ອຸປະຕິເຫດເກີດຂຶ້ນໄດ້ທຸກເວລາທຸກນາທີ ຖ້າພວກເຮົາຫາກປະໝາດ ແລະ ຂາດສະຕິ ບໍ່ປະຕິບັດກົດລະບຽບຈະລາຈອນ ຄືອຸປະເຫດລາຍນີ້ເກີດຂຶ້ນຕອນເຊົ້າຂອງວັນທີ 29 ເມສາ 2013 ເວລາປະມານ 7:00 ໂມງ ຢູ່ເສັ້ນທາງຫົວຂົວ-ນາຄວາຍເຂດບ້ານໂນນຄໍ້ເໜືອ ເມືອງໄຊເຊດຖາ ນະຄອນຫຼວງວຽງຈັນ ຊຶ່ງເປັນເວລາຮີບດ່ວນທີ່ຄົນໄປວຽກໄປການ.
ອຸປະຕິເຫດລາຍນີ້ແມ່ນລົດໃຫຍ່ 10 ລໍ້ຕຳກັບລົດຈັກ ໃນສະພາບທີ່ຫວາດສຽວພໍສົມຄວນຄື ຕີນໜ້າເບື້ອງຊ້າຍຂອງລົດໃຫຍ່ ຢຽບລົດຈັກຢູ່ ຄືພວກເຮົາເຫັນຢູ່ໃນຮູບພາບນີ້ ເຫັນສະພາບທີ່ເກີດຂຶ້ນແລ້ວ ຫຼາຍຄົນຄົງຄິດວ່າຜູ້ຂັບຂີ່ລົດຈັກອາດຈະເຖິງຂັ້ນເສຍຊີວິດ ຫຼື ອາດຈະບາດເຈັບໜັກ ແຕ່ອຸປະຕິເຫດຄັ້ງນີ້ໂຊກດີທີ່ບໍ່ມີຜູ້ເສຍຊີວິດ ມີແຕ່ຜູ້ຂັບຂີ່ລົດຈັກບາດເຈັບພຽງເລັກໜ້ອຍເທົ່ານັ້ນ.
ເຫດການທີ່ບໍ່ເພິ່ງປາດຖະໜາຄັ້ງນີ້ ເປັນຄະຕິເຕືອນໃຈໃຫ້ທຸກຄົນຮູ້ວ່າ ເວລາຂັບຂີ່ພາຫະນະຕາມທ້ອງຖະໜົນ ກ່ອນອື່ນກໍຕ້ອງໃຫ້ກຽດເຊິ່ງກັນ ແລະ ກັນ ບໍ່ປະໝາດ ບໍ່ຂາດສະຕິ ເມົາແລ້ວບໍ່ຂັບ ແລະ ຄ່ອຍໄປຄ່ອຍມາ ໂດຍສະເພາະແມ່ນຕ້ອງເຂັ້ມງວດຕໍ່ການປະຕິບັດກົດລະບຽບຈະລາຈອນ ແລ່ນໃຫ້ຖືກຊ່ອງທາງຂອງຕົນ ແລະ ເວລາຈະລ້ຽວຊ້າຍ ລ້ຽວຂວາ ຫຼື ຈະຂ້າມທາງ ກໍຕ້ອງເປີດໄຟສັນຍານ ພ້ອມທັງຫຼຽວເບິ່ງລົດທາງໜ້າ ແລະ ທາງຫຼັງ ວ່າມີຄວາມຮັບປະກັນແລ້ວບໍ ຈຶ່ງຂ້າມ ຖ້າພວກເຮົາຫາກປະຕິບັດໄດ້ຄືແນວນີ້ ອຸປະຕິເຫດຈະບໍ່ເກີດຂຶ້ນກັບຕົວເຮົາເອງ ແລະ ຜູ້ອື່ນເດັດຂາດ.