MMG LXML ເຊໂປນ ແມ່ນບໍລິສັດຂຸດຄົ້ນ ແລະ ຜະລິດແຮ່ຄຳ-ທອງ ຢູ່ແຂວງສະຫວັນນະເຂດ ໄດ້ມອບເງິນຈຳນວນ 80ລ້ານກີບ (ປະມານ 10.000ໂດລາສະຫະລັດ) ເພື່ອຊ່ວຍໃນການສ້ອມແປງ ຟື້ນຟູຄວາມເສຍຫາຍ ໃນເຂດເທດສະບານແຂວງສະຫວັນນະເຂດ ຍ້ອນຖືກພາຍຸລະດູຮ້ອນພັດຢ່າງຮຸນແຮງ ໃນວັນທີ 22ມີນາທີ່ຜ່ານມາ.
ເຖິງແມ່ນວ່າບໍ່ມີການລາຍງານກ່ຽວກັບການບາດເຈັບ ຫຼື ເສຍຊີວິດໃດໆກໍຕາມ ແຕ່ພາຍຸກໍໄດ້ສ້າງຄວາມເສຍຫາຍຕໍ່ເຮືອນຊານ ແລະ ຕຶກອາຄານສະຖານທີ່ຕ່າງໆຈຳນວນຫຼາຍກວ່າຮ້ອຍຫຼັງຄາ ແລະ ລວມທັງສະໜາມບິນອີກດ້ວຍ.
ບັນດາອຳນາດການປົກຄອງແຂວງສະຫວັນນະເຂດ ໄດ້ສ້ອມແປງບັນດາພື້ນຖານໂຄງລ່າງທີ່ຈຳເປັນທາງດ້ານການສື່ສານ ແລະ ພະລັງງານໄຟຟ້າ ເພື່ອຮັບປະກັນໃຫ້ພໍ່ແມ່ປະຊາຊົນໃນເຂດທີ່ໄດ້ຮັບຜົນກະທົບ ສາມາດນຳໃຊ້ໄດ້ເປັນປົກກະຕິ.
“ບໍລິສັດ MMG ມີຄວາມມຸ້ງໝັ້ນໃນການແບ່ງປັນຜົນປະໂຫຍດຈາກການດຳເນີນໂຄງການບໍ່ຄຳ-ທອງເຊໂປນຂອງພວກເຮົາ ເຊິ່ງລວມເຖິງການຊ່ວຍເຫຼືອບັນດາຊຸມຊົນທີ່ໄດ້ຮັບຜົນກະທົບຈາກພາຍຸ ຫຼື ໄພນ້ຳຖ້ວມ” ກ່າວໂດຍທ່ານ ສະໝານ ອະເນກາ ຜູ້ບໍລິຫານ MMG LXML ເຊໂປນ
ນອກນັ້ນ ທາງບໍລິສັດຍັງໄດ້ໃຫ້ການຊ່ວຍເຫຼືອທາງກົງໃຫ້ແກ່ບັນດາຊຸມຊົນທ້ອງຖິ່ນ ໂດຍຜ່ານບັນດາກິດຈະກຳການພັດທະນາຕ່າງໆຂອງກອງທຶນພັດທະນາຊຸມຊົນ.