ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງອຸດສາຫະ ກຳ ແລະ ການຄ້າ ໄດ້ຕອບຂໍ້ຂ້ອງໃຈຂອງປະຊາຊົນທີ່ໂທລະສັບຜ່ານສາຍດ່ວນສະພາແຫ່ງຊາດ ເຊິ່ງມີຫລາຍໆບັນຫາ, ໃນນີ້ ປະຊາຊົນບ້ານໜອງບົວແດງ, ເມືອງຮຸນ ແຂວງອຸດົມໄຊ ສະເໜີບັນຫາຢ່າງພາລາ ບໍ່ມີຕະຫລາດຮອງຮັບ. ຕໍ່ບັນຫາດັ່ງກ່າວ ທ່ານໄດ້ຊີ້ແຈງວ່າ: ໃນໄລຍະຜ່ານມາ ລາຄາຢາງພາລາຕົກຕ່ຳຫລາຍ, ເນື່ອງຈາກຄວາມຮຽກຮ້ອງຕ້ອງການຕະຫລາດຫລຸດລົງ, ສົ່ງຜົນກະທົບຕໍ່ຜູ້ປະກອບການຢ່າງໜັກໜ່ວງ ແລະ ໄດ້ສ້າງຄວາມຕ່ຳຄ້ອຍນ້ອຍໃຈໃຫ້ຊາວສວນບໍ່ໜ້ອຍ, ຍ້ອນວ່າປະຊາຊົນໃນແຂວງພາກເໜືອໄດ້ພາກັນຫັນມາປູກຢາງພາລາຫລາຍສົມຄວນ, ໂດຍສະເພາະແຂວງຫລວງນ້ຳທາ,ອຸດົມໄຊ ແລະ ແຂວງວຽງຈັນ. ໃນໄລຍະເລີ່ມຕົ້ນ ລາຄາຢາງແມ່ນສູງສົມຄວນ ແຕ່ຕົກມາປີກາຍນີ້ ເຫັນວ່າລາຄາຢາງຫລຸດລົງຫລາຍ ສະເລ່ຍ 6-7 ພັນກີບ/ກິໂລ, ແຕ່ກໍຍັງບໍ່ມີຜູ້ຊື້ ຍ້ອນ 2 ເຫດຜົນຄື: ບໍ່ທັນເຖິງເວລາທີ່ພໍ່ຄ້າມາຊື້ເທື່ອ ແລະ ຊາວສວນຢາງເອງ ຍັງຂາດຂໍ້ມູນດ້ານຕະຫລາດບໍ່ຮູ້ຈະໄປຂາຍໃຫ້ໃຜ.
ທ່ານກ່າວຕື່ມວ່າ: ເພື່ອແກ້ໄຂບັນຫາດັ່ງກ່າວ ທາງກະຊວງການຄ້າ ໄດ້ມອບໃຫ້ເຈົ້າຂອງສວນຢາງພາລາ ເຂົ້າໄປຫາພະແນກອຸດສາຫະກຳ ແລະ ການຄ້າແຂວງ ຫລື ຫ້ອງການການຄ້າເມືອງ ເພື່ອໃຫ້ເຈົ້າໜ້າທີ່ກ່ຽວຂ້ອງແນະນຳໃຫ້ບັນດາບໍລິສັດຂອງຈີນ, ໂຮງງານປຸງແຕ່ງຢ່າງພາລາຂອງຈີນ ທີ່ມາຕັ້ງຢູ່ແຂວງອຸດົມໄຊ ຫລື ແຂວງໃກ້ຄຽງມາເກັບຊື້, ພ້ອມດຽວກັນນັ້ນ ເຈົ້າຂອງສວນທີ່ກີດຢາງພາລາ ກໍຕ້ອງເປັນເຈົ້າການ ໃນເວລາຜະລິດສິນຄ້າຫລື ກີດຢາງກໍຕ້ອງມີເປົ້າໝາຍຂອງຕົນເອງ ເພື່ອຜະລິດອອກແລ້ວ ຈະຂາຍໃຫ້ໃຜ, ຂາຍລາຄາເທົ່າໃດ ແລະ ເວລາໃດ? ແລະ ຕ້ອງກຳຈຸດພິເສດຂອງລາຄາການເກັບຊື້ຢາງໃນທ້ອງຖິ່ນນັ້ນໆ ເຊິ່ງພັກ-ລັດຖະບານເຮົາ ກໍໄດ້ແນະນຳຢ່າງລະອຽດແລ້ວ, ໂດຍສະເພາະການຜະລິດສິນຄ້າ ກໍຕ້ອງຕິດພັນກັບຕະຫລາດ ແລະ ຕ້ອງເປັນເຈົ້າການຕົນເອງ. ພ້ອມນີ້ ຊາວສວນຢາງກໍຕ້ອງມີຄວາມຮູ້ເລື່ອງການຕະຫລາດຖ້າປີໃດລາຄາຢາງຕົກຕ່ຳ, ບໍ່ຄຸ້ມຄ່າໃນການຈ້າງແຮງງານ ກໍບໍ່ຕ້ອງກີດຢາງ ລໍຖ້າໄວ້ລະດູການຕໍ່ໄປ ເນື່ອງຈາກອາຍຸການໃຊ້ງານຂອງຕົ້ນຢາງ ມີເຖິງ 40 ປີ. ຄຽງຄູ່ກັນນີ້ ທາງກະຊວງອຸດສາຫະກຳ ແລ ການຄ້າ ກໍໄດ້ຊອກຫາວິທີເພື່ອຊ່ວຍຊາວສວນ ໂດຍການນຳເອົາຢາງມາປຸງແຕ່ງໃຫ້ເປັນຜະລິດຕະພັນເຄິ່ງສຳເລັດຮູບ ຫລື ສຳເລັດຮູບ ເພື່ອໃຫ້ໄດ້ຮັບຄຸນນະພາບຂອງຢ່າງ ແລະ ຫລີກເວັ້ນລາຄາຕົກຕ່ຳອີກດ້ວຍ.
ຂອບໃຈຂ່າວຈາກ: ລາວພັດທະນາ