ກົດໝາຍວ່າດ້ວຍການສຶກສາ (ສະບັບປັບປຸງ), ໄດ້ຖືກນໍາເຂົ້າພິຈາລະນາ ແລະ ຮັບຮອງ ໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VII ໃນຕອນເຊົ້າມື້ວັນທີ 16 ກໍລະກົດນີ້, ເຊິ່ງກົດໝາຍດັ່ງກ່າວປະກອບມີ 15 ພາກ, 10 ໝວດ ແລະ 97 ມາດຕາ, ໃນນັ້ນ ມາດຕາປັບປຸງໃໝ່ມີ 56 ມາດຕາ, ເພີ່ມເຂົ້າໃໝ່ 37 ມາດຕາ, 2 ພາກ ແລະ ຮັກສາໄວ້ຄືເກົ່າ 4 ມາດຕາ ແລະ ໃນບ່າຍຂອງມື້ດຽວກັນ ກໍໄດ້ມີການນຳສະເໜີທາບທາມຮ່າງກົດໝາຍວ່າດ້ວຍ ສະພາແຫ່ງຊາດສະບັບປັບປຸງນຳອີກ.
ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກິລາ ດຣ. ພັນຄໍາ ວິພາວັນ ໄດ້ຂຶ້ນສະເໜີຕໍ່ທີ່ປະຊຸມວ່າ: ກົດໝາຍວ່າດ້ວຍການສຶກສາສະບັບປັດຈຸບັນນີ້ ໄດ້ຖືກຮັບຮອງ ແລະ ປະກາດນຳໃຊ້ແຕ່ປີ 2007 ເພື່ອເປັນ ບ່ອນອ້າງອີງເຂົ້າໃນການເຄື່ອນໄຫວວຽກງານການສຶກສາຕ່າງໆ, ຜ່ານການຈັດຕັ້ງປະຕິບັດກົດໝາຍດັ່ງ ກ່າວ ເຫັນວ່າ ການສຶກສາຢູ່ລາວເຮົາມີການພັດທະນາຫັນປ່ຽນຢ່າງເປັນຮູບປະທຳຫລາຍຂຶ້ນ ເປັນຕົ້ນລະບົບການສຶກ ສາສາຍມັນໄດ້ ເພີ່ມຈາກ 11 ປີຄື: ລະບົບ 5+3+3 ມາເປັນ 12 ປີຄື: ລະບົບ 5+4+3 ແລະ ອື່ນໆ, ການດຳເນີນເປົ້າ ໝາຍວຽກງານ ການສຶກສາແຫ່ງຊາດ ກໍຄືເປົ້າໝາຍສະຫັດສະວັດດ້ານການພັດທະນາປີ 2015, ເຊິ່ງເປົ້າໝາຍດັ່ງກ່າວ ໄດ້ຊີ້ບອກໃຫ້ເຫັນຕົວເລກທີ່ບັນລຸຄາດໝາຍ ແລະ ລື່ນຄາດໝາຍ.
ປັດຈຸບັນທຸກບາງແຂວງໃນທົ່ວປະເທດສາມາດປະກາດຈົບຊັ້ນປະຖົມສຶກສາແລ້ວ ແລະກຽມຈັດພິທີປະກາດ ຈົບຊັ້ນປະຖົມບຳລຸງພ້ອມກັນທົ່ວປະເທດໃນວັນທີ 28 ສິງຫາ 2015 ນີ້. ພ້ອມກັນນີ້ ຍັງມີບາງແຂວງສາ ມາດປະກາດ ຈົບຊັ້ນມັດທະຍົມຕອນຕົ້ນໄດ້ແລ້ວ ເປັນຕົ້ນແຂວງໄຊຍະບູລີ, ຊຽງຂວາງ ແລະ ແຂວງອື່ນໆກໍກຽມປະກາດເຊັ່ນດຽວ ກັນ.
ເຖິງຢ່າງໃດກໍຕາມ, ຖ້າທຽບໃສ່ຄວາມຮຽກຮ້ອງຕ້ອງການຂອງການພັດທະນາເສດຖະກິດສັງຄົມຂອງປະເທດ ເຮົາ ກໍຍັງມີອີກຫລາຍດ້ານທີ່ຈະຕ້ອງໄດ້ສືບຕໍ່ປັບປຸງແກ້ໄຂຢ່າງຈິງຈັງ. ດັ່ງນັ້ນ ຈຶ່ງມີຄວາມຈຳເປັນໃນການຮັບຮອງ ແລະ ປະກາດໃຊ້ກົດໝາຍສະບັບປັບປຸງໃໝ່ນີ້ ເພື່ອເຮັດໃຫ້ການສຶກສາລາວເຮົາສາມາດຕອບສະໜອງຄວາມຮຽກ ຮ້ອງຕ້ອງການຂອງການພັດທະນາເສດຖະກິດ-ສັງຄົມ ໃນໄລຍະໃໝ່, ສາມາດເຊື່ອມໂຍງເຂົ້າເປັນເສດຖະກິດອາຊຽນ ແລະ ສາກົນຕາມທິດພັດທະນາແບບຍືນຍົງ ເພື່ອສ້າງເງື່ອນໄຂໃຫ້ແກ່ການຫັນປ່ຽນດ້ານການ ສຶກສາໃນການຜັນຂະຫຍາຍນະໂຍບາຍພັດທະນາວຽກງານດັ່ງກ່າວໃຫ້ໄດ້ມາດຕະຖານມີຄຸນນະພາບດີ, ມີຄວາມຍືນຍົງແນໃສ່ການພັດທະນາຊັບພະຍາກອນມະນຸດໃຫ້ກາຍເປັນພົນລະເມືອງດີ, ມີຄຸນສົມບັດ, ມີຄວາມຮູ້ຄວາມສາມາດ, ມີວິຊາຊີບ, ມີຄວາມຊໍານານງານ, ມີສຸຂະພາບພະລານາໄມ, ຮູ້ຮັກສາ ແລະ ສົ່ງເສີມສິລະປະວັນທະນະທໍາ ແລະ ຮີດຄອງປະເພນີອັນດີງາມຂອງຊາດໄວ້, ພ້ອມທັງປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງສີວິໄລເທື່ອລະກ້າວ.
ແຫລ່ງຂ່າວ:
