ເພື່ອເປັນການຫວນຄືນມູນເຊື້ອວັນກຳມະກອນສາກົນ ທີ່ຈະໜູນວຽນມາບັນຈົບຄົບຮອບ 127 ປີ (1/5/1886-1/5/2013) ໃນວັນທີ 29 ເມສາ 2013 ຢູ່ທີ່ກະຊວງຍຸຕິທຳໄດ້ ຈັດພິທີປາຖະກະຖາມູນເຊື້ອວັນກຳມະກອນສາກົນຂຶ້ນ ໃຫ້ກຽດບັນລະຍາຍເອກະສານສຳຄັນຂອງທ່ານ ພູທອນ ແກ້ວດວງມະນີ ຄະນະພັກ ຫົວໜ້າຫ້ອງການ ປະທານສະຫະພັນກຳມະບານກະຊວງຍຸຕິທຳ ເຊິ່ງມີບັນດາຄະນະພັກກະຊວງ ພະນັກງານຫຼັກແຫຼ່ງ ສະມາຊິກກຳມະບານ ແລະ ພະນັກງານອ້ອມຂ້າງກະຊວງເຂົ້າຮ່ວມຮັບຟັງ.
ໃນໂອກາດນີ້ ທ່ານ ພູທອນ ແກ້ວດວງມະນີ ໄດ້ເລົ່າຫວນຄືນປະຫວັດຄວາມເປັນມາຂອງວັນກຳມະກອນສາກົນ ການກຳເນີດເຕີບໃຫຍ່ ແລະ ຜົນງານການປະກອບສ່ວນໃນພາລະກິດປະຕິວັດໄລຍະທີ່ຜ່ານມາ ການຕໍ່ສູ້ຕ້ານລັດທິລ່າເມືອງຂຶ້ນ ການເສີມຂະຫຍາຍມູນເຊື້ອອັນດີງາມຂອງຊົນຊັ້ນກຳມະກອນລາວໃນໄລຍະໃໝ່ ເອົາໃຈໃສ່ສ້າງ ແລະ ພັດທະນາຊົນຊັ້ນກຳມະກອນໄລຍະໃໝ່ ຕິດພັນກັບການປັບປຸງກໍ່ສ້າງການຈັດຕັ້ງສະຫະພັນກຳມະບານ ເພີ່ມທະວີການກໍ່ສ້າງຊົນຊັ້ນກຳມະກອນໃຫ້ມີຄວາມເຕີບໃຫຍ່ເຂັ້ມແຂງ ເອົາໃຈໃສ່ໂຄສະນາສຶກສາອົບຮົມແນວທາງນະໂຍບາຍຂອງພັກ ຕິດພັນກັບຍຸດທະສາດການພັດທະນາເສດຖະກິດ-ສັງຄົມ ກົດໝາຍແຮງງານ ກົດໝາຍກຳມະບານ ແລະ ບັນດາຂໍ້ກຳນົດກົດໝາຍອື່ນໆຂອງລັດທີ່ພົວພັນເຖິງການປົກປ້ອງສິດ ແລະ ຜົນປະໂຫຍດຂອງຊົນຊັ້ນກຳມະກອນ ສ້າງສາພັດທະນາຄວາມຮູ້ຄວາມສາມາດໃຫ້ແກ່ກຳມະກອນຢ່າງບໍ່ຢຸດຢັ້ງ ປັບປຸງການກໍ່ສ້າງ ການຈັດຕັ້ງກຳມະບານໃຫ້ເຂັ້ມແຂງທາງດ້ານປະລິມານ ແລະ ຄຸນນະພາບ.
ຂ່າວແຈ້ງຕື່ມວ່າ: ໃນທ້າຍອາທິດທີ່ຜ່ານມາ ໃນຂົງເຂດການເງິນນະຄອນຫຼວງວຽງຈັນ ກໍໄດ້ຈັດປາຖະກະຖາຫວນຄືນມູນເຊື້ອວັນກຳມະກອນ ເປັນກຽດປາຖະກະຖາໂດຍທ່ານ ຄຳພັນ ຄຳມະນີໄຊ ປະທານສະຫະພັນກຳມະບານນະຄອນຫຼວງວຽງຈັນ ໂດຍມີທ່ານ ບຸນທົງ ໝັ້ນອານົງ ວ່າການຫົວໜ້າພະແນກສ່ວຍສາອາກອນປະຈຳນະຄອນຫຼວງວຽງຈັນ ພ້ອມດ້ວຍສາມອົງການຈັດຕັ້ງພະນັກງານອ້ອມຂ້າງເຂົ້າຮ່ວມ.