ມຸກດາວັນ ສັນຕິພອນ ນັກຮ້ອງບ້ານນາ ທີ່ຖ້າເວົ້າເຖິງນ້ຳສຽງແລ້ວແຟນເພງ ນິຍົມຊົມຊອບທົ່ວບ້ານທົ່ວເມືອງ ໂດ່ງດັງຈົນສື່ສິ່ງພິມທຸກສະບັບ, ວິທະຍຸທຸກຄື້ນ, ໂທລະພາບທຸກຊ່ອງ ແລະລວມທັງສື່ອອນລາຍ ຕ້ອງໄດ້ສຳພາດແລະນຳສະເໜີຜົນງານຂອງເຂົາ ຈົນມຸກດາວັນ ສັນຕິພອນ ກາຍເປັນດາວໃນທ້ອງຟ້າເມືອງລາວ ໄປເປັນທີ່ຮຽບຮ້ອຍແຕ່ປີກາຍພຸ້ນ.
ຖ້າຄິດວ່າ ມຸກດາວັນ ເປັນດາລານັກຮ້ອງ ທີ່ມີຊື່ສຽງໂດ່ງດັງແລ້ວ ຄືວ່າເຂົາອາດຈະເປັນຄົນ ຖືເນື້ອຖືໂຕຫຼືຍີ່ງຍະໂສ ຄ່າໂຕແພງ ຄົງຈະໃຊ້ກັບ ດາລານັກຮ້ອງ ຜູ້ນີ້ບໍ່ໄດ້ສາແລ້ວ ເພາະນອກຈາກນາງ ຈະເປັນຄົນ ສຽງດີແລ້ວ ກິລິຍາທ່າທີທີ່ດີງາມ, ຄວາມອ່ອນນ້ອມຖ່ອມຕົນ, ຄວາມເປັນຄົນທຳມະດາສາມັນ ດຳລົງຊີວິດແບບພື້ນບ້ານ ດັ້ງເດີມ ເປັນຊີວິດຈິດໃຈ (ບໍ່ແມ່ນການສະແດງ) ເຊິ່ງເຮົາຈະສັງເກດເຫັນວ່ານາງຈະຮັບທຸກງານ ຢູ່ກັບແຟນເພງແບບເປັນກັນເອງ ສ່ວນເລື່ອງຄ່າໂຕ ມຸກດາວັນ ຮັບທຸກລາຄາ ຂໍແຕ່ວ່າມີເວລາແລະພໍຄ່ານ້ຳມັນ ກໍໄປແລ້ວ.
ຫຼ້າສຸດມີຂ່າວດີວ່າ ມຸກດາວັນ ກຳລັງອັດເພງຊຸດໃໝ່ຢູ່ ເຊິ່ງຄາດວ່າຈະໄດ້ຟັງພາຍຫຼັງອອກພັນສາປີນີ້ ຫຼືໄວກວ່ານັ້ນກໍເປັນໄດ້ ຈັ່ງໃດກໍຢ່າລືມຕິດຕາມນຳກັນເດີ!
