາງວັນການຈັດຕັ້ງຂະແໜງອຸດສາຫະກຳດີເດັ່ນ ສຳລັບພາກທຸລະກິດກໍໄດ້ມີການເຊັນສັນຍາຊື້-ຂາຍສິນຄ້າກັບບັນດານັກທຸລະກິດຈີນຈຳນວນຫຼາຍສະບັບ ສະນັ້ນ ເພື່ອເປັນການສະໜັບສະໜູນໃຫ້ນະຄອນຫຼວງວຽງຈັນ ໃນການສ້າງສາລະຄະດີສ້າງຮູບແບບຈຳລອງເມືອງແຫ່ງສະເໜ ແລະ ວຽກງານການກະກຽມອື່ນໆເພື່ອເຂົ້າຮ່ວມໃນງານ CAEXPO ສຳລັບປີ 2013 (CAEXPO ຄັ້ງທີ 10) ທີ່ຈະຈັດຂຶ້ນໃນຕົ້ນເດືອນກັນຍາ 2013 ກໍໄດ້ມີຫຼາຍຫົວໜ່ວຍທຸລະກິດ ໄດ້ແຈ້ງເຈດຈຳນົງທີ່ຈະໃຫ້ການສະໜັບສະໜູນ ແລະ ໄດ້ມອບ-ຮັບໄປແລ້ວຈຳນວນໜຶ່ງ ສຳລັບປີນີ້ ບໍລິສັດ ຄຳທະນະພອນ ຄວັດແກະສະຫຼັກຫັດຖະກຳໄມ້ ຈຳກັດຜູ້ດຽວ ໄດ້ໃຫ້ການສະໜັບສະໜູນງານດັ່ງກ່າວຈຳນວນ 30 ລ້ານກີບ.
ພິທີມອບ-ຮັບເງິນດັ່ງກ່າວ ໄດ້ມີຂຶ້ນເມື່ອບໍ່ດົນມານີ້ ຢູ່ຫ້ອງວ່າການປົກຄອງນະຄອນຫຼວງວຽງຈັນ ເຊິ່ງມອບໂດຍທ່ານ ວິລັດ ປັນຍາລາດ ປະທານບໍລິສັດ ຄຳທະນະພອນ ຄວັດແກະສະຫຼັກຫັດຖະກຳໄມ້ ຈຳກັດຜູ້ດຽວ ແລະ ຮັບໂດຍທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ໂດຍຊ້ອງໜ້າພະນັກງານທີ່ກ່ຽວຂ້ອງ.