ທ່ານ ຄຳມະນີ ອິນທິລາດ ລັດຖະມົນຕີຊ່ວຍວ່າການ ກະຊວງພະລັງງານ ແລະ ບໍ່ແຮ່ ກ່າວເມື່ອບໍ່ດົນນີ້ວ່າ: ຕໍ່ກັບຂໍ້ສະເໜີຂອງປະຊາຊົນ ບ້ານດອນໜູນ ເມືອງໄຊທານີນັ້ນ ລັດວິສາຫະກິດໄຟຟ້າລາວ ຫລື ຟຟລ ຈະກວດກາ ແລະ ວັດແທກ Load ດ້ານເຕັກນິກຕື່ມເພື່ອປັບປຸງເຊັ່ນ: ການຕິດຕັ້ງ C-Bank,ປ່ຽນຂະໜາດສາຍ, ຄາດໝາຍຈະໃຫ້ສຳເລັດໃນປີ 2015 ຕາມແຜນອະນຸມັດ ງົບປະມານຂອງ ຟຟລ, ຜ່ານການລົງກວດກາຕົວຈິງ ແລະ ສົມທົບກັບ ນາຍບ້ານໆດອນໜູນ ໄດ້ພົບເຫັນ ຢູ່ຮອມ 8/14 ບ້ານດອນໜູນ ທີ່ມີຊາຍແດນຕິດກັບ ບ້ານຫວ້ຍແດນເມືອງ ໃນປີຜ່ານມາ ສາຂາໄຟຟ້າເມືອງໄຊທານີ ກໍ່ໄດ້ສ້າງຕາຂ່າຍ 22 KV, ຕິດຕັ້ງໝໍ້ແບ່ງເສີມ 160 KVA, ປ່ຽນສາຍຕາຂ່າຍຈຳນວນໜຶ່ງແລ້ວ ປັດຈຸບັນ ຄວາມຕ້ອງການຊົມໃຊ້ໄຟເພີ່ມຂຶ້ນ, ສ່ວນຕາຂ່າຍຍັງບໍ່ໄດ້ປັບປຸງປ່ຽນ ສາຍນ້ອຍເປັນສາຍໃຫຍ່ ຍັງປະມານ 1,5 KM ແລະ ຢູ່ຮ່ອມ 8/6, 8/11 ຫລັງໂຮງພິມທະນະບັດ ແມ່ນມີແຜນປັບປຸງຕິດຕັ້ງໝໍ້ແປງເສີມ 100 KVA ແລະ ປັບປຸງຕາຂ່າຍ 0,4KV ໃນແຜນປີ 2015.
ທ່ານ ຄຳມະນີ ອິນທິລາດ ກ່າວຕື່ມວ່າ: ສຳລັບຂໍ້ສະເໜີຂອງປະຊາຊົນບ້ານຫ້ວຍງາ ເມືອງໂພນໄຊນີ້ ອີງຕາມຄຳຢືນຢັນ ຂອງທ່ານເຈົ້າເມືອງວ່າມີແຜນຍ້າຍ ບ້ານຫ້ວຍງາ ມາຢູ່ກັບກຸ່ມບ້ານຈອມຈຽງ, ຈາກຂໍ້ມູນບ້ານຫ້ວຍງາ ມີ 45 ຫລັງຄາເຮືອນ ຫ່າງຈາກທາງ 7 KM ປັນຈຸບັນ ບໍລິສັດສ້າງສັນ ກຳລັງກໍ່ສ້າງຕາຂ່າຍ ຄາດວ່າ ປີ 2016 ຈະປ່ອຍໄຟຟ້າໃຫ້ເຂດ ບ້ານຈອມຈຽງ ແຕ່ປັດຈຸບັນ ບ້ານຫ້ວຍງາ ແມ່ນຍັງບໍ່ທັນຍ້າຍມາຢູ່ກຸ່ມບ້ານຈອມຈ່ຽງເທື່ອ.
ກະຊວງພະລັງງານ ແລະ ບໍ່ແຮ່ ເຊື່ອໜັ້ນວ່າ ຖ້າຜູ້ຊົມໃຊ້ໄຟຟ້າປະຕິບັດ ຢ່າງເປັນເຈົ້າການນຳກັນ ໃນການຊົມໃຊ້ພະລັງງານໄຟຟ້າ ຢ່າງປະຫຍັດ ແລະ ຖືກວິທີການ ຫລື ຖືກຕ້ອງ ຕາມເຕັກນິກໄຟຟ້າລາວ ຈະເຮັດໃຫ້ພວກເຮົາມີຄວາມປອດໄພ, ປະຢັດເສດຖະກິດຄອບຄົວ ກໍຄື ສັງຄົມ ແລະ ປະເທດຊາດ ໃນແຕ່ລະມື້, ແຕ່ລະເດືອນ ແລະ ແຕ່ປີໄດ້ຢ່າງແນ່ນອນ.
ຂ່າວຈາກ: ສຳນັກຂ່າວສານປະເທດລາວ