“ ເຮືອໃບສີຟ້າ ” ແມນຊິຕີ້ ດວນຈຸດໂທດສາມາດເອົາຊະນະ “ ໝາປ່າ ” ໂຣມາ ໄປໄດ້ 5-4 ປະຕູ ຫຼັງຈາກທີ່ສະເໝີກັນ 2-2 ໂດຍໃນນັດນີ້ ຣາຮີມ ສະເຕີລີ້ງ ປີກຕົວໃໝ່ຍິງປປະຕູທຳອິດໃຫ້ຕົ້ນສັງກັດໃໝ່ໄດ້ໃນການແຂ່ງຂັນ ອິນເຕີເນຊັ່ນແນວ ແຊມປ້ຽນ ຄັບ ທີ່ອົດສະຕາລີ ເມື່ອວັນອັງຄານວັນທີ 21 ກໍລະກົດ ທີ່ຜ່ານມາ.

ເປີດສາກເລີ່ມເກມພຽງ 3 ນາທີ ແມນຊິຕີ້ ກໍ່ໄດ້ປະຕູຂື້ນນຳ 1-0 ຢ່າງໄວຈາກຈັງຫວະທີ່ ເຄເລຊີ ໄອເຮີຍນາໂຊ ຍາດບານຢອດຂ້າມຫົວຜູ້ຫຼີ້ນ ໂຣມາ ໃຫ້ ຣາຮີມ ສະເຕີລິງ ຫຼຸດເຂົ້າໄປຍິງສວນກັບຕົວ ມໍແກນ ເດ ຊານຕິສ ເປັນປະຕູທຳອິດໃຫ້ເຮືອໃບສີຟ້າ

ແຕ່ອີກ 5 ນາທີຕໍ່ມາ ໝາປ່າ ມາໄດ້ປະຕູຕີສະເໝີເປັນ 1-1 ຈາກຈັງຫວະທີ່ ແຊວິນໂຢ້ ສົ່ງບານໄປທາງຂວາໃຫ້ ມາຣາເລມ ປະຍານິຊ ແຕ່ງບານ 1 ຈັງຫວະ ກ່ອນຍິງໄກດ້ວຍຂວາບານເຂົ້າປະຕູໄປຢ່າງສວຍງາມ ຈົບເຄີ່ງເວລາທຳອິດສະເໝີກັນ 1-1 ປະຕູ

ມາຕໍ່ກັນທີ່ເຄີ່ງເວລາທີ 2 ນາທີທີ 51 ແມນຊິຕີ້ ຂື້ນນຳອີກຄັ້ງ 2-1 ປະຕູ ຈາກຈັງຫວະທີ່ ແອຊລີ່ ໂຄລ ຈ່າຍບານຄືນຫຼັງພາດໄປໃຫ້ທາງ ເຄເລຊີ ໄອເຮີຍນາໂຊ ແປເຂົ້າໄປໃນປະຕູຢ່າງງາມ

ໂຣມາ ຍັງບໍ່ຍອມແພ້ງ່າຍໆ ກ່ອນໝົດເວລາ 3 ນາທີ ມາໄດ້ປະຕູຕີສະເໝີເປັນ 2-2 ປະຕູຈາກລູກຟຣີຄິກໜ້າເຂດໂທດໂດຍ ອະເດມ ລາຍິຊ ປັ່ນດ້ວຍຂວາບານຂ້າມກຳແພງເກີນທີ່ ໂຈ ຮາທ ຈະຮັບໄດ້ ສ່ວນເວລາທີ່ເຫຼືອບໍ່ມີປະຕູເພີ່ມຂື້ນຈົບ 90 ນາທີສະເໝີກັນໄປ 2-2 ຕ້ອງຕັດສິນດ້ວຍລູກໂທດ