ເພື່ອແນໃສ່ເຮັດແນວໃດໃຫ້ການຈັດຕັ້ງປະຕິບັດວຽກງານ 3 ສ້າງທີ່ຂັ້ນເທິງວາງອອກໃຫ້ປະກົດຜົນເປັນຈິງ ພະແນກການເງິນນະຄອນຫຼວງວຽງຈັນ ໄດ້ເອົາໃຈໃສ່ຢ່າງຕັ້ງໜ້າປະຕິບັດ ແລະ ຊອກຫາແຫຼ່ງງົບປະມານ ເພື່ອປະຕິບັດວຽກງານດັ່ງກ່າວໃຫ້ປະສົບຜົນສຳເລັດທີ່ວາງໄວ້.
ຕອນບ່າຍວັນທີ 22 ເມສາ 2013 ທີ່ພະແນກການເງິນນະຄອນຫຼວງວຽງຈັນ ໄດ້ມີພິທີມອບ-ຮັບອຸປະກອນເຄື່ອງມືທັນສະໄໝ ໃຫ້ແກ່ເມືອງເຮັດທົດລອງ 3 ສ້າງຂອງນະຄອນຫຼວງວຽງຈັນ ໄດ້ແກ່ເມືອງຈັນທະບູລີ ປະກອບມີ 7 ບ້ານ ເມືອງສີສັດຕະນາກ ມີ 2 ບ້ານ ແລະ ເມືອງສັງທອງ ມີ 1 ບ້ານ ລວມທັງໝົດ 10 ບ້ານ ສຳລັບເຄື່ອງທີ່ມອບ-ຮັບຄັ້ງນີ້ ປະກອບມີເຄື່ອງໃຊ້ສຳນັກງານ ມູນຄ່າ 150 ລ້ານກວ່າກີບ ເຄື່ອງໃຊ້ຫ້ອງການ 13 ລ້ານກວ່າກີບ ເຄື່ອງອຸປະກອນທັນສະໄໝ 410 ລ້ານກວ່າກີບ ພາຫະນະ (ລົດຈັກ 9 ຄັນ) ມູນຄ່າ 112 ລ້ານກີບ ການຕິດຕັ້ງເຄື່ອຂ່າຍເນັດເວີກ 78 ລ້ານກວ່າກີບ ແລະ ສ້ອມແປງ ຫ້ອງການການເງິນເມືອງສັງທອງ ມູນຄ່າ 286 ລ້ານກວ່າກີບ ລວມມູນຄ່າທັງໝົດ 1.051.000.000 ກີບ ກ່າວມອບຄັ້ງນີ້ໂດຍທ່ານ ຄຳພັນ ມາລາບັນດິດ ຫົວໜ້າພະແນກການເງິນນະຄອນຫຼວງວຽງຈັນ ມີຜູ້ຕາງໜ້າຈາກ 3 ເມືອງກ່ຽວຂ້ອງເຂົ້າຮ່ວມ.