ຕາມແຫຼ່ງຂ່າວຈາກສຳນັກຂ່າວສານປະເທດລາວ ໃຫ້ຮູ້ວ່າ: ເມື່ອທ້າຍອາທິດຜ່ານມາ ນີ້ ກະຊວງແຮງງານ ແລະ ສັດຫວັດດີການສັງ
ຄົມ ໄດ້ການແກ້ໄຂບັນຫາຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ລາວ, ໂດຍການເຂົ້າຮ່ວມຂອງທ່ານ ດຣ ພັນຄຳ ວິພາວັນ ຮອງ
ນາຍົກລັດຖະມົນຕີ, ລັດຖະມົນຕີວ່າການກະຊວງ ສຶກສາທິການ ແລະ ກິລາ, ຜູ້ຊີ້ນຳວຽກງານຂົງເຂດວັດທະທຳ-ສັງຄົມ.
ໃນການດຳເນີນກອງປະຊຸມໄດ້ປຶກສາຫາລືທົບທວນການຈັດຕັ້ງປະຕິບັດແຜນງານການຂຶ້ນທະບຽນ ແລະ ການອອກບັດອະນຸຍາດຊົ່ວ
ຄາວໃຫ້ຄົນຕ່າງປະເທດທີ່ມາເຄື່ອນໄຫວແບບບໍ່ຖືກຕ້ອງຕາມລະບຽບກົດໝາຍຂອງ ສປປ ລາວ, ພ້ອມດຽວກັນນັ້ນຈະໄດ້ຄົ້ນຄວ້າແລະ
ປະກອບຄຳເຫັນຕໍ່ກັບຮ່າງບັດອະນຸຍາດເຄື່ອນໄຫວຊົ່ວຄາວຂອງຄົນຕ່າງປະເທດ ຢູ່ ສປປ ລາວ, ຮ່າງແຈ້ງການ ແລະ ຄຳສັ່ງແນະ
ນຳການຂຶ້ນທະບຽນ ແລະ ອອກບັດເຄື່ອນໄຫວຊົ່ວຄາວໃຫ້ຄົນຕ່າງປະເທດ, ຮ່າງຄູ່ມື ແລະ ລະບຽບການປະຕິບັດການຂຶ້ນທະບຽນ
ແລະ ອອກບັດຊົ່ວຄາວ ພ້ອມທັງການເກັບສະຖິຕິການຂຶ້ນຖະບຽນແຮງງານຄົນຕ່າງປະເທດໃຫ້ຖືກຕ້ອງຕາມລະບຽບກົດໝາຍ.
ກະຊວງ ແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ໃນປີ 2015 ໄດ້ມີຄົນຕ່າງປະເທດຈາກ ສສ ຫວຽດນາມ, ຈີນ, ໄທ
ແລະ ປະເທດອື່ນໆ ທີ່ເຂົ້າມາເຄື່ອນໄຫວທຳມາຫາກິນ, ຄ້າຂາຍ ແລະ ອອກແຮງງານ ຢູ່ລາວ ຫຼາຍກ່ວາ 30 ພັນຄົນ, ໃນນັ້ນຍັງ
ບໍ່ທັນມີບັດອະນຸຍາດເຮັດວຽກຢ່າງຖືກຕ້ອງຕາມລະບຽບກົດໝາຍ ກວ່າ 12 ພັນຄົນ, ກວມເອົາ 38,87% ຂອງຈຳນວນຄົນຕ່າງ
ປະເທດທັງໝົດທີ່ເຂົ້າມາເຄື່ອນໄຫວຢູ່ລາວ
ທ່ານ ຮອງນາຍົກລັດຖະມົນຕີ ດຣ ພັນຄຳ ວິພາວັນ ກ່າວວ່າ: ລັດຖະບານຖືບັນຫາການຄຸ້ມຄອງແຮງງານທີ່ເຂົ້າມາເຄື່ອນໄຫວ
ຢູ່ລາວ ເປັນບັນຫາສຳຄັນ, ຊຶ່ງການອອກບັດອະນຸຍາດໃຫ້ຄົນຕ່າງ ປະເທດເຄື່ອນໄຫວຢູ່ລາວຫັນເຂົ້າສູ່ລະບຽບກົດໝາຍ, ກໍເພື່ອ
ກຽມກ້າວສູ່ປະຊາຄົມເສດຖະກິດອາຊຽນໃນທ້າຍປີ 2015.
