ສະບາຍດີທີ່ລັນຕາ (Sabaidee@lanta) ເປັນຊື່ເພງຫວານໆ ເພງໜຶ່ງ ຂອງວົງຊາເຢັນ ຮ້ອງເປັນປະຈຳຢູ່ພັບເກາະລັນຕາ ຈັງຫວັດກະບີ່ປະເທດໄທ ເຊິ່ງເປັນເກາະທີ່ສວຍງາມ ດ້ວຍທຳມະຊາດທີ່ອຸດົມສົມບູນ ແລະບໍລິສຸດ.

ເນື້ອໃນຂອງເພງພັນລະນາເຖິງ ຮູບພາບຄື້ນທະເລອັນສວຍງາມ ສົ່ງສຽງຂ້າມຂອບຟ້າມາຍັງແຄມແມ່ນ້ຳຂອງ ຍາມຄ່ຳແລງຕາເວັນແດງລັບລ່ຽມ ຟັງແລ້ວນຶກເຫັນພາບຄວາມສວຍງາມ ໃນສະຖານທີ່ສອງແຫ່ງ (ເກາະລັນຕາແລະແຄມຂອງຍາມແລງ).

ໃຊ້ພາສາລີລາສັບທີ່ສວຍງາມ ມີພາສາລາວປົນຢູ່ຕອນໜຶ່ງ ເນື້ອໃນບົ່ງບອກເຖິງບ່າວໄທຜູ້ໜຶ່ງ ທີ່ເກາະລັນຕາ ຄິດເຖິງສາວລາວທີ່ແຄມຝັ່ງຂອງ ອັນຊວນໃຫ້ຜູ້ຂຽນຈິນຕະນາການ ໄປວ່າ ເພງນີ້ ໜ້າຈະຖືກປະດິດແຕ່ງຂຶ້ນ ຈາກຊີວິດຈິງຂອງຫ້ວງຫົວໃຈຊາຍຜູ້ໜຶ່ງ ທີ່ຫຼົງໃຫຼໃນມົນສະເໜ່ຂອງສາວລາວວຽງຈັນ ອັນປະກອບດ້ວຍຮູບຮ່າງໜ້າຕາ ທີ່ສວຍງາມ, ກິລິຍາມາລະຍາດອັນອ່ອນນ້ອມ, ຮອຍຍິ້ມ ແລະຄວາມຈິງໃຈ ອັນເປັນເອກະລັກຂອງສາວລາວ.

ບົດເພງນີ້ ຄົງເປັນເພງໜຶ່ງທີ່ສາມາດ ສ້າງສັນຄວາມສວຍງາມ ແຫ່ງການພົວພັນແບບບ້ານພີ່ເມືອງນ້ອງ ຮັດແໜ້ນມູນເຊື້ອທີ່ດີງາມຕໍ່ກັນ ກ້າວເຂົ້າສູ່ສະມາຄົມ ເສດຖະກິດອາຊ່ຽນພ້ອມກັນ ຢ່າງກົມກຽວ.