ກົດໝາຍອາກອນມູນຄ່າເພີ່ມ ໄດ້ຈັດຕັ້ງປະຕິບັດມາແຕ່ປີ 2007, ແຕ່ຍັງມີໂຮງແຮມ ເຮືອນພັກ ແລະ ຮ້ານອາຫານ ຈຳນວນໜຶ່ງ ຍັງບໍ່ປະຕິບັດຕາມລະບຽບກົດໝາຍດັ່ງກ່າວ ເປັນຕົ້ນ ບໍ່ນຳໃຊ້ໃບເກັບເງິນທີ່ຖືກຕ້ອງ, ນຳໃຊ້ໃບເກັບເງິນຂອງຕົນເອງ ໂດຍບໍ່ໄດ້ຮັບອະນຸຍາດຈາກຂະແໜງສ່ວຍສາອາກອນ, ບາງພາກສ່ວນເກັບອາກອນມູນຄ່າເພິ່ມໄວ້ ແລ້ວບໍ່ຍອມມອບເຂົ້າງົບປະມານ ມີການເຊື່ອງອຳລາຍຮັບ. ດັ່ງນັ້ນ ກອງປະຊຸມຄັ້ງນີ້ ເພື່ອໃຫ້ທຸກພາກສ່ວນໄດ້ນຳສະເໜີມາດຕະການແກ້ໄຂ ເພື່ອໃຫ້ການຄຸ້ມຄອງການເກັບອາກອນມູນຄ່າເພີ່ມ ແລະ ການນຳໃຊ້ໃບເກັບເງິນເປັນເອກະພາບກັນ.
ອາກອນມູນຄ່າເພີ່ມ (ອມພ) ແມ່ນອາກອນທາງອ້ອມ ເຊິ່ງເປັນພັນທະຂອງຜູ້ຊົມໃຊ້ສິນຄ້າ ແລະ ການບໍລິການ, ມີການຄິດໄລ່ເກັບ ແລະ ມອບຢ່າງຫລາຍຂອດແບບເປັນຕ່ອງໂສ້ ນັບແຕ່ຂອດນຳເຂົ້າສິນຄ້າ ການຂາຍສິນຄ້າ ແລະ ການບໍລິການຢູ່ດິນແດນ ສປປ ລາວ, ພື້ນຖານການຄິດໄລ່ ອມພ ມີ 2 ກໍລະນີຄື: ກໍລະນີທີ່ເປັນການນຳເຂົ້າສິນຄ້າ ໂດຍຜູ້ມອບ ອມພ ແມ່ນມູນຄ່າສິນຄ້າທີ່ນຳເຂົ້າບວກພາສີເຂົ້າ ບວກອາກອນຊົມໃຊ້ (ອກຊ) ບວກຄ່າທຳນຽມຕ່າງໆ ແລະ ອີກກໍລະນີໜຶ່ງ ແມ່ນນຳເຂົ້າສິນຄ້າໂດຍຜູ້ອື່ນທີ່ບໍ່ແມ່ນຜູ້ມອບ ອມພ ແມ່ນມູນຄ່າສິນຄ້າທີ່ນຳເຂົ້າບວກພາສີເຂົ້າ ບວກ ອກຊ ບວກຄ່າທຳນຽມຕ່າງໆ ບວກ ອາກອນກຳໄລລວມ. ສ່ວນລະບຽບໃນການໃຊ້ໃບເກັບເງິນ ແມ່ນແນໃສ່ຄຸ້ມຄອງການເກັບລາຍຮັບສ່ວຍສາອາກອນໃຫ້ຖືກຕ້ອງຄົບຖ້ວນຕາມຄວາມເປັນຈິງ ແລະ ໃຫ້ມີຄວາມເອກະພາບໃນທົ່ວປະເທດ ໃນຂອບເຂດການນຳໃຊ້ເຊັ່ນ: ບຸກຄົນ, ນິຕິບຸກຄົນ ຜູ້ທີ່ດຳເນີນທຸລະກິດ ຫລື ອົງການຈັດຕັ້ງຕ່າງໆ ທີ່ມີການພົວພັນໃນການຊື້-ຂາຍສິນຄ້າເຄື່ອງຂອງ ຫລື ການບໍລິການຢູ່ໃນດິນແດນ ສປປ ລາວ./.
ແຫຼ່ງຂ່າວ: ຂ່າວສານປະເທດລາວ